Read anuak 2 Nyeye 5 Bible Online

2 Nyeye 5 - anuak bible

2 Nyeye 5

¹'Ba Neeman mana bëëdö na kwääy lwaa leny mar nyeny Aram beeye ŋat mo kare dwøŋ døc nyïm nyeya mare, ni eno wøørø døc, kiper beeye eni na ö Wuuö Jwøki na tïïc jø Aram nee kääthge ki køøre; ni eni thuwø beeye ŋat leny mo teek. 'Ba eni dëëre da dhøøbø.[3]

²Kanyøgø jø leny mo jø Aram gena aa wøk baŋ twëër, ni cige yïth ŋøøp jø Icriel ni peecge nyilaar dhaagø ma nyakøø, ni ö nyakøønnøgø ni bëëde ni tïnynya cï Neeman.

³'Ba nyakøønnøgø aköö jï nyijøøa tïnynye, ni «Doo na kwäärö mara ma Neeman oci ban nyikuŋ Jwøk mana en Cameria, eni dëëre doo dwøk nyikuŋ Jwøki kare ki dhøøbø manø ni en dëëre enø.»

⁴Køøre Neeman aci baŋ nyeny Aram na bëënne, ni caan gïna caan nyakøønna käli ki yïth ŋøøp jø Icriel jïre.

⁵'Ba nyeny Aram aköö, ni «Wøp, cii nø; 'ba aani a jääga cerï ki wëëlö nee kïthï baŋ nyeny Icriel.» Køøre Neeman aay ni käädö ki gwet-bïrö mo peek mare beeye rumme apaar mo røm ka rumi mana cwøl ni kikar, [4] ki warkey mo peek mare beeye rumme ma kume abïciel mo røm ka rumi mana cwøl ni cekel, [5] ka abïïe apaar mo beyø mo wø røø dëël.

⁶Køøre Neeman wëëlö akïth baŋ nyeny Icriel. 'Ba luubö mana no ogöörö yi wëëlö beeye en: «Wëëlö man ajääŋŋa baŋï kiper nee dhaanhnha ma Neeman dëëre dwøgi kare ki dhøøbø manø ni en dëëre enø.»

⁷'Ba kanya ö nyeny Icrielli na kwaan wëëlö, abïïe moe aput jeeyø ki pänh cwïny, ni kööe, na «?Aŋø, aana Jwøk? ?Løny jïra ki man nääa dhaanhø ni cäŋa gø tïïyö nee kwøe, na ö nyeni na jääŋ baŋa ki dwøl nee dhaanhø mo dëëre da dhøøbø dwøga kare en? Neennu, nyenøgø kämö.»

⁸'Ba kanya ö nyikuŋ Jwøki ma Ilaaca na wïny gø ni nyeny Icriel abïïe moe ajeeye, ena jääk baŋ gø ki dwøl ni kööe, na «?Aperŋø na jeeyï abïïe moï? Ennø, wec eni nee ö baŋa, nee put ŋäc ni da nyikuŋ Jwøk Icriel.»

⁹Køøre Neeman aput öö ko okwëënyi moe ki jïëthe moe mo wø tut okwëënyi, ni cuŋŋe deŋ dhi øtø mar Ilaaca.

¹⁰Ni ö Ilaaca ni jääk baŋe ki dhaanhø nee kööe, ni «Ciï ni lwøgï dëërï yi Naam Jördan kwöre abïriiø; køøre dëërï odøø kare ni tïm dëërï ni waany.»

¹¹'Ba Neeman agootø døc, ni put aay ni kööe, ni «Ka adïëri møn, aana cädö cøøn ni eni ki dëëre kiree doo ööa wøk baŋa, ni dee cuŋŋö ni dee nyeŋ Wuuö Jwøk cwølø, na näk Jwøk mare, ni dee kwöra leth kwadhø ki cere ni dwøga dëëra kare ki täw dhøøbø.

¹²?Aŋø, ba beyø pï Abana ki Parpar, näp Damacka, ni kaala pï näp Icriel bëët? ?Aŋø, ba doo løny jïra ki mana daa lwøk yïthge ni di dëëra døø kare ni waany?» Kanyøgø ree aput løk ni aae ni eno gootø døc.

¹³Køøre jø tïïc moe aö buute ni cäänge ki eni ni köge, na «?Awuuö, doo na nyikuŋ Jwøk caana gïn mo dwøŋ jïrï kiper nee tïïyï, ba diï tïïö cøøn? Tugi ki nyi man ni caane jïrï en, ni ‹Ci lwøgï nee dëërï døø kare ni waany.› »

¹⁴Kanyøgø ena put ci yi Naam Jördan ni rønye kwöre abïriiø kaawat mana caan nyikuŋ Jwøki, ni ö dëëre ni put døø kare, ni tïm dëëre kaamar dëër nyilaal mo poot thiinh, ni ö dëëre ni put tïmö ni waany.

