Read anuak 2 Nyeye 18 Bible Online

2 Nyeye 18 - anuak bible

2 Nyeye 18

¹'Ba kanya tïme na ri dää cwiiri moa beet Awcë wär Ëla ni ena nyeny Icriel, Edhekaya wär Eeyeth atïmö na nyeny Juuda.

²'Ba eni kanya tïme na nyeya, cwiic dööŋö moe beege pïërariiø kurbïïc, ni bëëde ni ena nyeya ki cwiiri ma pïërariiø ka abïŋween yi Jerucalem. 'Ba nyeŋ menni beeye Abiya nyi Dhekaraya.

³'Ba ena bëëdö ni tïïya gïï mo nëëni ni beyø ki jï Wuuö Jwøk, kaawat moa tïïc kwari ma Deebit.

⁴Eni kwör wø läm jiyi yïthge bäät thuuri araanynye, ni tøk kïte moa no ocwöth piny na gïï lam, ni ŋøt jenni piny moa no ocaa ri jwø wø cwøl na Acara. Eni thuwø thwör jwïël mana tïïc Modhe atøye ni thenh thenh, kiper atïmö ni këël ki yïth nïröka, jø Icriel ge poot wääŋö ki gïï wø jïcge ŋwääi ni met jïgø; 'ba thwör jwïël manøgø cøøri ni Nëuctan.

⁵'Ba Edhekaya abëëdö ni ŋäätha Wuuö Jwøk, Jwø Icriel, ni put bëëtö ni bäŋ dhaanhø mo caala eni røk nyec Juuda bëët moa en køøre, këël ki nyeye moa kwøŋ en nyïme.

⁶Kiper ena bëëdö ni eno göök ri Wuuö Jwøk, ni køør Wuuö Jwøk ba wiie ki caath, ni bëëde ni gwøga ciik Wuuö Jwøk moa ö Wuuö Jwøki na kööm Modhe ki ge.

⁷'Ba Wuuö Jwøk abëëdö ki eni, ni gïn wø tïïe cooth thura kare. Ni ö eni ni gëëme ki nyeny Aciria, ni kweere ki man tïny gø.

⁸Ni ö eni ni bööt jø Pilitin këël mana pïïe Geedha ki mïëri moa en deŋŋe, ni beege mïëri moa therø këël päänye moa døøŋŋø.

⁹'Ba kanya tïme na ri ŋweer cwiiri moa beet Edhekaya ni ena nyeny Juuda, ni beeye ri bïriet cwiiri moa beet Awcë wär Ëla ni ena nyeny Icriel, Calmanëcër nyeny Aciria acøø nee këëde ki jø Icriel Cameria, ni ciel Cameria dïër.

¹⁰'Ba kanya tïme na aŋuun dää cwiiri, jø Aciria Cameria amacge, ni beeye ri bïcier cwiiri moa beet Edhekaya yi nyec, ni beeye ri bïŋweer cwiiri moa beet Awcë ni ena nyeny Icriel.

¹¹Køøre nyeny Aciria jø Icriel amaae ki tøŋ ni kïth ge ya Aciria, ni cïp ge piny nee bëëtge ya Alay ka Abör bäät Naam Gödhan, ki yïth päänye mo jø Mëdön.

¹²Gïnögø atägö kiper jø Icriel dwør Wuuö Jwøk, Jwøk marge, kärge leŋø, ni dhalge luumma tuut Wuuö Jwøki ki geni. Këël luup bëët moa cem Modhe, dhaanh Wuuö Jwøk, kärge leŋø, ni kärge gø kïth bäät tïïc.

¹³'Ba kanya tïm cwiic Edhekaya na apaar kurŋween bäät nyec, Cenakerëp nyeny Aciria acøø ni tuk päänye mo Juuda bëët moa näk kiiri moge ogeerø ni teek, ni mak geni.

¹⁴Køøre Edhekaya nyeny Juuda ajääk Lakic ki dwøl baŋ nyeny Aciria ni kööe, ni «Aana bääyö; beerra man aayï paara. 'Ba gïno manynyï baŋa jaak, cïba cïbö jïrï.» Kanyøgø nyeny Aciria aput cwötö bäät Edhekaya nyeny Juuda ki gwel-bïrö ma rumme ma dïpe adäk, ki warkey ma rumme ma pïëradäk mo røm ka rumi mana cwøl ni kikar. [16]

¹⁵Ni ö Edhekaya ni cïp gwel-bïrö bäre mana joot yi Øt Wuuö Jwøk, ki moa joot kwör kän moa en yi øt nyec.

¹⁶Kar kaaca, Edhekaya nyeny Juuda, warkey mana näk ee leeny røk odhuule mo Øt Wuuö Jwøk, ki warkey mana näk ee leeny røk jenni mo wø gur odhuule dëëtge, akäl wøk ni cïp ge jï nyeny Aciria.

¹⁷Køøre nyeny Aciria, kwääc lenye moa cøøri ni Tartan ki Rapcaric ki Rapcakë, ki lwaa leny mo päl, ajääŋŋe ki Lakic, nee ge cige Jerucalem baŋ nyeya ma Edhekaya; ni aacge ni pïïcge deŋ Jerucalem. 'Ba kanya pïïcge, gena cuŋŋö bäät øøl pïï mana käl yi puul mana en jï maal, waŋjööra dwøŋ man wø cør pwöla mar jø peny ka abïïe.

¹⁸'Ba kanya ö jøøgø na cwølge nyeya ma Edhekaya, Eliekim wär Kilkiya na en paan dwøŋŋi cere, ki Cëpna ŋat wø göör luup akwöma piny, ki Jöa wär Acaap ŋat wø par wïc ki luup, gena ö wøk baŋ jøøgø.

