Read anuak 2 Nyeye 25 Bible Online

2 Nyeye 25 - anuak bible

2 Nyeye 25

¹'Ba kanya tïme na ri bïŋweer cwiiri moa beede ni ena nyeya, kanya tïm nïr dwää apaar na apaar, Nabukedenecör nyeny Babiløn ki jø leny moe bëët aö töök Jerucalem, ni tïïe ki twïër töök gø, ni tïïc kwör koor töök gø bäre.

²Ni bëët päänynyi no ociel dïër këël mana këët ri cwiiri apaar kurciel moa beet Cëdëkiya ni ena nyeya.

³'Ba yi cwiinøgø, kanya tïm nïr dwää aŋweenni na abïŋween, käc atïmö ni dwøŋ døc yi pääny, ni tïme ni bäŋ cam jï jiy.

⁴Køøre, kiir mar pääny atuc jø Babilønni. Ni ö jø lenynyi bëët mo Juuda ni bwøkge ki wäär ni ge cøra dhi kiir mana en yïthakic kiiri moa na ariiø na en buut ajïniin nyeya, këël na bëëde ni jø Babiløn pääny ege ciel dïër bäre. Ni aacge ni ge coonya goor Jördan ni wø cwøl na Araaba.

⁵'Ba jø leny mo jø Babiløn aläp køør nyeya ma Cëdëkiya, ni maage gø pwöl Jerikö, ni keeth jø lenynyi moe bëët buute.

⁶Køøre ena makge ni kälge eni Ribala baŋ nyeny Babiløn, ni ö nyeny Babilønni ni ŋut bäät gø ki luubö.

⁷Ni ŋarge wäät Cëdëkiya ni nëënö jï Cëdëkiya; ni tuunyge nyeŋ Cëdëkiya, ni twöcge gø ko oguudi ma jwëëlli, ni kïthge gø Babiløn.

⁸'Ba kanya tïme na ri cwiiri apaar ka abïŋween moa beet Nabukedenecörri ni ena nyeny Babiløn, kanya tïm nïr dwää abïïc na abïriiø, Nabucaradan kwääy jø koor, mo tïïö tier nyeny Babiløn, aö Jerucalem.

⁹Ni waaŋ Øt Wuuö Jwøk, ki paan dwøŋ mar nyeya, ki uudi moa en Jerucalem bëët; këël uudi moa døøŋŋø bëët awaaŋe thuwø.

¹⁰Ni ö jø lenynyi bëët mo jø Babiløn moa käär kwääy jø koorri ni toorge kiir Jerucalem piny.

¹¹Ni ö jiyi moa no odööŋ yi pääny, ki jiy moa cïp ceŋge jï nyeny Babiløn, ki jiy moa thööth na en yi ŋöömmögø bëët ni käli ya Nabucaradan kwääy jø koor ni maae ka tøŋ.

¹²'Ba kwääy jø koor, jiy møøk moa can døc na en yi ŋöömmögø awiie na jø piith omøki na jø puur pwöth.

¹³'Ba jammi moa näk tïïc ka nywïënyö ma jwïël na en yi øt Wuuö Jwøk, ni beege gïïa näk caala dïkweeye, ki jïëthe mo wø käär pïï ki geni, ki gïr pïï mana dwøŋ, atøc jø lenynyi mo Babiløn na thäŋi ni kïthge nywïëny moøgø na jwëëlli yøø Babiløn.

¹⁴Ni kälge jammi moa näk tïïc ka nywïënyö ma jwïël, ni beege athääe, ka akaape, ki gïï wø näk mäc lambae ki geni, ka apät, ki jap paac møga bëët mo wø tïïö ki geni Øt Wuuö Jwøk.

¹⁵'Ba kwääy jø koor thuwø, athääe mo wø käär mäc ki geni ki kuure moa näk tïïc ka warkey mo tøŋ ki moa näk tïïc ki gwel-bïrö mo tøŋ akäle.

¹⁶'Ba gïïa na ariiø na näk caala dïkweeye, ki gïr pïï mana dwøŋ, ki jïëthe mo wø käär pïï ki geni moa tïïc Cølömanni kiper Øt Wuuö Jwøk, peek nywïënyö mana näk jwïël mana tïïc geni bëët ki gø ba løny ki røm.