¹⁵'Ba kanya ö Neemanni ki jiye bëët na duuge baŋ nyikuŋ Jwøk, Neeman acøø ni cuŋŋe nyïme ni kööe, ni «Ka adïëri møn, ennø, aputa ŋäc ni bäŋ Jwøk bäät piny bäre, 'ba beeye Jwø Icriel keere. 'Ba ennø, beerra man lwørï muuce moo cïba jïrï, a na dhaanhnhï en.»

¹⁶'Ba nyikuŋ Jwøk aköö, ni «Ŋëët Wuuö Jwøk Jwøa kwøw ni wø tïnynya, aani, bäŋ gïrpiny mo lwøra.» Ni ö eni ni kwaac gø døc nee lwøre, 'ba ena kweer.

¹⁷Køøre Neeman aköö, ni «Ni näk mo bäŋ gïn lwørï baŋa nø, beerra man mooc aani, a na dhaanhnhï en, ki ŋøøm mo käära gääŋŋe ariiø, [6] kiper a na dhaanhnhï en, a ba cïpi ko olämme mo wø waaŋ bäre ko olämme møga jï juu møøk këët; 'ba beeye jï Wuuö Jwøk keere noo cïpa jïre.

¹⁸'Ba beerra man ö Wuuö Jwøki ni wëën aani, a na dhaanhnhï en, kiper gïrpiny aciel man; ni beeye ni kany wø cääthwa ki nyenynya na aciel ni eni cøøa baŋ lam yi øt Rimön, jwø jø Aram, kany wø kuul wïïe piny ni eni yaa maaø naa jøla gø, wø putwa wïthwa kuul piny na aciel, beerra man ö Wuuö Jwøki ni wëën aani, a na dhaanhnhï en.»

¹⁹Køøre Ilaaca aköö jï gø, ni «Ciï nø ki jööt dëël.» 'Ba kanya tïŋ Neemanni buute, na cääthe ki kany mo bäär mëëth,

²⁰Gaadhi ŋat tïïc mar nyikuŋ Jwøk ma Ilaaca acätö ni kööe, ni «Ka adïëri møn, kwäärö mara, Neeman nyï Aram awiie jaak ni aae, ni bäŋ gïn mo ee kälö baŋ gø røk gïïa ööe ki ge. Ŋëët Wuuö Jwøk Jwøa kwøw, aani a reŋŋa køøre naa käda baŋe ki gïrpiny.»

²¹Kanyøgø Gaadhi aput läp køør Neeman. 'Ba kanya ö Neemanni na joot ŋat mo rïïŋö køøre, ena ïnh piny ki yi jääy man wø tut okwëënyi nee røømge ki Gaadhi, ni kööe, ni «?Da gïn mo otägö?»

²²'Ba aløøe, ni «Bäŋ gïn mo otägö. 'Ba kwäärö mara aana jääŋŋe baŋï ni kööe, ni ‹Kawaane waane en, jiy ariiø mo poot na wøpe mo ena røk lwaa nyïïkuk Jwøk moa therø gena nø ö baŋa ni ge käla paana en bäät kïte na näk kur jø tuuŋ Ipariem. Ennø, beerra man cïpï jïge ki gwel-bïrö ma kikar aciel ka abïïe ariiø mo beyø mo wø røø dëël.› »

²³'Ba Neeman aköö, ni «Ba løny. Beerra man kädï ki gwel-bïrö ma kikarri ariiø.» Ni kwaac Gaadhi kiper nee lwøre, ni kïth gwet-bïrö moøgø na kikarri ariiø yøø yïth opïri ariiø ka abïïe ariiø, ni cïp ge jï jiy ariiø røk jø tïïc moe, ni käärge ge nyïme.

²⁴'Ba kanya pïïe bäät thuur, gïïögø alwøre ceŋ jø tïïc moøgø ni kïth ge yi øtø, ni wëëk jøøgø wääth ni aacge.

²⁵'Ba køøre ena ci baŋ kwäärö mare ma Ilaaca ni cuŋŋe nyïme. 'Ba Ilaaca aköö jïre, ni «?Gaadhi, ïïno cøøa kaa ŋø?» Ni løk gø, ni «A na dhaanhnhï en, bäŋ kany mo aano ci yie.»

²⁶Ni kö Ilaaca jïre, na «?Aŋø, kuua kanya ïnh ŋatece piny ki yi jääy mare man wø tut okwëënyi nee røømme ki ïïni? ?Aŋø, kar kany ennø beeye kany mo løny ki man kädï ki gwel, ka abïïe, ki pwöth jenni mo wø nyïïe wel na maaw, ki pwöth omøki, ki dïëk, ki dhäk, ki laaŋe ma cwøw ki ma mään?

²⁷'Ba ennø, dhøøbø mana en dëër Neeman ööa dëërï ni neegän dëërï ki dëët jiy moo käl dëërï na bäre bäre.» Køøre Gaadhi aput aay buut Ilaaca, ni ö dëëre ni put jïtö ki dhøøbø, ni neepwøth ni tar.