Read anuak 2 Nyeye 9 Bible Online

2 Nyeye 9 - anuak bible

2 Nyeye 9

¹'Ba nyikuŋ Jwøk ma Ilaaca acwötö ki dhaanhø aciel røk lwaa nyïïkuk Jwøk moa therø, ni kööe jïgø, ni «Lwør wïl maaw en, ni twöï abïïnï pierï, ni ci Ramöth-Gelät.

²'Ba kanyo pïïyï kaace, Jiyu o Jøcapat nyikwaar Nimci wär manynyï, ni ciï ni kälï eni wøk ki yïthakic nyïïawääte, ni kïthï gø yi thääŋ øtø mana en kuya.

³Køøre maaw wär thii wïïe ni kööï ni man beeye dwør Wuuö Jwøk, ena köö, ni ‹Ïïna røønya na nyeya bäät jø Icriel.› Køøre nø, ïïni dhi øtø wär put jap ni reŋï; 'ba kärï ruu.»

⁴Kanyøgønø, nyenøgø na nyikuŋ Jwøk mo poot thiinh enø, aput ci Ramöth-Gelät.

⁵'Ba kanya pïïe, ka adïëri møn, kwääy jø leny anwäne no opï piny kanya ciel; ni kööe, «Wui, kwääy lwaa leny, aani da dwøl mo caana caanø jïrï.» 'Ba Jiyu aköö, na «?Aŋa ni cäännï rewa?» Ni kööe, «Wui, kwääy lwaa leny, beeye ïïni.»

⁶Køøre Jiyu aö maal ni ci øtø, ni ö nyikuŋ Jwøki manøgø ni thii maaw wï gø, ni kööe jïgø, ni «Man beeye dwør Wuuö Jwøk, Jwø Icriel, ena köö, ni ‹Ïïna røønya ni ïïna nyeya bäät jic Wuuö Jwøk, ni beege jø Icriel.

⁷'Ba ïïni, jø dhi øt nyeya marï ma Akap wär raanynyï, nee kwör rem jiya ma nyïïkuk Jwøk coola, ki kwör rem jiy 'moa bëët, a na Wuuö Jwøk, na remge køny Jedhebelli piny.

⁸'Ba jø dhi øt Akap ge thøw bëët; aani cwøw bëët moa en dhi øt Akap na en dï Icriel nääa nääö, këël laaŋe.

⁹Ni tïïa jø dhi øt Akap ni caala jø dhi øt Jeröbäm o Nebat, ki jø dhi øt Baaca wär Akiya.

¹⁰Ni ö guuwi ni camge Jedhebel yi ŋööm Jedhriel, ni tïme ni bäŋ ŋat koony eni.› » Kanyøgønø, nyikuŋ Jwøk mana thiinh dhi øtø aput jap ni put reeŋø.

¹¹'Ba Jiyu aduu wøk baŋ kwääc jø leny mo nyeya mare; ni köge jïre, ni «?Bëëde nidïï? ?Aŋø, bøørøgø ööm ŋø baŋï?» 'Ba ena köö jïge, ni «Bäŋgø nyie. ?Teeŋ jøøgø wø caange ŋø cøøn?»

¹²'Ba gena köö, «Nyie, ïïna twöt. Caanï jïwa.» Køøre Jiyu aköö, ni «Eni gïn acaane jïra ni kööe ni man beeye dwør Wuuö Jwøk, ena köö, ni ‹Ïïna røønya na nyeya bäät jø Icriel.› »

¹³Kanyøgønø, geni abïïe moge aputge gööny wøk ni laarge ge peeth bäät thudhi mar dhi øtø, nee cuŋŋe bäätge; ni koothge tuuŋ, ni kwöŋge, ni «Jiyu beeye nyeya.»

¹⁴Kanyøgønø, Jiyu o Jøcapat nyikwaar Nimci agëëmö ki Jeyöram. 'Ba kar kaaca, Jeyöram ki jø leny mo jø Icriel bëët onø ci kuna gwøkge Ramöth-Gelät cer Adhaël nyeny Aram,

¹⁵ni Jeyöram onø døø Jedhriel kuna tuu eni ki ŋwellø mana kïth jø Arammi dëëre kanya këëtge ka Adhaël nyeny Aram. 'Ba Jiyu aköö jï kwääc jø leny møga, «Ni näk mou ena kura, kär dee dhaanhø mo weyu nee ree kwale ni wec pääny man ni ci kuna caan luum ageem Jedhriel.»

¹⁶Kanyøgønø, Jiyu aput aay ki jääy man wø tut okwëënyi ni ci Jedhriel, kiper Jeyöram obut piny kaace ni tuu. 'Ba Akadhiya nyeny Juuda onø ci piny kuna liim Jöram.

¹⁷'Ba ŋat koor mana en bäät gïr koor mana en maal yi Jedhriel, eni lwaa leny mar Jiyu ajoode ni ge öö, ni rwääye, ni «Aana jïtö ki lwaa leny!» Køøre Jeyöram aköö, ni «Lwötï ki ŋat wø cäädhi ki bäät okweeny ni jääŋŋï gøøni nee røømme ki geni nee kööe, ni ‹?U ööi ka mëër?› »

¹⁸Kanyøgønø, ŋat wø cäädhi ki bäät okweeny aput aay ni røømme ki geni ni kööe, ni «Nyeya aköö, ni ‹?U ööi ka mëër?› » 'Ba Jiyu aköö, ni «?Ï kïthï ŋø yie? Ö køøra.» 'Ba acaan ŋat koorri jï nyeya, ni «Ŋata jääŋŋi apïï baŋge, 'ba eni kär duuö.»

