Read anuak 2 Nyeye 24 Bible Online

2 Nyeye 24 - anuak bible

2 Nyeye 24

¹'Ba ki yïth nïne moa beet Jeyöakëmmi ni ena nyeya, Nabukedenecör nyeny Babiløn amäänynyö baŋe; ni ö Jeyöakëmmi ni tïme ni bëënna eni ki cwiiri adäk. Køøre Jeyöakëm acaara mare awiile, ni gëëme ki Nabukedenecör.

²'Ba Wuuö Jwøk dïtwïëte mo jø Babiløn, ki mo jø Aram, ki mo jø Möap, ki mo jø Amön, ajääŋŋe baŋ Jeyöakëm, ni ge jääŋŋe kaper nee mïëc Juuda raanyge, ki køør dwøre mana caane ki dhøk jiye ma nyïïkuk Jwøk.

³Ka adïëri møn, nee ge daae buute, gïïögø aput tägö dëët jø Juuda ki køør dwøre, e na Wuuö Jwøk, kiper raay bëët moa tïïc nyeya ma Maneeca,

⁴këël rep jiy thuwø moa näk bäŋ gïn mo ege baaø na køny piny, na pääŋ dï Jerucalem ki remge. 'Ba Wuuö Jwøk yie käre warø.

⁵'Ba luum tïïe møga moa tïïc Jeyöakëmmi ogöör piny yi Wëël Luup Nyec Juuda.

⁶'Ba Jeyöakëm athøw ni läp køør kwäcge, ni ö wääde ma Jöakin ni läw kar gø na nyeya.

⁷'Ba nyeny Ijep kär cäŋ määnynyö wøk këët ki yïth ŋøøpe, kiper nyeny Babiløn ŋøøm moa no omak nyeny Ijep bëët ee nø mak, ki mana täge ki bäät waŋ Naam Ijep këël mana këët bäät Naam Upareeti.

⁸'Ba Jöakin kanya tïme na nyeya, cwiic dööŋö moe apaar ka abära, ni bëëde ni ena nyeya ki dwäde adäk yi Jerucalem. 'Ba nyeŋ menni beeye Neucta nyi Elnathan nyï Jerucalem.

⁹'Ba ena bëëdö ni tïïya gïï mo nëëni ni reyø ki jï Wuuö Jwøk, kaawat moa tïïc wänni.

¹⁰'Ba kar kaaca beeye kanya ö kwääc jø leny mo Nabukedenecör nyeny Babiløn na cige Jerucalem na cielge gø dïër.

¹¹Køøre Nabukedenecör nyeny Babiløn aö Jerucalem kanya bëët kwääc jø leny moe ni ge ciela pääny dïër.

¹²Ni ö Jöakin nyeny Juuda ni cïp cere jï nyeny Babiløn, eni ki menni, ki jø kööre moe, ki kwääc jø leny moe, ki jiy moe moa kwörge døøŋŋø, ni puti ya nyeny Babiløn mak ki tøŋ ri bäc cwiiri moa beet nyeny Babiløn ni ena nyeya.

¹³Ni ö nyeny Babilønni ni käl jammi moa perge leth bëët kaace moa no okanø yi Øt Wuuö Jwøk, ki moa no okanø yi øt nyeya, ni ŋør jap paac bëët moa näk tïïc ka warkey na tïïc Cølömanni nyeny Icriel yi Øt Wuuö Jwøk. 'Ba gïïögø atägö kaawat mana caan Wuuö Jwøki.

¹⁴Ni ö eni thuwø ni käl jø Jerucalem bëët, ni beege kwääc jø leny bëët, ki jø mo kwörge døøŋŋø bëët, ki rëëmme bëët, ni bäŋe jiy mo ee wiiø; ni jøøgø bëët jïtö ki kar kume apaar; 'ba beege jøøa can døc keerge na bëëdö yi ŋöömmögø na wiie.

¹⁵'Ba Jöakin käle ka menni na aciel, ki määre, ki jiy moe moa kwörge døøŋŋø, ki dïbwöthe mo wø käär paac, ni ge käle Jerucalem ni kïth ge Babiløn.

¹⁶Ni ö jø lenynyi bëët moa teek ma kume abïriiø, ki rëëmme ma kuma aciel, ki jiy bëët moa teek na näk orømø ki leny ni kïth ge Babiløn.

¹⁷Køøre nyeny Babiløn Mataniya cöök wää Jöakin arøønye na nyeya kar Jöakin, ni wiil nyeŋ gø ni Cëdëkiya.

¹⁸'Ba Cëdëkiya kanya tïme na nyeya, cwiic dööŋö moe pïërariiø kurciel, ni bëëde ni ena nyeya ki cwiiri apaar kurciel yi Jerucalem. 'Ba nyeŋ menni beeye Amutal nyi Jeremaya nyï Libana.

¹⁹'Ba ena bëëdö ni tïïya gïï mo nëëni ni reyø ki jï Wuuö Jwøk, kaawat moa tïïc Jeyöakëmmi.

²⁰'Ba ka adïëri møn, ki køør gïïa reyø moa tïïc jø wø bëëdö Jerucalem ki dï Juuda bäre, Wuuö Jwøk awëër ki geni ni riem geni wøk nyïme. 'Ba Cëdëkiya agëëmö ki nyeny Babiløn.