Read anuak 1 Luup Nyeye 11 Bible Online

1 Luup Nyeye 11 - anuak bible

1 Luup Nyeye 11

¹Kanyøgø jø Icriel bëët dëëtge acooŋge nyïm Deebit kanya bëëde yie Keeprön, ni köge jïgø, ni «Ka adïëri møn, ïïna dhaanhø ma rem dëëtwa, niï käla dëëtwa.

²Dïkwøŋ këël na bëët Cøølli na nyeya, bee ïïni na bwøth jø Icriel kany wø näk ri leny. 'Ba Wuuö Jwøk na näk Jwøk marï aköö jïrï, ni ‹Ï doo bëëdö ni ïïna dïkwääy mar jiya ma jø Icriel, ni tïmï ni ïïna wïth jø Icriel.› »

³Kanyøgønø, jø døøk Icriel bëët gena ö baŋ nyeya ma Deebit kanya en yie Keeprön, ni ö nyeya ma Deebit ni tude ki luubö ki geni Keeprön kaagø nyïm Wuuö Jwøk; ni ö geni ni thïïmge wï Deebit ki maaw ni ge røønya gø na nyeya mar jø Icriel bëët, ki køør dwør Wuuö Jwøk mana caane ki ri Camiel.

⁴Køøre Deebit ki jø Icriel bëët gena ci Jerucalem, ni beeye Jeebuc, paana bëët jø Jeebuc yie.

⁵'Ba jø Jeebuc gena köö jï Deebit, ni «Ba løny jïrï ki man dunynyï yi kiir kany.» 'Ba Deebit adønyø ni mak kar gwøk røk mana teek man wø cwøl ni Dhayan; ni beeye päänya put cwøl na Pääny Deebit.

⁶Kanyøgø, Deebit onø köö jï jiye, ni «Ŋat wø kwøŋ ci baŋ jø Jeebuc ni 'näk geni, tïmö na kwääc lwaa leny.» Kanyøgø Jöap o Dheruya ena put cøø dïkwøŋ, ni puti tïïc na kwääc lwaa leny.

⁷Køøre Deebit ena put bëëte kar gwøk røk mar jøøgø, ni put kaagø cwøl ni Pääny Deebit.

⁸Ni cäŋ pääny manøgø geerrø bäre ki mana täge kanya no othørø ni wø cwøl ni Milø këël deŋŋe manøgø bäre. 'Ba Jöap thääŋ pääny mana dööŋ adwøk kare ni nyään.

⁹'Ba teek mar Deebit aput bëëtö ni cäätha maal, kiper Wuuö Jwøk, eni na wïth jammi bëët, bëëdö ka eni.

¹⁰'Ba wïth jø leny moa teek døc mo Deebit, na bëëdö ni Deebit ege jølø ni teek yi bura mare, ge ki jø Icriel bëët, na røøny Deebit na nyeya ki køør dwør Wuuö Jwøk mana caane kiper jø Icriel,

¹¹nyeŋge beege ii: Ŋata dïkwøŋ beeye Jacöbiam nyï Akimöni, na bëëdö na wïth jø leny moa na adäk; ena këëdö ki tøŋ ni nääe ki jiy ma dïpe adäk ki yi leny aciel keere.

¹²'Ba ŋata caath køøre na en røk jø leny moa na adäk na teek beeye Eliedhar o Dödö nyï Aköki.

¹³Eni kanya en Pacdamim buut Deebit, jø leny mo jø Pilitin aöö ni cooŋge rege bëët kaace kiper leny, yi kanya näk da pwöth beek wø cwøl ni gäbci.[1] 'Ba kar kaaca jø leny mo jø Icriel gena bwøk nyïm jø leny mo jø Pilitin.

¹⁴'Ba eni ki Deebit, gena cuŋŋö dï pwödhö ni ge mäna pwödhö ki jø Pilitin, ni putge jø Pilitin 'näk. Ni ö Wuuö Jwøki ni tïïe ki køny mo dwøŋ døc jï jø Icriel.

¹⁵'Ba jø leny adäk moa en røk jø leny moa teek moa näk pïëradäk mo Deebit, gena aay ni løøcge piny ki kanya näk da kïte ni cige baŋ Deebit yi øt kïdi mana en ya Adulam, kanya bëëde ni jø leny mo jø Pilitin twïër marge ege tïïö yi Goor Rapayim.

¹⁶'Ba kar kaaca, Deebit ena kanya näk kar gwøk røk; ni jø leny mo jø Pilitin ge ena kar koor marge Bethelem.

¹⁷Kanyøgø, Deebit pï poge apare ni kööe, «Wui, doo na da ŋat mooc aani ki pïï mo maadha mo käla yi iith mana en dhi kiir Bethelem, doo beer!»

