Read anuak 1 Luup Nyeye 12 Bible Online

1 Luup Nyeye 12 - anuak bible

1 Luup Nyeye 12

¹Moi beege jøøa ci baŋ Deebit kanya en Ciklak ni kana ree kiper Cøøl o Kic, ni beege jøøa en røk jø leny moa teek mo wø køny eni ki leny.

²'Ba jøøgø ge käla ri jø tuuŋ Benjamen kaamar Cøøl, ni gena jiy mo thöör ka athëëre ŋäcge, ki thöör kïte mo wø thöör ki gïr thöör man wø tïïc ki kaw ni di wïrö ni kïdi okïth yie, ni løny jïge ki man thööthge bäät caam wala bäät cwïïc.

³'Ba dïbwöthe moge beege Akiedhar ki Jöac, ni beege wäät Cimia; 'ba gena jø Giba. Ni jø leny møga beege Jedhiël ki Pelet na näk wäät Adhemawët; ki Beraka ki Jiyu jø Anathöth;

⁴ki Yicmaya nyï Gibien, ŋat leny mo teek ki røk jø leny moa näk pïëradäk, na bëëdö na bwödhi marge. Ki røk jø Gedëra beege Jeremaya, ki Jadhiël, ki Jöanan, ki Jödhabat.

⁵Ki røk jø Arup beege Eludhay, ki Jerimöth, ki Bealiya, ki Cemariya, ki Cepathiya.

⁶Ki røk jøøa käl dëër Köra beege Elkana, ki Iciya, ki Adharël, ki Jöëdhër, ki Jacöbiam.

⁷Ki røk jø Gëdör beege wäät Jeröam, ni beege Jöëla ki Dhebadiya.

⁸'Ba kanya bëët Deebiti ni eni ena kar gwøk røk mana en di paap, jø tuuŋ Gaat møøk ma jø leny gena öö ni dwätge ki jø leny moe. 'Ba gena jø leny mo teek, mo leny tøŋ man wø gëëŋ røk ki kööt leny ŋäcge, ni cwïnyge da cer kaamar ŋuuwe, ni ŋwïëy marge caala aŋeri mo wø bëëdö bäät kïte.

⁹Ni mana dïkwøŋ beeye Ëdhör, ni rietge beeye Øbadiya, ni dääge beeye Eliap,

¹⁰ni ŋweerge beeye Micmana, ni bïïge beeye Jeremaya,

¹¹ni bïcierge beeye Attay, ni bïrietge beeye Eliel,

¹²ni bäcge beeye Jöanan, ni bïŋweerge beeye Eldhabat,

¹³ni paacge beeye Jeremaya, ni paac kurcierge beeye Makbanay.

¹⁴Jøøgø beege jø tuuŋ Gaat moa bëëdö na kwääc lwaae mo leny, ni ŋat mo teek mare ena piny röömi ka jø leny ma dïpa, ni ŋat mo teek mare ena maal röömi ka jø leny ma kuma.

¹⁵'Ba kanya tïm pinynyi na cwiir ki dwääy mana dïkwøŋ, ni Naam Jördan opäŋ døc ni kwönna wøk bäät ageela, jøøgø gena ŋut løøga, ni riemge jø wø bëëdö yïth gøli moa en jï løø kur tuul-cäŋ ki jï løø kur pänh-cäŋ.

¹⁶'Ba jø møøk ki røk jø tuuŋ Benjamen ki jø tuuŋ Juuda gena ci kar gwøk røk baŋ Deebit.

¹⁷Kanyøgø Deebit aput cøø nee røømme ki geni, ni kööe, «Ni näk mou ö baŋa ka mëër kuna kønynyu aani, cwïnya gääbö ki uuni; 'ba ni näk kiper naa cïbu cer nyïïmän 'moa, keda man bëëde ni bäŋ gïn mo raac mo yaa tïïö en, beerra man ö Jwøki, eni na Jwø kwäyø, ni raŋ luummögø ni ŋøl gø.»

¹⁸Køøre Jwïëc Wuuö Jwøk aput ci bäät dhaanhø aciel røk jøøgø mo nyeŋŋe Amacay, ni beeye ŋato tïmö na kwääc jø leny moa näk pïëradäk, ni kööe, «Wui, Deebit o Jeci, waana moï, ni waana aciel ki ïïni bëët. Bëët-mëër kiree en bäätï ki jø wø køny ïïni. Jwøk marï ena buutï ki man køny ïïni.» Kanyøgø Deebit jøøgø aput pänhnhö ni tïïc geni na kwääri bäät jø lwaa leny moe.

¹⁹'Ba jø møøk thuwø ki røk jø tuuŋ Maneeca gena ci baŋ Deebit ni dwätge ki gø, ni beeye kanya aac Deebiti ki jø Pilitin nee ge këëtge ki nyeya ma Cøøl. 'Ba ka adïëri møn, Deebit ki jiye jø Pilitin kärge kønyø, kiper kwääri mo jø Pilitin, kanya cäänge bääte, Deebit ariemge, kiper gena köö, ni «Kanymør ø nääe nääö ni dwätge ki nyenynye ma Cøøl.»

