Read anuak 2 Nyeye 21 Bible Online

2 Nyeye 21 - anuak bible

2 Nyeye 21

¹'Ba Maneeca kanya tïme na nyeya, cwiic dööŋö moe apaar kurriiø, ni bëëde ni ena nyeya ki cwiiri ma pïërabïïc kurbïïc yi Jerucalem. 'Ba nyeŋ menni beeye Ëpciba.

²'Ba ena bëëdö ni tïïya gïï mo nëëni ni reyø ki jï Wuuö Jwøk, ni caatha køør gïïa näk ec raac ki ge døc na tïïc wïth juurre moa riem Wuuö Jwøki wøk nyïm jø Icriel.

³Kiper eni kwör wø läm jiyi yïthge bäät thuuri na raany wänni ma Edhekaya acäŋ geerrø, ni tïïe ki gïï wø cïp olämme bäätge jï juuk wø cwøl ni Baal, ni tëëŋe ki jenni ni caa ge ri jwø wø cwøl na Acara, kaawat mana tïïc Akapi nyeny Icriel, ni wøør jap maal ni tïny geni.

⁴Køøre ena tïïö ki gïï wø cïp olämme bäätge jï juu møøk yi Øt Wuuö Jwøk, ni beeye øtø mana kö Wuuö Jwøki ni nyeŋŋe doo wøørø yie yi Jerucalem.

⁵Eni gïï wø cïp olämme bäätge atïïe yïth käälle mo Øt Wuuö Jwøk moa na ariiø jï japa en maal bëët.

⁶Ni waaŋ wääde no olämi, ni tïïe ki wäälli, ki jap adïëda, ni pëëny ajuuk, ki jiy mo rege da juu mo cøøra jwïëc jøøa no othøw, ki jiy mo cäänö ki juuk piny. 'Ba ena tïïö ki gïï mo thööth døc mo nëëni ni reyø ki jï Wuuö Jwøk, ni tïïya Wuuö Jwøk nee goote.

⁷Køøre eni jaadha näk ee tieŋø na näk ocaa ri jwøa cwøl na Acara acwöth piny yi Øt Wuuö Jwøk, ni beeye øda kö Wuuö Jwøki jï Deebit ki wääde ma Cølöman, ni «Jerucalem ki øtø man ni en yie en, yaa jierø ki røk kwör wø bëët wïth tuŋi mo jø Icriel yïthge bëët, nee nyeŋŋa bëëde ni ŋäc yie na bäre bäre.

⁸'Ba ni näk mo jø Icriel rege gwøkge gwøø ki man kïthge luup moa cema bëët bäät tïïc, ni beege ciik bëët moa caan dhaanhnha ma Modhe jïge, aani ge ba daaa këët yi ŋöömö mana cïba jï kwäcge.»

⁹'Ba jø Juuda luum Wuuö Jwøk kärge wïnynyö. Geni wïthge amaaŋ Maneeca, ni tïïge ki raay mo thööth mo kaala moa tïïc wïth juurre moa wïthge dïïr Wuuö Jwøki nyïm jø Icriel.

¹⁰Ni ö Wuuö Jwøki ni cääne ki dhøk jiye ma nyïïkuk Jwøk ni kööe,

¹¹ni «Kiper mana ö Maneeca nyeny Juuda na nø tïïe ki gïï mo ec raac ki ge døc, ni tïïe ki gïï mo reyø mo kaala moa tïïc jø Amör na kwøŋ bwödhö maal nyïme, ni nø wëëk jø Juuda tïïc ki raay, ni ge lama juu moe moa no otieŋø,

¹²ka adïëri møn, aani, a na Wuuö Jwøk, Jwø Icriel en, a känna bäät jø Jerucalem ki jø Juuda ki gïn mo leth, ni ŋat wø wïny gïr gø, cwïnye bwøk.

¹³Aani jø Jerucalem jääla jäälö ni tïïa ki gïn mo leth dëëtge kaawat mana tïïa dëët jø Cameria ki jø dhi øt Akap, ni cweera Jerucalem døøc kaawat man wø ö dhaanhnhe ni wø cweer athaa, ni rïëp gø piny.

¹⁴'Ba jiy 'moa moo dööŋ, ge wiia wiiø ni cïba geni ceŋ nyïïmän moge, ni mak geni ki tøŋ, ni tïmge kaamar jammi mo di twierø jï nyïïmän moge bëët,

¹⁵kiper gena bëëdö ni ge tïïya gïï mo nëëni ni reyø ki jïra, ni bëëtge ni ge tïïya aani naa goota ki mana täge ki dïcäŋa ö kwäcge wøk ki Ijep këël dïcäŋi en.»

¹⁶Maya thuwø, Maneeca rem jiy mo thööth mo bäŋ gïn mo ege baaø akøny piny, këël mana ö eni ni pääŋ dï Jerucalem ki remø ki mana täge ki deŋŋe man këël mana pïïe deŋŋe maya; ni gïnögø tïïe ni meede bäät raay moe moa tïïe na wëëk jø Juuda tïïc ki raay, ni tïïya gïï mo nëëni ni reyø ki jï Wuuö Jwøk.

¹⁷'Ba luum tïïe møga moa tïïc Maneeca bëët, ki raay moa tïïe, ogöör piny yi Wëël Luup Nyec Juuda.

¹⁸'Ba Maneeca athøw ni läp køør kwäcge, ni koonyi ya ajïniina mana en buut paare, ni beeye ya ajïniina mar Udha. Ni ö wääde ma Amön ni läw kare na nyeya.

¹⁹'Ba Amön kanya tïme na nyeya, cwiic dööŋö moe pïërariiø kurriiø, ni bëëde ni ena nyeya ki cwiiri ariiø Jerucalem. 'Ba nyeŋ menni beeye Meculëmët nya Arut nyï Jöthba.

²⁰'Ba ena bëëdö ni tïïya gïï mo nëëni ni reyø ki jï Wuuö Jwøk, kaawat moa tïïc wänni ma Maneeca.

²¹Ni bëëde ni caatha uutjïëthe bëët moa caath wänni, ni eni tïnynya gïïa no otieŋø na gïï lam moa tïny wänni, ni wøør geni.

²²'Ba eni Wuuö Jwøk, Jwø kwäcge, awiie, ni bëëde ni eni ba caath køør Wuuö Jwøk.

²³'Ba jø kööre moe atudö ki luubö kipere, ni putge gø 'näk yi øtø mare.

²⁴Køøre jiy bëët moa tudö ki luubö bäät Amön, gena put jø paaci 'näk, ni røønyge wääde ma Jöcaya na nyeya kar gø.

²⁵'Ba luum tïïe møga moa tïïc Amönni, ogöör piny yi Wëël Luup Nyec Juuda.

²⁶'Ba Amön akoony yi bwörö mare, ya ajïniina mar Udha, ni ö wääde ma Jöcaya ni läw kare na nyeya.