Read anuak 1 Luup Nyeye 10 Bible Online

1 Luup Nyeye 10 - anuak bible

1 Luup Nyeye 10

¹'Ba jø Pilitin gena këëdö ki jø Icriel; ni ö jø Icrielli ni bwøkge nyïm jø Pilitin, ni thøw mo thööthi rege bäät Kïn Gilböa.

²'Ba jø Pilitin Cøøl ki wääte amaage jöö, ni 'näkge wäät Cøøl, ni beege Jönathan, ka Abinadap, ki Mëlkica.

³'Ba leny atïmö ni teek dëër Cøøl. Køøre jø leny mo wø këëdi ka athëëre, Cøøl ajootge ni këëlge gø, ni put atheerø tïmö na ŋwellø mo leth døc dëëre.

⁴Kanyøgønø, Cøøl aköö jï ŋat wø käär jap leny jïre, ni «Wöth opëëllö marï wøk ni cwøpï aani ki gø, nee jøøi ni kär daŋø ii nee ba öge baŋa ki man caarge aani.» 'Ba ŋata käär jap leny jïre akweer ki man 'näk gø, kiper ena lwäyö døc. Køøre Cøøl opëëllö mare aput lwør ni put dëëre cwøp ki gø.

⁵'Ba kanya ö ŋata käär jap leny jï Cøøl na joot gø ni Cøøl onø thøø, eni thuwø ree acwøbe ko opëëllö mare, ni put thøø.

⁶Kanyøgø, Cøøl ki wääte moa na adäk, ge na jø dhi øtø aciel, gena put thøø bëët.

⁷'Ba kanya ö jø Icrielli bëët moa bëëdö mïëya en gool na jootge gø ni jø leny mo jø Icriel onø bwøk, ni Cøøl ki wääte geno nø thøø, geni päänye moge aputge wec ni bwøkge; ni ö jø Pilitinni ni putge öö ni bëëtge yïth päänye moøgø.

⁸'Ba na tïme na amöölla maya, na ö jø Pilitinni ni ge ööa kuna twierge jap jiy moa no othøw, Cøøl ki wääte aputge joot no othøw bäät Kïn Gilböa.

⁹Køøre jø Pilitin jap Cøøl aputge twier, ni ŋulge wï gø wøk, ni kälge gø ki jap leny moe, ni putge ge jääŋŋö dï ŋööm jø Pilitin bäre, ni ge caana thøw Cøøl yïth uut juu moge ki jï jø poge.

¹⁰'Ba jap leny mo Cøøl aputge kïth yi øt juu moge, ni lïërge wïïe yi øt jwøge man wø cwøl ni Dagön.

¹¹'Ba kanya ö jø Icrielli moa bëëdö pääny Jabic-Gelät na wïnyge jammi bëët moa tïïc jø Pilitinni dëër Cøøl,

¹²jø leny moa teek bëët gena put tïŋŋö ni pïïcge kunece ni lwørge dëër Cøøl ki dëët wääte ni døøge Iyabic-Gelät, ni koonyge ge tier jaadha dwøŋ na en Jabic-Gelät; ni kweerge ki cam ki nïne abïriiø ni ge kïïna gïr thøwge.

¹³'Ba Cøøl thøw kaper bääyö mare mana tïïe dëër Wuuö Jwøk, ni käre luum Wuuö Jwøk gwøø. Ni beeye kiper mana pëëe thuwø na pëëny ŋata näk ree da juu mo cøøra jwïëc jiy moa no othøw,

¹⁴ni käre Wuuö Jwøk pëënynyö. Kiper manøgønø, ena wëëk Wuuö Jwøki thøø, ni cïp bura mar gø jï Deebit o Jeci.