Read anuak 2 Nyeye 8 Bible Online

2 Nyeye 8 - anuak bible

2 Nyeye 8

¹'Ba Ilaaca acäänö ki nyijøøa wääde tïŋ maal ki yi thøø ni kööe, ni «Ö maal ni aayï ki wäädï ki jiy mo bëëdö buutï yøø, ni ciï kany mo løny ki man bëëdï yie ni ïïna wëëllö; kiper Wuuö Jwøk kännö ki meel. 'Ba meel manøgø bëëdö ki cwiiri abïriiø.»

²Køøre nyijøøgø aput ö maal ki køør dwør nyikuŋ Jwøk ma Ilaaca, ni aae ki wääde ki jiy moa bëëdö buute, ni bëëde na wëëllö yïth ŋøøp jø Pilitin ki cwiiri abïriiø.

³'Ba kanya tïme na aŋuun bïriet cwiiri, nyijøøgø aduuö ki yïth ŋøøp jø Pilitin, ni cøøe ni kwac nyeya kiper øtø mare ki pwödhö mare.

⁴'Ba kar kaagø, nyeya cäänö ki Gaadhi na näk ŋat tïïc mar nyikuŋ Jwøk ma Ilaaca, ni kööe, ni «Beerra man caanï jammi bëët jïra moa døøŋŋø na tïïc Ilaaca.»

⁵'Ba kanya bëët nyenøgø ni caana jöö mana tïŋ nyilaara no othøw maal ki gø jï nyeya, nyijøøa wääde tïŋ maal ki yi thøø aput öö ni kwac nyeya kiper øtø mare ki pwödhö mare. Ni put Gaadhi köö, ni «Wui, ï na nyeya mara, man beeye nyijøøa cääna kipere, ni man beeye wääde na tïŋ Ilaaca maal ki yi thøø.»

⁶'Ba kanya ö nyeya na pëëny nyijøøgø, aput nyijøøgø caan jïre. Køøre nyeya aput cïpö ki ŋat köör aciel kiper luum nyijøøgø, ni kööe, ni «Jap nyijøøgø bëët, ki caammi moe bëët moa ciek yi pwödhö mare ki mana täge ki dïcäŋa tïŋŋe yie na wec paac këël ennø, dwøgï jïre.»

⁷'Ba Ilaaca aci Damacka. 'Ba kar kaaca, Ben-Adat nyeny Aram tuu; ni caani jïre ni køp, ni «Nyikuŋ Jwøk ma Ilaaca onø ö kany.»

⁸'Ba nyeya aköö jï Adhaël, ni «Kädï ki muuy ni ciï kuna røømmï ki nyikuŋ Jwøk, ni pëënynyï dwør Wuuö Jwøk ki eni man näk mo dëëra pïïa piny ki täw man en ni dëëra en.»

⁹Køøre Adhaël aci kuna røømme ki nyikuŋ Jwøk, ni käädö ki muuce, ni beege wïth jammi moa beyø bëët moa en Damacka mo käära athïröölli ma pïëraŋween; ni cøøe ni cuŋŋe nyïm Ilaaca ni kööe, ni «Dhaanhnhï ma Ben-Adat nyeny Aram aana jääŋ baŋï ni kööe, ni ‹?Aani, dëëra pïïa piny ki täw man en ni dëëra en?› »

¹⁰'Ba aløk Ilaaca jïre, ni «Ciï ni caanï gø jïre, ni ‹Ka adïëri møn, ïïni, dëërï døøa kare.› 'Ba Wuuö Jwøk ee nø nyooth jïra ni ka adïëri møn, eni thøw.»

¹¹'Ba Ilaaca jï Adhaël araŋe døc ka agäät këël mana ö Adhaëlli ni kwät waŋe. Ni ö nyikuŋ Jwøki ma Ilaaca ni put jwöŋö.

¹²'Ba Adhaël aköö, na «?Awuuö, ï jwöŋï kiper ŋø?» Ni løgi ya Ilaaca jïre, ni «Beeye kiper mana ŋääa gïïo reyø noo tïïyï dëët jø Icriel, noo waaŋï kwör gwøk røk moge moa teek, noo 'nägï jiy moge moa näk poot na wøpe ko opëëllö, noo gøyï obwöre moge ki piny, noo rietï yïth mään moge moa näk yïthge da jiy.»

¹³'Ba Adhaël aköö, ni «?A na dhaanhnhï, ni caal gwök en, gïnögø ni päl enø olønye jïra nidïï ki man tïïa gø?» Ni løgi ya Ilaaca jïre, ni «Onø nyooth Wuuö Jwøki jïra niï tïmö ni ïïna nyeya bäät jø Aram.»