¹⁹Køøre nyeya acäŋ jäägö ki dhaanhø mør ki bäät okweeny, ni ci baŋge ni kööe, ni «Nyeya aköö, ni ‹?U ööi ka mëër?› » Ni løgi ya Jiyu, ni «?Ï kïthï ŋø yie? Ö køøra.»

²⁰'Ba acaan ŋat koorri jï nyeya, ni «Ŋata jääŋŋi apïï baŋge, 'ba eni kär duuö; 'ba ŋatøce ni rïïŋi ki bäät jääy manø ni tut okweenynyi ice, rïïŋi kaamar Jiyu o Nimci, kiper eni rïïŋi ka ŋwïëc bøøl.»

²¹Kanyøgønø, Jeyöram aköö, ni «Jiiŋŋu rou.» Køøre geni jää leny mare man wø tut okweenynyi aputge jiiŋŋø. Ni ö Jeyörammi nyeny Icriel ka Akadhiya nyeny Juuda ni tïŋge, ni ŋati man nø ena yi jääne man wø tut okweenynyi, ni cige wøk kuna røømge ki Jiyu. Ni røømge ki eni yi pwöth Naböth nyï Jedhriel.

²²'Ba kanya ö Jeyörammi na joot Jiyu, ena köö, ni «?Ï ööï ka mëër, Jiyu?» 'Ba aløk Jiyu, ni «?Mëër aŋøøni, noo poode ni juu mo meru ma Jedhebel ka ajuuk moe poot thööth døc?»

²³Kanyøgønø, Jeyöram jääy mare awiire ni reeŋe ni rwääye ni dwøre ena maal, ni «Wui Akadhiya, man beeye cwøk!»

²⁴Køøre Jiyu atum mare aput teel døc ni këël Jeyöram ki bäät jaae; ni ö atheerø ni pööth bäät wenynye; ni ö eni ni put ninoot yi jääy mare ni thøøe.

²⁵Køøre Jiyu aköö jï Bedekar ŋat köör mare, ni «Lwør eni ni leeŋï gø piny yi pwöth Naböth nyï Jedhriel. Par wïïï ki luubö mana caan Wuuö Jwøki kiper wänni ma Akap kanya ö aani ki ïïni na cäädhö ki bäät okwëënyi køør Akap.

²⁶Kar kaaca Wuuö Jwøk acäänö kiper Akap ni kööe, ni ‹Ka adïëri møn, ya awääre rem Naböth ki rem wääte ajooda; 'ba aani kwör remge coola coolø dëërï yi pwöthögø.› 'Ba ennø, ki køør dwør Wuuö Jwøk, lwørï ni leeŋï eni piny yi pwödhö.»

²⁷'Ba kanya ö Akadhiya nyeny Juuda na joot gïna tägö, ena reeŋø ki jöör Bëëth-Agen. Ni ö Jiyu ni ŋwiec køør gø ni rwääye, ni «Këëllu eni thuwø!» Ni putge eni këël yi jääy mare waŋjöör Guur, na en buut Ibleäm. 'Ba Akadhiya areŋ Megidø ni put thøø kaace.

²⁸Køøre ena käär jø kööre moe ki yi jääy ni kïthi Jerucalem, ni koony eni yi bwörö mare buut kwäcge yi Pääny Deebit.

²⁹'Ba kanya tïm Akadhiya na nyeny Juuda, beeye kanya tïm cwiic Jeyörammi wär Akap na apaar kurciel moa beede ni ena nyeny Icriel.

³⁰'Ba kanya pïïc Jiyu Jedhriel, gïre awïny Jedhebelli, ni ö Jedhebelli ni rwøth nyeŋŋe ki gïn wø rwøth nyeŋ ki gø, ni tïïc wïïe ni mïërö, ni räŋŋe ki dha awëërnyeŋ.

³¹'Ba kanya tïme ni Jiyu dunynyö ki dhi kal, Jedhebel aput köö, «?Nyie Dhimri,[11] ï na dïnääy na 'näk nyeya mare, dëërï jööt?»

³²Kanyøgø, Jiyu alwïthö maal dha awëërnyeŋ ni rwääye, na «?Aŋa ni en løøa? ?Aŋa?» 'Ba jø kööre ma ariiø wala adäk gena lwïthö piny baŋe.

³³Køøre Jiyu aköö, ni «Lëëŋu nyijøøgø piny.» Kanyøgønø, geni nyijøøgø aputge lëëŋ piny; ni ö remme ni neeker dëër øtø ki dëët okwëënyi. Ni ö Jiyu ni nyør nyijøøgø ko okwëënyi.

³⁴'Ba ena døny yi øt nyec ni cäme ni mädhe; køøre ena köö, ni «Cou baŋ nyijøøgø no ocienø enø ni koonynyu eni, kiper ena nyi nyeya.»

³⁵'Ba kanya cige nee eni koonyge, dëër gø kärge joodø; 'ba beeye cöön wïïe ki cuu cääthe ki cuu thäny ceŋŋe keerge na jootge.

³⁶Kanyøgønø, gena duuö ni caange gø jï Jiyu. Ni kö Jiyu, ni «Manøgø beeye dwør Wuuö Jwøk na caane ki dhi dhaanhnhe ma Ilaaja nyï Ticbi, na kööe, ni ‹Rïŋ dëër Jedhebel ocam guuwi yi ŋööm Jedhriel;

³⁷ni ö rïŋ dëër Jedhebelli ni tïme kaamar wär mo oleeŋ piny yi ŋööm Jedhriel, ni put tïmö ni bäŋ ŋat mo ŋec gø ni man beeye Jedhebel.› »