Read anuak 2 Nyeye 3 Bible Online

2 Nyeye 3 - anuak bible

2 Nyeye 3

¹'Ba kanya tïme na ri cwiiri apaar ka abära moa beet Jøcapat ni ena nyeny Juuda, Jeyöram wär Akap atïmö na nyeya bäät jø Icriel Cameria, ni bëëde ki cwiiri apaar kurriiø ni ena nyeya.

²'Ba Jöram abëëdö ni tïïya gïï mo nëëni ni reyø ki jï Wuuö Jwøk; 'ba eni rääö mare ba caal rääö mar wänni ki menni, kiper eni kïdi mana cwöth wänni piny jï jwø wø cwøl ni Baal araanynye.

³'Ba ena bëëdö ni cwïnye onieŋ køør raay moa tïïc Jeröbämmi o Nebat na wëëk jø Icriel tïïc ki raay, ni käre raayøgø wiiø.

⁴'Ba Mëca nyeny Möap beeye ŋat ma dïpïïth dïëk, ni eni wø cïpö jï nyeny Icriel ki nyïï rööm ma kume ma dïpa, ki jïëc nyöök rööm ma kume ma dïpa.

⁵'Ba kanya ö Akapi na thøøe, nyeny Möap ena këëyö ni ö maal bäät nyeny Icriel.

⁶'Ba kar kaaca, nyeya ma Jeyöram aci wøk ki yi Cameria ni cooŋ jø leny mo jø Icriel bëët.

⁷'Ba kanya cøøe, ena jäägö ki dwøl jï Jøcapat nyeny Juuda ni kööe, ni «Nyeny Möap anø gëëmö ki aani. Waa cøø baŋ leny nøø këëdø ki jø Möap.» 'Ba Jøcapat aköö jï nyeny Icriel, ni «Wøp; aani ki jiya ko okwëënyi 'moa wa cøø kaawat mano ciï ki jiyï ko okwëënyi moï.»

⁸'Ba Jøcapat apëëö, na «?A øtjöö mane noo cørø yie kanyo cøø baŋ leny?» Ni løgi ya Jeyörammi, ni «Beeye waŋjöö man wø cør dï paap Ëdöm.»

⁹Køøre nyeny Icriel gena aay ki nyeny Juuda ki nyeny Ëdöm. Ni cääthge ni ge wïra piny ki nïne abïriiø; ni tïme ni bäŋ pïï kiper jø leny ki lääc paac moa cäädhö ki geni.

¹⁰'Ba nyeny Icriel aköö, ni «Wui, aŋø! Wuuö Jwøk ø na nyeye moi na adäk ii ø cwøle kaper nee ø cïp ceŋ jø Möap!»

¹¹'Ba Jøcapat aköö, na «?Aŋø, bäŋ nyikuŋ Wuuö Jwøk mo ena kany mo pëënynyø dwør Wuuö Jwøk ki gø?» 'Ba aløk dhaanhø acielli røk jø kööre mo nyeny Icriel ni kööe, ni «Ilaaca o Capath ena kany, ŋata wara bëëdö buut Ilaaja ni tïnynya gø.»

¹²Ni put Jøcapati köö, ni «Dwør Wuuö Jwøk ena bääte.» Ni ö nyeny Icriel ki Jøcapat ki nyeny Ëdöm ni løøcge piny baŋe.

¹³'Ba Ilaaca aköö jï nyeny Icriel, ni «?Ï manynyï ŋø baŋa? Ci baŋ nyïïkuk jwøk mo jwø wäru ki nyïïkuk jwøk mo jwø meru.» 'Ba nyeny Icriel aköö jïre, ni «Jïre bäär; kiper beeye Wuuö Jwøk na cwøl waani, wa na nyeye moi na adäk ii, nee wa cïp ceŋ jø Möap.»

¹⁴'Ba Ilaaca aköö, ni «Ŋëët Wuuö Jwøk, Jwøa kwøw, eni na wïth jammi bëët ni wø tïnynya, doo na paa per Jøcapat nyeny Juuda, aani jïrï ba daa raŋø. Jïrï ba daa neenø na bäre bäre.