¹⁸Kanyøgø, jø leny moa na adäk na teek, gena put aay ni dønyge dï twïër mar jø leny mo jø Pilitin ki teek, ni putge lwötö ki pïï yi iith mana en dhi kiir Bethelem, ni öge ni käärge käärö, ni kälge gø baŋ Deebit. 'Ba Deebit akweer ki man maath pïï moøgø, ni put gø køny piny jï Wuuö Jwøk,

¹⁹ni kööe, ni «Ŋëët Jwøk mara, kara bääre ki pïïögø. ?Løny man tïïa gïnögø nyïm Jwøk mara? ?Løny man maadha rem jiy moi na cøø na wet jwïëcge? Kiper pïï moøgø caala rem jiy moa cøø na cïp dëëtge.» Kiper manøgø Deebit akweer ki man maath pïï moøgø. 'Ba man beeye gïrpiny aciel røk jammi moa tïïc jø lenynyi moa teek na näk adäk.

²⁰'Ba Abicay cöök Jöap beeye wïth jø leny moa teek moa näk pïëradäk. Ena këëdö ki tøŋ ki jiy ma dïpe adäk ni 'näk geni. Ni put nyeŋŋe wïnyö ki røk jøøa näk pïëradäk.

²¹'Ba ena bëëdö ni ena dhaanhø mo owøørø døc ki røk jø leny moa näk pïëradäk; ni put tïmö na kwääy lwaak marge. 'Ba eni kär pïï kar jøøa na adäk.

²²'Ba ŋat leny mør mo teek beeye Benaya o Jööda nyï Kapcël. Ena tïïö ki jap thwønh mo thööth døc. Eni jø Möap ariiø ma jø leny mo teek anääe. Eni thuwø, ena ci yi buur ni 'näge ki ŋuu dïcäŋ aciel ni piny da pey.

²³Ni ö nyï Ijepi mo dëëre dwøŋ, mo bär mare jïtö ki gööye abïïc, ni 'näk gø thuwø. 'Ba nyï Ijep mana nääe enø, cere da tøŋ mo thiire caala athøra. 'Ba Benaya aci baŋ gø ni eni käära athøra, ni cööt tøŋ wøk cer nyï Ijep, ni put gø näk ki tøŋ mar gø.

²⁴'Ba jammi moøgø beege moa tïïc Benaya o Jööda, ni put tïmö ni nyeŋŋe owïnyö ni caala nyeŋ jøøa na adäk na teek døc.

²⁵'Ba ena bëëdö ni ena dhaanhø mo owøørø ki røk jø leny moa näk pïëradäk. 'Ba eni kär pïï kar jøøa na adäk. 'Ba ena røøny Deebiti na wïth jø koor moe.

²⁶'Ba nyeŋ jø leny moa teek beege: Acaël cöök Jöapi, ki El-Anan o Dödö nyï Bethelem,

²⁷ki Caamöth nyï Aaröt, ki Këleth nyï Pelön,

²⁸ki Ira wär Ikëc nyï Tëköa, ka Abiedhar nyï Anathöth,

²⁹ki Cibekay nyï Uca, ki Ilay nyï Aköki,

³⁰ki Maaray nyï Netöpa, ki Këlet o Baanaa nyï Nethöpa,

³¹ki Itay o Ribay nyï Giba, ŋat tuuŋ jø Benjamen, ki Benaya nyï Pirathön,

³²ki Uray nyï waŋ Geäc, ka Abiël nyï Arba,

³³ka Adhemawët nyï Barum, ki Eliaba nyï Caalbön,

³⁴ki wäät Acëm nyï Gidhön, ki Jönathan o Cage nyï Arar,

³⁵ka Akiam o Cakar nyï Arar, ki Elipal wär Ur,

³⁶ki Ëpër nyï Mekërath, ka Akiya nyï Pelön,

³⁷ki Edharø nyï Karmël, ki Naaray wär Idhbay,

³⁸ki Jool cöök Nathan, ki Mibar wär Agri,

³⁹ki Cëlëk nyï Amön, ki Nakaray nyï Bëëröth, nyen wø käär jap leny jï Jöap o Dheruya,

⁴⁰ki Ira nyï Jëtër, ki Garëp nyï Jëtër,

⁴¹ko Uria nyï Këth, ki Dhabat wär Akilay,

⁴²ka Adina o Cica nyï tuuŋ Ruben, ŋata näk wïth jø tuuŋ Ruben na bëëdö ni buute da jiy mo pïëradäk,

⁴³ka Anan o Maika, ki Jøcapat nyï Mithan,

⁴⁴ki Ucia nyï Acterath, ki Caama ki Jïël, wäät Kötham nyï Aröör,

⁴⁵ki Jediel o Cimri ki coki ma Jöa, jø wø bëëdö Ticit,

⁴⁶ki Eliel nyï Mawïth, ki Jeribai ki Jöcabia na näk beege wäät Elnaam, ki Ithma nyï Möap,

⁴⁷ki Eliel, ki Obet, ki Jaciel, jø wø bëëdö Mecöba.