Read anuak 2 Nyeye 22 Bible Online

2 Nyeye 22 - anuak bible

2 Nyeye 22

¹'Ba Jöcaya kanya tïme na nyeya, cwiic dööŋö moe abära, ni bëëde ni ena nyeya ki cwiiri ma pïëradäk kurciel yi Jerucalem. 'Ba nyeŋ menni beeye Jedida nya Adaya nyï Böckat.

²'Ba Jöcaya abëëdö ni tïïya gïï mo nëëni ni beyø ki jï Wuuö Jwøk, ni bëëde ni caatha uutjïëthe bëët moa caath kwari ma Deebit, ni käre gaa bäät cwïïc wala bäät caam.

³'Ba kanya tïm cwiic Jöcaya na apaar ka abära bäät nyec, eni Capan wär Adhaliya nyikwaar Meculam, ni wø göör luup akwöma piny, ajääŋŋe yi Øt Wuuö Jwøk ni kööe,

⁴ni «Ci baŋ Kilkiya na näk Kwääy Lam Mana Dwøŋ nee gwel moa no ocïbö yi Øt Wuuö Jwøk, na näk ocooŋ jø wø koor dhi Øt Jwøk baŋ jiy, nee kwaane.

⁵Ni ö gwetøgø ni cïbi ceŋ jø wø raŋ tïïc mar Øt Wuuö Jwøk, ni ö jøøgø ni cïpge gwetøgø jï jø otïïc Øt Wuuö Jwøk, noo cäŋ kwöra no oränynyö ri Øt Wuuö Jwøk dwøk kare,

⁶ni beege dïjëëth opämi, ki jø geer uudi, ki jø wø ŋäc geer ki kïte. Ni ö gwelli møøk ni ŋeei ki jen ki kïte moa no otøø, nee øtø dwøk kare.

⁷'Ba bäŋe gïn manynyu baŋ jøøa cïp gwel ceŋge kiper jöö mana coolge gwel ki gø, kiper tïïc tïïcge tïïö na kare.»

⁸'Ba Kilkiya na näk Kwääy Lam Mana Dwøŋ aköö jï Capan ŋat wø göör luup akwöma piny, ni «Aani wëël ciik Modhe ajooda yi Øt Wuuö Jwøk.» Ni ö eni ni cïp wëël ciik jï Capan, ni ö Capanni ni kwaan gø.

⁹Køøre Capan, ŋat wø göör luup akwöma piny, aduu baŋ nyeya ni caan dwøl jï nyeya ni kööe, ni «Jiy moï gwel moa joot yi Øt Wuuö Jwøk akälge wøk ni cïpge ge jï jø wø raŋ tïï øt Wuuö Jwøk.»

¹⁰Luubö maya thuwø mo ocaan Capanni, ŋat wø göör luup akwöma piny, jï nyeya beeye en, ena köö, ni «Kilkiya acïpö jïra ki wëëlö.» Ni ö eni ni kwaan wëëllögø jï nyeya.

¹¹'Ba kanya ö nyeya na wïny luup moa no ogöörö yi wëëllögø na wëël ciik Modhe enø, abïïe moe aput jeeyø ki pänh cwïny.

¹²Kanyøgønø, nyeya, Kilkiya na näk Kwääy Lam Mana Dwøŋ, ka Akikam o Capan, ki Akbör o Mikaya, ki Capan ŋat wø göör luup akwöma piny, ka Acaaya ŋat köör mare, aput köömmö ni kööe,

¹³ni «Cou pëënynyu dwør Wuuö Jwøk kipera ki jø Juuda bëët kiper luup moa no ogöörö yi wëël ciik man na joot en. Kiper wëër mar Wuuö Jwøk, mano liel bäätø kaamar maac, dwøŋ; kiper kwäyø luup moa en yi wëël ciik man, na no ogöör piny kiperø, kärge wïnynyö, ni kärge kïth bäät tïïc.»

¹⁴Kanyøgønø, Kilkiya na näk Kwääy Lam Mana Dwøŋ, ka Akikam, ki Akbör, ki Capan, ka Acaaya, gena ci ni cäänge ki nyikuŋ Jwøk ma Ulda, nyijø mo bëëdö thääŋ Jerucalem mana nyään. 'Ba Ulda beeye cï Calum o Tikwa nyikwaar Arac, ŋat wø koor abïïk lam.

¹⁵'Ba nyijøøgø aköö jïge, ni «Man beeye mana caan Wuuö Jwøki, Jwø Icriel, ena köö ni caannu jï ŋata jääŋ uuni baŋa,

¹⁶ni Wuuö Jwøk aköö, ni ‹Ka adïëri møn, gïn mo raac kïtha bäät Jerucalem ki bäät jiy mo wø bëëdö yie, ki køør luup bëët moa no ogöörö yi wëëlö mana kwaane, eni na nyeny Juuda.

¹⁷Kiper aana kwierge, ni wääŋge ki jer wø jïcge ŋwääi ni met jï juu møøk ni ge tïïya aani naa goota ki køør tïïe bëët moa temge ki ceŋge. Kiper manøgønø, wëër mara liel bäät paani kaamar maac, ni bëëde ni ba cuŋ.›

¹⁸'Ba wär caannu jï nyeny Juuda na jääŋ uuni kuna pëënynyu Wuuö Jwøk, ni man beeye mana caan Wuuö Jwøki, Jwø Icriel, kiper luupa wïnynyï, ena köö,

¹⁹ni ‹Kiper mana päth cwïnyï ni dwøgï dëërï piny nyïma kanya wïnynyï luup 'moa mo jääla Jerucalem ki ge ki jø wø bëëdö yie, ni ge tïmö ni gena jøw mo cwïny pädhö ki gïrge ni geno nipäät, ni jeeyï abïïgï ki pänh cwïny, ni jwöŋï nyïma, ka adïëri møn, a na Wuuö Jwøk, oduuru marï awïnynya.

²⁰'Ba kiper manøgønø, ï thøw ni läpï køør kwäyu ni paac poot beer, ni koony ïïni yi bwörö marï. Japa reyø bëët moo käla bäät paani ba jootï ki waŋï.› » Køøre, jøøa jääŋŋi gena døøk ni caange luubö manøgø jï nyeya.