¹⁴Køøre ena aay buut Ilaaca ni døø baŋ nyeya mare ma Ben-Adad. 'Ba kanya ö eni na pëënynyi ya Ben-Adadi, na «?Agïnaŋø na caan Ilaaca jïrï?», ena köö, na «Acaane jïra ni ka adïëri møn, dëërï døøa kare.»

¹⁵'Ba kanya tïme na amöölla, Adhaël abïï köö alwøre ni cøt gø yïth pïï, ni rïëp wï nyeya ki gø ni thøŋe, ni put nyeya thøø. Ni ö eni ni put läw kar gø na nyeya.

¹⁶'Ba kanya tïme na ri bïï cwiiri moa beet Jeyörammi wär Akap ni ena nyeny Icriel, ni Jøcapat beeye nyeny Juuda, Jöram o Jøcapat aläw kar wänni na nyeya.

¹⁷'Ba kanya tïme ni ena nyeya, cwiiri moe pïëradäk kurriiø, ni bëëde ni ena nyeya ki cwiiri abära yi Jerucalem.

¹⁸'Ba ena bëëdö ni caatha køør gïïa reyø na tïïc nyeye mo Icriel, kaawat moa tïïc jø dhi øt Akap, kiper nya Akap ee nywømø. Ni ö eni ni tïïe ki gïï mo nëëni ni reyø ki jï Wuuö Jwøk.

¹⁹'Ba Wuuö Jwøk ba many man raany Juuda kiper dhaanhnhe ma Deebit, na kööŋe kiper gø ni eni cïpö ki dhaanhø mo dööŋ na wïc jïre røk nyïïkwaaye cooth.

²⁰'Ba ki yïth nïne moa beet Jörammi ni ena nyeya, jø Ëdöm gena gëëmö ki jø Juuda ni öge wøk tietge, ni röönyge ki nyeya kiper dëëtge keerge.

²¹Køøre Jöram aci Dhair ki jïëth leny moe bëët mo wø tut okwëënyi. Ni ö jø Ëdömmi ni cielge eni dïër ki kwääc lwaae mo jïëth leny moe mo wø tut okwëënyi. 'Ba kanya tïme na dï wäär, ena ö maal ni päär wøk ki yïthakic jø Ëdöm moa näk rege ege ciel deŋge, ni ö jø lenynyi moe ni reŋge mïëcge.

²²'Ba jø Ëdöm gena put bëëtö ni ge gëëmö ki jø Juuda këël dïcäŋi en. Këël jø Libana thuwø ge täga kar kaagø ka ageem.

²³'Ba luum tïïe møga bëët moa tïïc Jörammi ogöör piny yi Wëël Luup Nyec Juuda.

²⁴'Ba Jöram athøw, ni läp køør kwäcge, ni koonyi buut kwäcge yi Pääny Deebit; ni ö wääde ma Akadhiya ni läw kar gø na nyeya.

²⁵'Ba kanya tïme na ri cwiiri apaar kurriiø moa beet Jeyörammi wär Akap nyeny Icriel ni ena nyeya, Akadhiya o Jöram nyeny Juuda atïmö na nyeya.

²⁶'Ba Akadhiya kanya tïme na nyeya, cwiiri moe beeye pïërariiø kurriiø, ni bëëde ni ena nyeya yi Jerucalem ki cwiir aciel. 'Ba nyeŋ menni beeye Athaliya nyikwaar Ømri nyeny Icriel.

²⁷'Ba Akadhiya abëëdö ni caatha køør gïïa reyø na tïïc jø dhi øt Akapi, ni beege gïï mo nëëni ni reyø ki jï Wuuö Jwøk, kaawat gïïa reyø na tïïc jø dhi øt Akapi, kiper ena cø nyey ki dhi øt Akap.

²⁸'Ba Akadhiya ena aa Ramöth-Gelät ni eni cäädhi ka Jeyöram wär Akap kiper nee këëtge ka Adhaël nyeny Aram, ni ö jø Arammi ni moocge dëër Jeyöram ki ŋwellø.

²⁹Kanyøgø nyeya ma Jeyöram adøø Jedhriel kuna tuu eni ki ŋwellø mana tïïc jø Arammi dëëre Ramöth-Gelät kanya këëde ka Adhaël nyeny Aram. Ni ö Akadhiya o Jöram nyeny Juuda ni løøc piny Jedhriel kuna lïïmme baŋ Jeyöram wär Akap kiper ŋwellø mana en dëëre.