¹⁵'Ba ennø, kännu ki ŋat mo pöödö ki thoom othïënhö.» 'Ba kanya ö ŋatøgø na ööe na pwöt thoom, teek mar Wuuö Jwøk aput ö bäät Ilaaca.

¹⁶Ni kööe, ni «Man beeye dwør Wuuö Jwøk, ena köö, ni ‹Pääŋ yi gool man ka aguule.›

¹⁷Kiper Wuuö Jwøk aköö, ni ‹Bäŋ jamø ki køth mo jootu, 'ba yi gool man tïmö ni päŋ ki pïï; ni mädhu yïthge, u ki dhäk mou ki lääc paac mou.›

¹⁸'Ba manøgø beeye gïn mo jööt jaak ki jï Wuuö Jwøk ki man tïïc gø. 'Ba eni thuwø, jø Möap cïbe ceŋŋu.

¹⁹Ni nyagu päänye bëët moa no ogeerø ni teek, ki päänye bëët moa beyø; ni ŋødu jenni piny bëët moa beyø, ni dïïrru dhøk jøør bëët, ni lëëŋŋu yïth pwöth bëët moa beyø ki kïte, nou raanynya ge.»

²⁰'Ba kanya tïme na amöölla, yi caan wø cïp olämi yie, ka adïëri møn, pïï aput mullö ki waŋjöör Ëdöm, ni ö pinynyi ni put nimata ki pïï.

²¹'Ba awïny jø Möapi bëët ni nyeye moøgø na adäk yøø, gena ö baŋ leny nee këëtge ki geni. Ni ö jø Möapi ni cwølge jiy bëët moa näk løny jïge ki man käärge jap leny, ki mana täge ko obwöre këël mana këët ri jø døøŋŋø, ni kïth geni waŋkeew.

²²'Ba kanya ö jø Möapi na pänyge maal ka amöölla cøøn, däär cäŋ ajootge no orieny bäät pïï. Ni jootge pïï nyïmge ni nëëni ni kwaar kaamar remø.

²³Ni köge, ni «Manece beeye remø; ka adïëri møn, nyeye moa na adäk gena nø këëdö ki dëëtge keerge, ni nø ö ŋati man nø ni 'näk watge. 'Ba ennø, ø na jø Möap en, waa cøø kuna twierø japge!»

²⁴'Ba kanya pïïcge twïër mar jø Icriel, jø Icriel gena put ö maal ni 'näkge jø Möap, ni ö jø Möapi ni putge bwøk nyïmge. Ni ö jø Icrielli ni riemge jø Möap këël mana pïïcge yïth ŋøøp jø Möap ni jø Möap nääŋge nääŋŋö.

²⁵Ni putge päänye nyak; ni ö ŋati man nø ni lëëŋ yi pwödhö mana beer man nø ki kïdi, ni putge pwöth pääŋ ki kïte. Ni dïïrge dhøk jøør bëët, ni ŋøtge jenni piny bëët moa beyø. 'Ba kiir mar pääny Kir-Ërë na no ogeerø ki kïte beeye na dhäthö jïge keere. 'Ba jiy mo wø thöödhö ki kïte, ni ge thöödhö ko ojøye mo kaae, gena cøø ni cielge päänyögø dïër ni tukge gø.

²⁶'Ba kanya ö nyeny Möapi na joot gø ni leny teek ni ba løny jïre, ena lwötö ki jø leny ma dïpe abïriiø mo wø këëdi ko opëëlle nee jäpge ki jöö kiper nee pïïcge jï løøa en nyeny Ëdömmi yie; 'ba kär løny jïge.

²⁷Kanyøgønø, eni wääde mana dwøŋ na doo läw kar gø na nyeya alwøre ni cïp gø no olämi bäät kiir. Køøre jø Icriel gena lwäyö døc ki gïna tïïe, ni aacge buute ni døøge poge.