Read anuak 2 Nyeye 16 Bible Online

2 Nyeye 16 - anuak bible

2 Nyeye 16

¹'Ba kanya tïme na ri cwiiri apaar ka abïriiø moa beet Peka o Remaliya ni ena nyeny Icriel, beeye kanya tïm Eeyethi o Jötham na nyeny Juuda.

²'Ba kanya tïm Eeyethi na nyeya, cwiic dööŋö moe beege pïërariiø, ni bëëde ki cwiiri apaar ka abïciel ni ena nyeya yi Jerucalem. 'Ba eni kär bëëdö ni tïïya gïï mo nëëni ni beyø ki jï Wuuö Jwøk, Jwøk mare, kaawat mana bëët kwari ma Deebit ni tïïya gïï mo beyø.

³'Ba ena bëëdö ni caatha køør tïïe moa tïïc nyeye mo Icriel, këël mana waaŋ wääde no olämi jï juu møøk ni eni caatha køør gïïa raac yi Wuuö Jwøki ki ge na tïïc wïth juurre moa riem Wuuö Jwøki wøk nyïm jø Icriel.

⁴Ni ö eni ni bëëde ni cïpö ko olämme ni wääŋö ki jer wø jïcge ŋwääi ni met kwör lam moa en bäät thuuri ki bäät kïte ki moa en tiet jenni moa no onigïït piny bëët.

⁵'Ba Recin nyeny Aram ki Peka o Remaliya nyeny Icriel, gena ö Jerucalem nee këëtge ki Eeyeth, ni cielge gø dïër; 'ba kär løny jïge ki man tukge gø.

⁶'Ba kar kaagø beeye kanya ö nyeny Ëdömmi na duu Elath tier Ëdöm, ni riem jø Juuda wøk bëët moa bëëdö kaace; ni ö jø Ëdömmi ni öge Elath, ni putge bëëtö kaace këël dïcäŋi en.

⁷Kanyøgønø, Eeyeth ajääk baŋ Tiglat-Pilëëcër nyeny Aciria, ni kööe, ni «Aani, aana dhaanhnhï ni näga wäädï; ö kuna kønyï aani cer nyeny Aram ki cer nyeny Icriel, ge ni këëdi ki aani en.»

⁸Køøre, Eeyeth gwel-bïrö ki warkey moa joot Øt Wuuö Jwøk ki moa joot kwör kän moa en øt nyec, alwøre ni jääŋ ge baŋ nyeny Aciria na muuy.

⁹Kanyøgønø, nyeny Aciria luum Eeyeth aput wïnynyö; ni ö eni ni put ci Damacka baŋ leny ni mac gø, ni mak jiy moa en yie ki tøŋ ni kïth ge pääny mana cwøl ni Kir; ni put Recin nyeny Aram 'näk.

¹⁰Køøre nyeya ma Eeyeth aci Damacka nee røømme ki Tiglat-Pilëëcër nyeny Aciria. 'Ba da gïn wø cïp olämme bääte mo ena Damacka maa joode; ni ö eni ni jääk baŋ Uria na näk Kwääy Lam Mana Dwøŋ ki teeŋ nyi gïn mo caala gïn wø cïp olämme bääte manøgø, ki jöö mana tïï ki gø bäre.

¹¹Kanyøgønø, dïlämi ma Uria gïn wø cïp olämme bääte aput tïïc, ki køør teeŋ nyi gïnögø mana jääŋ nyeya ma Eeyethi baŋe ki Damacka, ni put gø thöör ki tïïc kanya poode ni nyeya ma Eeyeth poot kär öö ki Damacka.

¹²'Ba kanya ö nyeya ki Damacka, gïn wø cïp olämme bääte manøgø aput joot; ni ö eni ni nyiik buut gø ni cïpe ko olämme bäät gø,

¹³ni waaŋ olämi mare man wø waaŋ bäre, ki muuy mare mar beel, ni thii muuy mare mar køøŋø bäät gø, ni jør remø mar olämi man wø duunni ki mëër bäät gø.

¹⁴'Ba gïn wø cïp olämme bääte mar Wuuö Jwøk na näk tïïc ka nywïënyö ma jwïël na en nyïm Øt Wuuö Jwøk, akäl wøk ki nyïm Øt Wuuö Jwøk kanya en yie yïthakic gïn wø cïp olämme bääte mare mana nyään ki Øt Wuuö Jwøk, ni cïp gø jï kuna en buut piny mana en bäät cwïïc ki gïn wø cïp olämme bääte mare mana nyään.

¹⁵Køøre nyeya ma Eeyeth, Uria na näk Kwääy Lam Mana Dwøŋ aköömme ni kööe jïgø, ni «Waaŋ olämme mo wø waaŋ bäre ka amöölla, ki muuce mo beel mo abøøya, ko olämme mo nyeya mo wø waaŋ bäre, ki muuce mo beel moe, ko olämme mo wø waaŋ bäre mo jiy bëët, ki muuce mo beel moge, ki muuce mo kwøŋ moge bäät gïn wø cïp olämme bääte mana dwøŋ na nyään, ni jørï remø bäre mar olämme mo wø waaŋ bäre ki mar olämme møga bääte. 'Ba gïn wø cïp olämme bääte mar Wuuö Jwøk mana näk tïïc ka nywïënyö ma jwïël, tïmö ni beeye gïn pëënynya Wuuö Jwøk ki ree.»

¹⁶Køøre, Kwääy Lam Mana Dwøŋ ma Uria jammi bëët moa ö nyeya ma Eeyeth na kööm eni ki ge aput tïïc.

¹⁷'Ba nyeya ma Eeyeth bööp jïëthe moa en Øt Wuuö Jwøk ni wø käär pïï ki ge akäl wøk, ni käl gïï pïï wøk bäät jïëthe, ni käl gïr pïï wøk mana dwøŋ na en bäät dhäk moa näk tïïc ka nywïënyö ma jwïël, ni cïp gø bäät kïte mo ocaamø.

¹⁸'Ba kiper nee yi nyeny Aciria tïme ni met, Eeyeth thudhi man wø bëët wälu mar nyeya bääte akäl wøk ki Øt Wuuö Jwøk, ni cïëk dhi kal man wø døny nyeya yi Øt Wuuö Jwøk ki gø.

¹⁹'Ba luum tïïe møga moa tïïc Eeyethi ogöör piny yi Wëël Luup Nyec Juuda.

²⁰'Ba Eeyeth athøw ni läp køør kwäcge, ni koonyi buut kwäcge Pääny Deebit; ni ö wääde ma Edhekaya ni läw kar gø na nyeya.