Read anuak 2 Nyeye 19 Bible Online

2 Nyeye 19 - anuak bible

2 Nyeye 19

¹'Ba kanya ö Edhekaya na wïny gïnögø, eni abïïe moe aput jeeyø ki pänh cwïny, ni dwøl keeca dëëre, ni døny yi Øt Wuuö Jwøk.

²Køøre Edhekaya, Eliekim ŋata en paan dwøŋŋi cere, ki Cëpna ŋat wø göör luup akwöma piny, ki jø døøŋŋø moa näk dïlämme, mo dëëtge ege döönnö ki keece ki pänh cwïny, ajääŋŋe baŋ nyikuŋ Jwøk ma Aydheea wär Amöth.

³Ni kö jøøgø jï Aydheea, ni «Edhekaya aköö, ni ‹Dïcäŋ man beeye dïcäŋ jwør gïï mo leth, ni beeye cäŋ ajäla, ni beeye cäŋ ataa; kiper ø caala dhaagø mo lwaar ki nyilaal, mo cøøl odhäthö jïre kiper mana näk mo dëëre jääk.

⁴Kanymør ni Wuuö Jwøk, Jwøk marï, luup bëët moa caan Rapcakë, ŋata jääŋ nyeny Aciria nee eni na Jwøa kwøw pääde, wïnynye wïnynyö, ni ö eni na Wuuö Jwøk ni jook ŋata wïny luup moøgø dhi gø. 'Ba kiper manøgønø, beerra man lämï jï Wuuö Jwøk kiper jiy moa no odööŋ ni kwøw.› »

⁵Kanyøgønø, jic nyeya ma Edhekaya gena put ö baŋ Aydheea.

⁶'Ba Aydheea aköö jïge, ni «Wär caannu jï nyeya maru, ni man beeye dwør Wuuö Jwøk, ena köö, ni ‹Käru lwäyö kiper luubö mana wïnynyu, na ö jic nyeny Aciria na janyge aani ki gø.

⁷Ka adïëri møn, aani bääte kïtha kïthö ki jwïëy, ni ö eni ni wïnye ka akøpi ni døø yi ŋöömö mare. Ni tïïa eni nee 'näk ko opëëllö yi ŋöömö mare.› »

⁸'Ba kanya ö Rapcakë na wïny gø ni nyeny Aciria onø aay Lakic, ena cøø ni nwän nyeny Aciria ni këëdö ki jø Libana.

⁹'Ba awïny Cenakerëp nyeny Aciria ni Tiraka nyeny Kuuc aö baŋ leny ki eni. Ni ö Cenakerëpi ni cäŋ jääk baŋ Edhekaya ki jiy ni kööe,

¹⁰ni «Wär caannu jï Edhekaya nyeny Juuda, ni ‹Kär u cøøk Jwøki maru manø ni ŋääthu enø kany wø kööe ni Jerucalem ba ci cer nyeny Aciria.

¹¹?Aŋø, gïna tïïc nyec Aciria yïth mïëri bëët, na raanyge ge na bäre bäre, käru wïnynyö? ?Aŋø, da ŋat mo piema uuni?

¹²?Aŋø, wïth juurre moa wïthge dïïr kwäcwa, gena piem juu moge na bëëde? ?A këël jø Gödhan, ki jø Aaren, ki jø Rëdhep, ki jø Ëden moa bëëdö Tëlacer, gena piem juu moge?

¹³?Age nyeny Amath, ki nyeny Arpat, ki nyeny Cepar-Waym, ki nyeny Ëna, ki nyeny Iwa?› »

¹⁴Kanyøgønø, Edhekaya wëëlö alwøre ceŋ jiy moa jääŋŋi ni kwaan gø. Ni ö eni ni ci yi Øt Wuuö Jwøk ni peer gø nyïm Wuuö Jwøk.

¹⁵Ni ö Edhekaya ni läme jï Wuuö Jwøk, ni kööe, «Wui, Wuuö Jwøk, Jwø Icriel, ï ni wø nyooth ajiem-nyec marï ki yïthakic nyïïatwiet maal moa cwøl ni kirubëlli, bee ï keerï na Jwø wïth buc nyeye bëët mo bäät piny, ni bee ï na cwääc maal ki piny.

¹⁶Wui, Wuuö Jwøk, cek ïthï, ni wïnynyï lam mara. Wui Wuuö Jwøk, jap nyeŋŋï ni räŋŋï; ni wïnynyï luup Cenakerëp nyeny Aciria, na jääŋ jiy nee ï pääde, ï na Jwøa kwøw.

¹⁷«Wui, Wuuö Jwøk, ka adïëri møn, nyeye mo Aciria wïth juurre anø thöörge ki 'näk, ni nø raanyge ŋøøp jøøgø,

¹⁸ni nø leeŋge juu mo jøøgø yi maac, kiper ge paa juu cøøn, 'ba gena gïï mo tïïc jiyi ka ceŋge, ni beege jen ki kïte jaak. 'Ba gena put nyeye mo Aciria raanynyø møn.

¹⁹'Ba ennø, wui, Wuuö Jwøk, Jwøk marwa, a kwaya ïïni, piem waani cer nyeny Aciria, nee ŋäc buc nyeye bëët mo bäät piny ni Jwøk bee ï keerï, ï na Wuuö Jwøk.»