¹⁹Køøre Rapcakë aköö jïge, ni «Caannu jï Edhekaya ni nyeny Aciria na dwøŋ aköö, ni ‹?Ïïni, ï ŋääthï ŋø?

²⁰?Aŋø, ïïni, waŋï riek ki leny døc, ni jïrï da jø leny mo teek? Marï kaa waac jaak. ?Ennø, ï ŋääthï ŋa ni gëëmï ki aani en?

²¹Ka adïëri møn, ïïni, ï ŋäätha Ijep ni wø bëëdö kaamar abaarø ni wø laar toor ni cwøp cer dhaanhø kany wø näk mo dhaanhø kwömö ki gø. 'Ba Peerø nyeny Ijep caala abaarø manøgø ki jï jø wø ŋääth gø bëët.

²²?'Ba ni näk mo u köö jïra nou ŋäätha Wuuö Jwøk, Jwøk maru, aŋø, paa eni na kwör lam moe mo wø läm jiyi yïthge bäät thuuri, ki gïï wø cïp olämme bäätge moe, raany Edhekaya, na kööm uuni, u na jø Juuda ki jø Jerucalem, ni lämu nyïm gïn wø cïp olämme bääte mana en Jerucalem keere?› »

²³Ni cäŋ Rapcakë köö, ni «Ennø, beerra man gääbu dhøgu ki nyeya mara ma nyeny Aciria, naa cïpa jïïu ko okwëënyi ma kume ariiø ni näk mo løny jïïu ki man cïpu ki jiy mo cäädhi ki bäätge.

²⁴?Aŋø, këël na näk mo u ŋäätha jø Ijep kiper jïëth leny mo wø tut okwëënyi, ki jø leny mo wø këëdi ki bäät okwëënyi, olønye jïïu nidïï ki man riemmu kwääy leny aciel mana kare thiinh mar nyeya mara?

²⁵?Aŋø, ni ööa kany en baŋ leny nee kany raanynya, ki jïïu naa ba ööi ka køør dwør Wuuö Jwøk? Beeye Wuuö Jwøk na köö jïra ni ööa paani naa këëda ki gø nee raanynya.»

²⁶'Ba Eliekim wär Kilkiya, ki Cëpna, ki Jöa gena köö jï Rapcakë, ni «Beerra man ba caanï luummögø jïwa ki dhi Ibaru, na näk dhøk marwa, ni wïnyö jï jøøi no opï piny bäät kiir ii; 'ba caanï jïwa ki dhi jø Aram, kiper wïnyö jïwa.»

²⁷'Ba Rapcakë aköö jïge, na «?Aŋø, nyeya mara na jääŋ aani, a jääŋŋe kaper nee luupi ii cara jï nyeya maru ki jïïu keeru, ni paa kiper nee wïny jøøgø no opï piny bäät kiir yøø, jø ojwør gïï mo leth ki uuni na aciel, noo cam laac-døøŋŋø moge, noo maath laac moge moa therø ki uuni na aciel?»

²⁸Kanyøgø Rapcakë aput ö maal ni rwääye ki dhi Ibaru ni dwøre ee tïŋ maal ni kööe, ni «Uuni, wïnynyu dwør nyeny Aciria na dwøŋ.

²⁹Nyeya aköö, ni ‹Uuni, kär u cøøk Edhekaya, kiper ba løny jïre ki man piem uuni cera.

³⁰Kär nee Edhekaya tïïya uuni nee Wuuö Jwøk ŋääthu, ki køør man wø kööe, ni «Ka adïëri møn, Wuuö Jwøk ø pieme piemø; ni pääny man ba ci cer nyeny Aciria.» ›

³¹«Kär dwør Edhekaya wïnynyu; wïnynyu dwør nyeny Aciria na köö, ni ‹Tïïyu bëët-mëër ki aani, ni ööu wøk baŋa. Køøre uuno bëëdö ni ŋati man nø opï piny paare ni cama caammi mo pwöthe ni maatha pïï moa näk ee cooŋø,

³²këël kanyo ööa noo käla uuni noo kïtha uuni yi ŋöömö mo caala ŋöömö maru, ni beeye ŋöömö mo beel ki nyïïomøki ciek yie; mo yie da caammi, ki pwöth nyïïomøki, ki jenni mo wø nyïïge wel na maaw, ki maar kïc; kiper nou bëëdu nou kwøw, nou ba thøw.› 'Ba kany wø kö Edhekaya, ni ‹Wuuö Jwøk ø pieme piemø,› kär luumme wïnynyu, kiper eni løøa wïthu wøk.

³³?Aŋø, da jwøk røk juu mo wïth juurre, mo jiy moa bëëdö yi ŋöömme ee piemø cer nyeny Aciria?

³⁴?Age juuk jø Amath ki juuk jø Arpat? ?Age juuk jø Cepar-Waym ki juuk jø Ëna ki juuk jø Iwa? ?Aŋø, geni jø Cameria apiemge cera?

³⁵?A juuge moe røk juu bëët mo tiet mïëri mo jø wø bëëdö yïth ŋøøpge ege piemø cera, ni tïme ni Wuuö Jwøk jø Jerucalem pieme piemø cera en?»

³⁶'Ba jøøa en bäät kiir gena bëëdö ni dhøkge ba tukge, ni bäŋ luubö mo dwøkge, kiper geno nø kööm nyeya ma Edhekaya, ni «Kär dee gïn mo dwøgu jïre.»

³⁷Køøre Eliekim wär Kilkiya na en paan dwøŋŋi cere, ki Cëpna ni wø göör luup akwöma piny, ki nyikugö ma Jöa wär Acaap, gena duu baŋ Edhekaya na abïïe moge ege jeeyø ki pänh cwïny, ni caange luup moa caan Rapcakë jïre.