Read anuak 2 Nyeye 7 Bible Online

2 Nyeye 7 - anuak bible

2 Nyeye 7

¹'Ba Ilaaca aköö, ni «Wïnynyu dwør Wuuö Jwøk; Wuuö Jwøk aköö, ni ‹Diøø kar kany nø, yi rumi aciel mar møø mo pøøth gäte tïmö na gwel-bïrö aciel keere, ni møk gäbci[8] ma yïth rumme ariiø gäte tïmö na gwel-bïrö aciel thuwø, dhi kiir Cameria.› »

²'Ba aløk ŋat wø cäädhi ki nyeya jï nyikuŋ Jwøk ma Ilaaca ni kööe, ni «?Gïnögø ba tägi na bäre. ?Aŋø, Wuuö Jwøk, da dha awëërnyeŋ mo jabe jabø maal mo cam öö ki yi gø?» Ni løgi ya Ilaaca ni kööe, ni «Ka adïëri møn, jootï joodø ki waŋï, 'ba bäŋ gïn mo camï camø ri gø.»

³'Ba da jak ma aŋween mo dëëtge da dhøøbø[9] mo ge bëëdö dhi kiir; køøre gena cäänö yïthakicge keerge ni köge, ni «?Ø bëënnø ŋø kany? ?Ø koora thøø?

⁴Ni näk mo ø köö ni ø cøøa yi kiir, da käc yie; ø puta thøø kaace. Ni näk mo ø bëëdö kany, ø thøw thuwø. 'Ba ennø, ööu waa cøø kuna cïbø ceŋŋø twïër mar jø Aram. Ni näk mo ø ba 'näkge, ø bëëdö ni ø kwøw; ni näk ø 'näkge nääö, ø poot doo thøw cøøn thuwø.»

⁵'Ba jagøgø gena tïŋŋö kanya tïme na wïthïënhö ni cige twïër mar jø Aram. 'Ba kanya pïïcge deŋ twïër, ka adïëri møn, bäŋ dhaanhø aciel kaace.

⁶Kiper jø Aram onø tïïc Wuuö Jwøki nee dööt tiet okwëënyi ki mo jïëth leny mo wø tut okwëënyi wïnyge, ni beege dööt tiet jø lwaa leny mo päl; ni ö geni ni cäänge yïthakicge keerge ni köge, ni «Ka adïëri møn, nyeny Icriel, nyeny Këth ki nyeny Ijep ee nø ŋeew nee öge baŋø baŋ leny.»

⁷Ni putge ö maal ki wïthïënhö ni reŋge, ni wiige oduŋkaare moge piny, ko okwëënyi, ka arëëni; këël jammi moa en yi twïër aputge wii piny na karge, ni reŋge ni ge gwøga jwïëcge.

⁸'Ba kanya ö jaga näk dëëtge da dhøøbø na pïïcge deŋ twïër, gena put døny yo oduŋkaara mana cwöpge ki gø, ni cämge ni mäthge, ni kätge yi gø ki gwel-bïrö ki warkey ka abïïe, ni aacge ni kange geni; ni duuge ni dønyge yo oduŋkaara mør ni kätge kaace thuwø, ni aacge ni kange geni.

⁹'Ba gena cäänö yïthakicge keerge, ni «Gïn ni tïïø en patha kare. Dïcäŋi beeye dïcäŋ caan waac mo met yie, 'ba ø bëëdö ni ø lïŋö jaak. Ni näk mo ø bëëdö jaak këël diøø ka amöölla, da ajäla mo pïï bäätø. 'Ba ennø, beerra man cøø ni caanø gïna tägö jï jø paan dwøŋ.»

¹⁰Kanyøgønø, gena öö ni cwølge jø wø koor dhi kiir mar pääny, ni caange gø jï jøøgø, ni köge, ni «Waana ci yi twïër mar jø Aram. 'Ba ka adïëri møn, bäŋ dhaanhø aciel mo ena kaace, këël dwør dhaanhø kiree bäŋgø mo wïnyi; 'ba beege okwëënyi ka arëëni mo twöö piny keerge, no oduŋkaare bëëdö karge.»

¹¹Køøre jø wø koor dhi kiir gena rwääyö ni caani jï jø paan dwøŋ.

¹²'Ba nyeya aö maal ki dï wäär ni caan gø jï jø kööre moe ni kööe, ni «Ennø, gïn tïïc jø Arammi dëëtø en caana caanø jïïu. Geni ŋäcge ni øøno 'näk käci; kiper manøgø nø, gena aay twïër marge ni kange dëëtge yi pwöla, ni köge, ni ‹Kanyo ö jø Icrielli wøk ki yi pääny, ge putø ka mak ni dønynyø yi pääny marge.› »

¹³'Ba ŋat köör mare aciel aköö, ni «Beerra man ö jiyi møøk røø ni lwötge ko okwëënyi abïïc røk moa no odööŋ yi pääny. ?Aŋø, thøø marge ba caal mar jø Icriel moi ni thööth ii no odööŋ kany ni ge koora thøø en? Beerra man jäägø ki jiy nee gïnögø joot.»

¹⁴Køøre gena jëëdö ki jiy, ni ö nyeya ni jääŋ geni ki jïëth leny ariiø mo wø tut okwëënyi, ni ge jääŋŋe køør jø leny mo jø Aram, ni caan gø jïge, ni «Cou ni neennu gïna näk mo otägö.»

¹⁵Køøre gena ci køør jø Aram këël mana pïïcge bäät Naam Jördan; 'ba ka adïëri møn, waŋjöö bäre bëëdö ni päŋ ka abïïe ki jap leny moa leeŋ jø Arammi piny kanya reŋge. Køøre jøøa jääŋŋi gena duuö ni caange gïna jootge jï nyeya.

¹⁶Kanyøgønø, jiy aput cøø ni twierge twïër mar jø Aram. Ni ö yi rumi aciel mar møø mana pøøth ni put gäte tïmö na gwel-bïrö aciel, ni ö yïth rumme ariiø mar møk gäbci[10] ni put gäte tïmö na gwel-bïrö aciel thuwø, ki køør dwøl mana caan Wuuö Jwøki.

¹⁷'Ba ŋat wø cäädhi ki nyeya atïïc nyeya nee dhi kiir koore; 'ba ŋatøgø aput jiyi nyørø dhi kiir, ni put thøø kaawat mana caani ya nyikuŋ Jwøki kanya ö nyeya na ö baŋe.

¹⁸'Ba gïnögø atägö kaawat mana caani ya nyikuŋ Jwøki jï nyeya na kööe, ni «Diøø kar kany nø, yi rumi aciel mar møø mo pøøth gäte tïmö na gwel-bïrö aciel, ni møk gäbci ma yïth rumme ariiø gäte tïmö na gwel-bïrö aciel thuwø dhi kiir Cameria.»

¹⁹Kar kaaca ŋata cäädhö ki nyeya aköö jï nyikuŋ Jwøk ma Ilaaca, ni «Gïnögø ba tägi na bäre. ?Aŋø, Wuuö Jwøk, da dha awëërnyeŋ mo jabe jabø maal mo cam öö ki yi gø?» Ni løgi ya Ilaaca, ni «Ka adïëri møn, jooti joodø ki waŋï, 'ba bäŋ gïn mo camï camø ri gø.»

²⁰Gïnögø aput tägö dëëre møn, ena put jiyi nyørø dhi kiir, ni ö eni ni put thøø.