¹⁷'Ba bär mar gïïögø ni caal dïkweeye yøø, man nø beeye gööye apaar ka abära, ni gïr mïërö mana näk tïïc ka nywïënyö ma jwïël ocïp bääte. 'Ba bär mar gïr mïërö manøgø beeye gööye adäk, ni gïna näk caala tiimme ki nyïïadïkwäle mo tïïc ka nywïënyö ma jwïël owïr deŋ gïr mïërö manøgø bäre. 'Ba riet gïr mïërö mana näk caala dïkweeri otïïö ni caala manøgø thuwø.

¹⁸'Ba kwääy jø koor, Ceraya na näk Kwääy Lam Mana Dwøŋ, ki Jepaniya dïlämi mana en køøre, ki jiy adäk moa koor dhi Øt Wuuö Jwøk amaae ki tøŋ.

¹⁹Ni ö eni ni mak ŋat köör aciel man wø raŋ jø leny, ki jiy abïïc mo wø køny nyeya ka acaare moa joot yi pääny, ki ŋat wø gööt piny ki luup jï kwääy lwaa leny man wø kïth jiy yi dëëc paanøgø, ki jø paanøgø ma pïërabïciel moa joot yi päänyögø.

²⁰Ni ö Nabucaradanni kwääy jø koor ni lwør jøøgø ni kïth geni Ribala baŋ nyeny Babiløn.

²¹Køøre nyeny Babiløn jøøgø anääe Ribala, päänya en yi ŋööm Amath. Manøgø beeye jöö mana ö jø Juuda ni käl ge yi ŋöömö marge ni ge mak ki tøŋ.

²²'Ba Nabukedenecör nyeny Babiløn, Gedaliya wär Akikam nyikwaar Capan atïïe na wïth jiy moa wiie yi ŋööm jø Juuda.

²³'Ba kanya ö kwääc jø leny mo jø Juuda moa näk ceŋge kärge cïbö, ki jiy moge, na wïnyge gø ni Gedaliya anø røøny nyeny Babilønni na wïth jiy, gena ö Micpa baŋ Gedaliya, ni kwääc jø leny moa öö beege Icmiel o Nethaniya, ki Jöanan o Karëa, ki Ceraya o Tanumët nyï Nethöpa, ki Jaadhania o nyï Maika.

²⁴Køøre Gedaliya akööŋ jïge ki jicge ni kööe jïge, ni «Käru lwäyö ki jø kööre mo jø Babiløn. 'Ba bëëdu yi ŋöömö man, ni tïnynyu nyeny Babiløn; køøre bëëtö maru tïmö ni beer.»

²⁵'Ba na tïme na dwää abïriiø, Icmiel o Nethaniya nyikwaar Elicama na käl ri jø dhi øt nyec, aöö ki jiy apaar ni cwøp Gedaliya piny ni näk gø ki jø Juuda ki jø Babiløn moa bëëdö ki eni Micpa.

²⁶Køøre jø Juuda bëët moa kwörge therø ki moa kwörge døøŋŋø ki kwääc jø leny aö maal ni cige Ijep, kiper gena lwäyö ki jø Babiløn.

²⁷'Ba kanya tïm cwiiri na pïëradäk ka abïriiø moa mak Jöakin nyeny Juuda ki tøŋ yie na kïthi Babiløn, kanya tïm nïr dwää apaar kurriiø ni pïërariiø ka abïriiø, Ëwil-Merödak nyeny Babiløn Jöakin nyeny Juuda apäde. 'Ba gïnögø atïïe yi cwiina tïme yie ni ena nyeya.

²⁸Ni cääne ki luubö mo beer ki gø, ni tïïc wälu mare ni pöödha eni ki mo nyeye møga moa bëëdö ki eni Babiløn.

²⁹'Ba Jöakin abïïe moa en dëëre øt twöc awiile, ni bëëde ni cämö buut nyeya cooth ki ki yïth nïr kwøw moe bëët,

³⁰ni bëët cammi mare mar yi cäŋ cooth ni cïpa nyeya jïre ki yïth nïr kwøw moe bëët.