²⁰Kanyøgønø, Aydheea wär Amöth ajäägö ki dwøl baŋ Edhekaya ni caan gø ni «Man beeye dwør Wuuö Jwøk, Jwø Icriel, ena köö: Lam mana lämï kiper Cenakerëp nyeny Aciria awïnynya.»

²¹Ni dwøl mana caan Wuuö Jwøki kiper Cenakerëp nyeny Aciria beeye en, ena köö, ni «Dhayan, ni beeye Jerucalem, na caal nyakøø mo dëër dïcwøø poot kuue, ïïna taae ni päät ïïni, ni keny wïïe ni buua ïïni kanya reŋï.

²²?Aŋa nø na päätï na janynyï? ?Aŋa na kwöŋŋï bääte, na ŋuuï nyeŋŋï wøk bääte niï töödö? ?Paa bääta, a na Jwø Icriel na en kur keere?

²³Ïïna ŋwöö bääta, a na Kwäärö Wuuö Jwøk, ki dhøk jiy moa jääŋŋï, ni kööï, ni ‹Aana ci wïth kïte maal ki jïëth leny 'moa mo thööth mo wø tut okwëënyi, ni cøøa yi lur Libaanø kuya; ni ŋøda jen moe piny moa bäyö na perge leth, ni dønynya yi lul mana cøl kuya.

²⁴Aana kunyö ki ïïdhi yïth ŋøøp wïth juurre, ni mädha ki pïï yïthge kaace. Ni wëëga pïï talø ki tiet jø leny 'moa, ni beege pïï mo näp Ijep bëët.›

²⁵«?Aŋø, kärï wïnynyö cøøn? Gïnögø yaa nø caar ki kany mo bäär, a na Wuuö Jwøk, ni caara ka ya acääŋŋe cøøn. 'Ba ennø, a wëëga gø thur kare, nee päänye moa no ogeerø ni teek nee wëëgï niruuth.

²⁶Ni ö jiyi moa bëëdö yïthge ni tïmge ni jägö, ni ge lwäär ni wïthge laay; ni tïmge kaamar gïï mo otuy yi pwöla, kaamar luum mo mar mo otuy yi kaŋ, ki luum mo otuy wïth uudi ni wø laar waaŋ ni poot kär døøŋŋø.

²⁷«'Ba aani, bëëtö marï bäre ŋääa, ki mano täge ki ööny maal marï këël pïïn piny marï; ki døny wøk marï, ki duuö marï; këël wëër marï man wø wëërï ki aani ŋääa thuwø.

²⁸'Ba kiper wëër mana wëërï ki aani, ka atöör marï mana jooda, aani umï gäna gänö ko obïth, ni kïtha dhiï ki nywïëny dho okweeny, ni wiira wïïï ki gø, ni dwøga ïïni ki jöö mana ööï ki yie.»

²⁹«'Ba ï na Edhekaya en, man otïmö na nyuudhi jïrï; yi cwiir man u cämö ki caammi moa näk bär, ni cwiino ööi u poot cämö ki caammi moa näk bär. 'Ba ri dää cwiiri u pïïdhö ni kääu; ni pïïdhu ki jer omøki ni cammu nyïïge.

³⁰'Ba jiy moo dööŋ ni kwøw røk jø dhi øt Juuda, tietge cäŋa këët piny ni nyaacge.

³¹Kiper da jiy mo dööŋ mo tuula wøk ki yi Jerucalem ki bäät Kïn Dhayan. 'Ba gïnögø otïïc Wuuö Jwøki, eni na wïth jammi bëët, ki køør këëyö mare.

³²«'Ba man beeye dwør Wuuö Jwøk na caane kiper nyeny Aciria, ena köö, ni ‹Eni ba duny yi pääny man, ni bäŋ atheerø mo thöör yi gø kany; këël eni ba nyänh deŋ gø ni käädö ki kwöt leny, ni bäŋ ŋøøm mo di thørø deŋ kiir ki man ethge bäät kiir ki gø.

³³Eni døøk ki jööra cur yi gø ni ba duny yi pääny man.

³⁴'Ba aani, a na Wuuö Jwøk, pääny man gwøa gwøø ni piema gø kiper nyeŋŋa ki nyeŋ dhaanhnha ma Deebit.› »

³⁵'Ba kanya tïme na dïwäänögø, nyïïatwiel maal mar Wuuö Jwøk aci twïër mar jø Aciria, ni 'näk jiy ma kume ma dïpa aciel ki pïërabära kurbïïc. 'Ba na päc jiyi ka amöölla cøøn, ka adïëri møn, jiy bëët aputge joot no othøw.

³⁶Kanyøgø Cenakerëp nyeny Aciria aput tïŋŋö ni døø paare Nineba, ni bëëde yie.

³⁷'Ba dïcäŋ aciel ni eni lämö øt Nicrøk, jwøk mare, ena put wääde ma Adramëlëk ki wääde ma Carëdher 'näk ko opëëllö; ni ö geni ni reŋge yi ŋööm Ararat. Ni ö wääde ma Ëcaradön ni läw kar gø na nyeya.