²⁰'Ba kanya døø Deebiti Ciklak, jø leny mo jø tuuŋ Maneeca moa dwätö ki eni beege Adina, ki Jödhabat, ki Jediel, ki Mikaël, ki Jödhabat, ki Eliyu, ki Jilethay. Moøgø bëët beege kwääc lwaae mo leny mo jø tuuŋ Maneeca, ni ŋati man nø käära jø leny ma kuma.

²¹'Ba jøøgø Deebit akønyge ni riemge dïtwïëte, kiper gena atïëte mo leny. Ni bëëtge ni gena kwääc lwaae mo leny mo Deebit.

²²'Ba ki yi cäŋ cooth, da jiy mo öö ni dwätge ki jø leny mo Deebit, këël mana tïm jø lenynyi ni thööth døc.

²³'Ba kanya bëët Deebiti Keeprön, jø leny mo thööth mo dëëtge ege jiiŋŋø kiper leny, gena dwätö ki jø leny mo Deebit kiper nee Deebit tïïcge na nyeya kar Cøøl ki køør mana caan Jwøki. 'Ba nyeŋ jøøgø beege ii:

²⁴Ki røk jø tuuŋ Juuda, jø wø ŋäc leny tøŋ man wø gëëŋ røk ki kööt leny, na näk rege ege jiiŋŋø kiper leny, beege kume abïciel ki dïpe abära.

²⁵Ki røk jø tuuŋ Cimien, jø leny moa näk atïëte na näk rege ege jiiŋŋø kiper leny beege kume abïriiø ki dïpa aciel.

²⁶'Ba ki røk jø tuuŋ Libay beege jø leny ma kume aŋween ki dïpe abïciel.

²⁷'Ba jø wø cäädhi køør Jööda na näk bwödhi mar dhi øt Aran beege kume adäk ki dïpe abïriiø;

²⁸ki Dhadök thuwø, ŋata teek ki leny, ki kwääc lwaae mo leny ma pïërariiø ka ariiø mo käla dhi øt wänni.

²⁹Ki røk jø tuuŋ Benjamen, ni beege jø tuuŋ Cøøl thuwø, gena kume adäk, 'ba thööthge akwøŋ bëëdö ni ge caatha køør dhi øt Cøøl.

³⁰Ki røk jø tuuŋ Ipariem, gena kume ma pïërariiø ki dïpe abära moa näk atïëte mo leny, ni ŋati man nø nyeŋŋe owïnyö ki dhi øt wänni.

³¹Ki røk thääŋ jø tuuŋ Maneeca mo obëëdö jï kun wø päth cäŋŋi yie beege kume apaar ka abära na cwøl ki nyeŋge ki man öge kuna tïïcge Deebit na nyeya.

³²Ki røk jø tuuŋ Icakar, bwöthe beege dïpe ariiø, ni geno dwalø ki jø tuuŋge mo wø bëëdö ni ena tietge. 'Ba dïbwöthe moøgø gena jiy mo wïthge leer ki man ŋäcge gïïa doo tïïc jø Icrielli, ki cääŋŋe mo tïïi yïthge.

³³Ki røk jø tuuŋ Dhebulan moa ci baŋ Deebit nee kønyge ni cwïnyge paa ege pääŋŋö, na näk opwönynyö ki jöör leny, ni løny jïge ki man këëtge ki teeŋ jap leny bëët, beege kume ma pïërabïïc.

³⁴Ki røk jø tuuŋ Naptali, kwääc lwaae mo leny beege kuma aciel, ki jø leny ma kume ma pïëradäk ka abïriiø mo wø käär tøøŋi ki kööt leny.

³⁵Ki røk jø tuuŋ Daan, jø leny moa näk opwönynyö ki jöör leny beege kume ma pïërariiø ka abära ki dïpe abïciel.

³⁶Ki røk jø tuuŋ Acer, jø leny moa näk opwönynyö na näk rege ege jiiŋŋø kiper leny beege kume ma pïëraŋween.

³⁷Ki røk jø tuuŋ Ruben, ki jø tuuŋ Gaat, ki thääŋ jø tuuŋ Maneeca mo wø bëëdö løø Naam Jördan løøga, moa näk opwönynyö ki jap leny bëët beege kume ma dïpa ki pïërariiø.

³⁸'Ba jø leny moøgø bëët na näk opwönynyö kiper leny, gena ö Keeprön ni ege ŋølø ki cwïnyge nee Deebit tïïc na nyeya bäät Icriel bäre. 'Ba jø Icriel moa dööŋ ge poot ni geno jïëy ki luummögø thuwø.

³⁹'Ba jøøgø gena bëëdö ki nïne adäk ki Deebit ni ge mädhö ni ge cämö ki caammi moa jiiŋ tuuŋge kiperge.

⁴⁰Køøre jø atude moge, këël moa karge bäyö mo wø bëëdö po jø tuuŋ Icakar, ki jø tuuŋ Dhebulan, ki jø tuuŋ Naptali, gena öö ni ge käädö ka arëëni, ka athïrööle, ki gääŋŋe, ki dhäk mo käädö ki muunni, ki nyïïolämmi mo omiinynyø na dhøgi, ki nyïïomøki mo otal, ki kwøk nyïïomøki, ki mädhi. 'Ba gena kännö thuwø ki dhäk ki dïëk nee 'näkge kiper cam. Gïïögø atïïc ni nyootha met ec mana tägö Icriel bäre.