Read anuak 1 Luup Nyeye 13 Bible Online

1 Luup Nyeye 13 - anuak bible

1 Luup Nyeye 13

¹Kanyøgø Deebit dïbwöthe bëët, ni beege kwääc lwaa kume, ki kwääc lwaa dïpe, acooŋe ni pëëny acaara marge.

²Køøre ena köö jï jø Icriel bëët, ni «Ni näk mo beeye gïn mo beer ki jïïu, ni beeye mana many Wuuö Jwøki na näk Jwøk marø, beerra man jäägø baŋ tuuŋø moa no odööŋ yi ŋööm Icriel kwörögø bëët. Ni jäägø baŋ dïlämme thuwø ki jø tuuŋ Libay mo wø bëëdö ki geni yïth päänye moge moa näk da kwör kwaath, nee dwätge ki øøni,

³kiper nee ø cøø ni duuø acanduk mar Jwøk marø, na näk kärø manynyø yïth nïr Cøøl.»

⁴Køøre jiy bëët gena jïëy ni tïïcge tïïö, kiper luubö manøgø atïmö ni beer ki baŋ jiy bëët.

⁵Kiper manøgønø, Deebit jø Icriel aput cooŋ bëët ki mana täge jï løø tier-piny ki bäät naam wø cwøl ni Ciör na en waŋ keew ki Ijep, këël kany wø cwøl ni Libö-Amath na en jï løø wï-piny, na acanduk mar Jwøk nee øømge Kiriat-Jeerim.

⁶Kanyøgø Deebit ki jø Icriel bëët gena put ci Baala, ni beeye Kiriat-Jeerim, na en kur jø Juuda, na acanduk mar Jwøk nee kälge, ni beeye acanduk mana no ocaa ri nyeŋ Wuuö Jwøk ni wø bëëdö yïthakic nyïïatwiet maal moa cwøl ni kirubëlli.

⁷Køøre acanduk aputge lwør po Abinadap ni cïpge gø bäät jääy mo nyään man wø tut dhäki nee käärge ki bääte. Ni ö Udha ka Akïïö ni bwøthge maal nyïm gø.

⁸'Ba kanyøgø, Deebit ki jø Icriel bëët gena put miel døc ni ge wär ki dudi ni yïthge met nyïm Jwøk ki teek marge bäre, ni jøw pöödö ki thøme mo wø pwöt ni di roodø, ki thøp-othïënhö, ka anëët; na adijeege tuuŋge tuuŋŋö, ni ge kudhö ki tuŋi.

⁹'Ba kanya pïïcge ri laara mar Kidön, dhäk moa käär acanduk tietge aceec ni tïmge ni manynya pädhö; ni ö Udha ni put cere tïŋ maal baŋ acanduk nee jøle.

¹⁰Kanyøgø, Wuuö Jwøk aput wëër døc ki Udha, ni put gø näk kiper mana tïŋ cere maal bäät acanduk, ni ö Udha ni put thøø kaace nyïm Jwøk.

¹¹'Ba Deebit agootø døc kiper mana ö wëëc Wuuö Jwøki na päth bäät Udha ni jääla gø. Kiper manøgønø, nyeŋ kaace aput cwøl ni Peereth-Udha këël dïcäŋi en.

¹²Kanyøgø, Deebit aput lwäyö ki Wuuö Jwøk dïcäŋögø, ni kööe, na «?Aŋø, acanduk mar Wuuö Jwøk okïtha gø paac baŋa nidïï këët nø?»

¹³Kiper manøgønø, Deebit acanduk mar Wuuö Jwøk käre kälö këët ki man kïth gø yi Pääny Deebit. 'Ba acanduk manøgø akïth Deebiti yi øt Obet-Idöm nyï Gëth.

¹⁴Kanyøgø, acanduk mar Wuuö Jwøk aput bëëte yi øt Obet-Idöm nyï Gëth ki dwäde adäk, ni ö Wuuö Jwøki ni gwïëth po Obet-Idöm ki gïïa en jïre bëët.