Read anuak 2 Nyeye 12 Bible Online

2 Nyeye 12 - anuak bible

2 Nyeye 12

¹'Ba kanya tïme na ri bïriet cwiiri moa beet Jiyu ni ena nyeny Icriel, Jöac atïmö na nyeny Juuda, ni bëëde ni ena nyeya ki cwiiri ma pïëraŋween yi Jerucalem. 'Ba nyeŋ menni beeye Dhibiya nyijø Bëërcïïba.

²'Ba Jöac abëëdö ni tïïya gïï mo nëëni ni beyø ki jï Wuuö Jwøk ki yïth nïne moa beede bëët kanya bëëde ni Jööda na näk Kwääy Lam Mana Dwøŋ pwönynya eni.

³'Ba gïna no odööŋ keere ni käre tïïö, kwör wø läm jiyi yïthge bäät thuuri käre raanynyø. 'Ba jiy poot bëëdö ni ge cïpö ko olämme ni ge wääŋö ki jer wø jïcge ŋwääi ni met yïth kwörögø.

⁴'Ba Jöac aköö jï dïlämme, ni «Teeŋ gwelø man wø gäth jø gathi ki gø mo wø cïp jiyi yi Øt Wuuö Jwøk na muuce moa en kur keerge, ni beege mo wø jwäk baŋ jiy ki mo wø cïp jiyi ki met ec,

⁵beerra man ö dïlämme ni lwørge gwel moøgø, ni ŋati man nø lwöta baŋ jøøa tïnynye; ni ö geni ni cäŋge kwöra no oränynyö dëër Øt Jwøk dwøk kare ki gwetøgø, ni beeye kany wäro jootge jaak no oränynyö dëër øtø.»

⁶'Ba gïna tägö, kanya tïm cwiiri na pïërariiø kurdäk moa beet Jöaci ni ena nyeya, dïlämme kwöra näk oränynyö dëër Øt Jwøk poot kärge geerø.

⁷Køøre nyeya ma Jöac, Jööda na näk Kwääy Lam Mana Dwøŋ ki dïlämme møøk acwøle, ni kööe jïge, na «?Aperŋø ni poode ni kwöra no oränynyö dëër Øt Jwøk poot käru dwøk kare en? 'Ba ennø, käru kädö këët ki gwel baŋ jø wø tïnynyu; 'ba gwel moa en ceŋŋu wär putu cïp kiper nee kwöra no oränynyö dëër Øt Jwøk dwøk kare ki ge.»

⁸Køøre dïlämme ajïëy ki man ba kätge ki gwel baŋ jiy, ni jïëcge ki man ba en luum dwøk kar kwöra no oränynyö dëër Øt Jwøk ceŋge.

⁹'Ba Jööda na näk Kwääy Lam Mana Dwøŋ alwötö ka acanduk ni køl dhi gø, ni cïp gø buut gïn wø cïp olämme bääte, bäät cwïïc jï løø wø døny dhaanhe yi Øt Wuuö Jwøk ki yie; 'ba dïlämme mo wø koor dhi Øt Jwøk, gwel bëët mo wø cïp yi Øt Wuuö Jwøk putge ka kïth ya acanduk.

¹⁰'Ba kany wø jootge gø ni gwel otïmö ni thööth ya acanduk, ŋat wø göör luup nyeya piny, ki Kwääy Lam Mana Dwøŋ, ge wø öö ni kwaange gwel mo wø jootge Øt Wuuö Jwøk, ni kïthge ge yïth opïri.

¹¹'Ba kanya lønyge ki göör kwään gwel piny, gwel moøgø acïpge ceŋ jø wø raŋ tïï Øt Wuuö Jwøk; ni ö jøøgø ni coolge ge jï dïjëëth opämi, ki jï jø geer mo wø tïïö dëër Øt Wuuö Jwøk,

¹²ki jï jø wø ŋäc geer ki kïte, ki jï jø wø tøk kïte; ni ö gwelli møøk ni ŋeei ki jen ki kïte mo otøø nee kwöra no oränynyö dëër Øt Wuuö Jwøk cäŋ dwøk kare, këël jammi bëët moa näk omanynyø kiper man cäŋ øtø dwøk kare ki geni.

¹³'Ba bäŋ ogubääye mo tïïc ka gwel-bïrö, ki gïï wø thooth thøøth lambae ki ge, ki kuure, ki tuŋi, ki jap paac mo tïïc ka warkey, wala mo tïïc ka gwet-bïrö, mo otïïö kiper Øt Wuuö Jwøk ki gwel moa käl yi Øt Wuuö Jwøk;

¹⁴kiper geni gwetøge acïpge jï jø tïïc, ni ö geni ni cäŋge Øt Wuuö Jwøk dwøk kare ki gwetøge.

¹⁵'Ba geni bäŋ gïn mo ege pëënynyö baŋ jøøa cïpge gwel ceŋge kiper jöö mana coolge gwel jï jø tïïc ki gø, kiper mana tïïcge tïïc na kare.

¹⁶'Ba gwel mo wø joot ki ro olämme mo wø cïp kiper bääyö ki mo wø joot ki ro olämme mo wø cïp kiper raay, kär käl yi Øt Wuuö Jwøk; kiper gena mo dïlämme.

¹⁷'Ba kar kaagø, Adhaël nyeny Aram acøø ni këëde ki jø Gëth ni mak pääny manøgø; ni ö Adhaëlli ni løø nyïme Jerucalem.

¹⁸'Ba Jöac nyeny Juuda jammi bëët moa no ocïp kur keerge na mo Wuuö Jwøk, ni beege moa cïp kwari ma Jøcapat, ki kwari ma Jöram, ki wänni ma Akadhiya, nyec Juuda, alwøre, këël jammi moe moa näk ee cïp kur keerge, ki warkie bëët moa joot yïth kwör kän moa en yi Øt Wuuö Jwøk ki øt nyec, ni jääŋ geni baŋ Adhaël nyeny Aram. Køøre Adhaël wääth mana dee aa Jerucalem aput wec.

¹⁹'Ba luup tïïe møga bëët moa tïïc Jöaci ogöör piny yi Wëël Luup Nyec Juuda.

²⁰'Ba jø moa tïïö tiere aö maal ni gëëmge ki eni, ni 'näkge eni yi øtø mana no ogeerø bäät kanya no othørø ni wø cwøl na Milø, na en waŋjöör Cila.

²¹Ni beege Jödhakar o Cimät ki Jödhabat o Cömär na tïïö tiere na näk eni, ni ö eni ni put thøø; ni koony eni buut kwäcge yi Pääny Deebit, ni ö wääde ma Amaciya ni läw kar gø na nyeya.