Read anuak 1 Luup Nyeye 15 Bible Online

1 Luup Nyeye 15 - anuak bible

1 Luup Nyeye 15

¹Kanyøgø Deebit ena gëëdö ki uudi kipere yi pääny mana caa ri nyeŋŋe ni Pääny Deebit; ni jiiŋ kar acanduk mar Jwøk, ni cööth piny ko oduŋkaara kiper gø.

²Køøre ena köö, ni «Ba løny jï dhaanhø jaak ki man käär acanduk mar Jwøk, 'ba beeye jø tuuŋ Libay keerge noo käär gø. Kiper Wuuö Jwøk jø tuuŋ Libay ee jierø kiper na acanduk mar Jwøk nee wø käärge, ni jier geni thuwø ki man tïnyge eni na bäre bäre.»

³Kanyøgø Deebit jø Icriel bëët acooŋ yi Jerucalem, na acanduk mar Wuuö Jwøk nee øømge, nee kïth kanya jiiŋŋe kiper gø.

⁴Ni ö Deebiti ni cooŋ jøøa käl dëër Aran ki jø tuuŋ Libay bëët.

⁵Ki røk jiy moa käl dëër Kät, bwödhi marge beeye Uriel; ni kwäänge beege dïpa ki pïërariiø;

⁶ki røk jiy moa käl dëër Mërari, bwödhi marge beeye Acaaya; ni kwäänge beege dïpe ariiø ki pïërariiø;

⁷ki røk jiy moa käl dëër Gërcön, bwödhi marge beeye Jool; ni kwäänge beege dïpa ki pïëradäk;

⁸ki røk jiy moa käl dëër Elicapan, bwödhi marge beeye Cemaya; ni kwäänge beege dïpe ariiø;

⁹ki røk jiy moa käl dëër Keeprön, bwödhi marge beeye Eliel; ni kwäänge beege pïërabära;

¹⁰ki røk jiy moa käl dëër Udhiel, bwödhi marge beeye Aminadap; ni kwäänge beege dïpa ka apaar kurriiø;

¹¹Køøre Deebit Dhadök ka Abiethaar na bëëdö na dïlämme, ki jø tuuŋ Libay, ni beege Uriel, ka Acaaya, ki Jool, ki Cemaya, ki Eliel, ka Aminadap, acwøle,

¹²ni kööe jïge, ni «Bee u na bwöthe mo dhøk uudi mo jø tuuŋ Libay; cïbu dëëtu kur keeru na mo Jwøk, uuni bëët ki jø tuŋi mou, ni øømmu acanduk mar Wuuö Jwøk, Jwø Icriel, nee cïp kanya jiiŋŋa kipere.

¹³Acanduk manøgø, kiper mana näk mo käru käärö kar kanyøca, Wuuö Jwøk na näk Jwøk marø awëër ki øøni kiper mana kärø eni manynyø ki køør ciik.»

¹⁴Kiper manøgønø, dïlämme ki jø tuuŋ Libay, dëëtge aputge cïp kur keerge na mo Jwøk ki man øømge acanduk mar Wuuö Jwøk, Jwø Icriel.

¹⁵'Ba wäät jø tuuŋ Libay acanduk mar Jwøk aputge biellø ki göökge ki jer tëër moe ki køør dwør Wuuö Jwøk mana ceme ki ri Modhe.

¹⁶Køøre Deebit bwöthe mo jø tuuŋ Libay acäänne nee jëëtge røk jø tuuŋge ki jiy mo wär ki dudi ki wïth thøme ma teeŋi, ka athaliiŋŋi moo jwöŋi ni döötge ena maal, nee döötge tïŋge maal ni wärge ki met ec.

¹⁷Kanyøgø jø tuuŋ Libay, Ëman o Jool ajierge, ka Acaap o Berekiya, na en røk jø tuuŋ Ëman, ki Ëtan o Kucaya, na en ri tuuŋ jøøa käl dëër Mërari.

¹⁸'Ba jiy moa jier na mo caath køør jøøgø ki røk jø tuŋi moge beege Dhekaraya, ki Jaajiel, ki Cemiramöth, ki Jikiël, ki Oni, ki Eliap, ki Benaya, ki Maycëya, ki Matitiya, ki Elipelu, ki Mikneya; ki jø wø koor dhi kal, ni beege Obet-Idöm ki Jïël.

¹⁹Ki røk jø wär ki dudi moøgø, Ëman, ka Acaap, ki Ëtan, gena jier bäät athaliiŋŋi moa näk tïïc ka nywïënyö ma jwïël nee tuuŋge døc.

²⁰'Ba Dhekaraya, ka Ajiel, ki Cemiramöth, ki Jikiël, ki Oni, ki Eliap, ki Maycëya, ki Benaya, gena cïp bäät pwöt thøp-othïënhö moa döötge wetø.

²¹'Ba Matitiya, ki Elipelu, ki Mikneya, ki Obet-Idöm, ki Jïël, ka Acaciya, gena cïp bäät pwöt thøp-othïënhö moa döötge døøŋŋø.

²²'Ba Kenaniya na bëëdö na bwödhi mar jø tuuŋ Libay, ena jier bäät jø wär ki dudi na ŋat neet geni; ni beeye ŋat wø pwöny geni ki jöör wär dudi, kiper ena dhaanhø mo waŋe riek ki wär dudi.

²³'Ba Berekiya ki Elkana beege jø koor dhi øtø mana en acanduki yie.

²⁴'Ba Cebaniya, ki Jøcapat, ki Natanel, ka Amacay, ki Dhekaraya, ki Benaya, ki Eliëdher, na bëëdö na dïlämme, gena jier na jø kooth tuŋi nyïm acanduk mar Jwøk. 'Ba Obet-Idöm ki Jekiya gena jier thuwø na jø koor dhi øtø mana en acanduki yie.

²⁵'Ba beeye Deebit ki jø døøk Icriel, ki kwääc lwaa kume, na cøø ki met ec kuna øømge acanduk po Obet-Idöm, ni beeye acanduk man wø nyooth luumma tuut Wuuö Jwøki ki jiy.

²⁶'Ba kiper mana ö Jwøki na køny jø tuuŋ Libay moa käär acanduk man wø nyooth luumma tuut Wuuö Jwøki ki jiy, gena cïpö ki rwädhe abïriiø, ki nyöök rööm abïriiø no olämi jï Jwøk.

²⁷'Ba Deebit oruyö ka abïï mo cwääc ka waac lïïna mo piilli, ge ki jø tuuŋ Libay bëët moa käär acanduk, ki jø wär ki dudi, ge ki bwödhi marge ma Kenaniya. 'Ba Deebit thuwø eno ruyö ka abïïn wø cwøl ni ëëput, [2] na näk cwääc ka waac lïïna.

²⁸Kanyøgø jø Icriel bëët acanduk man wø nyooth luumma tuut Wuuö Jwøki ki jiy aputge kälö ni ge kwöŋŋö ki met ec, ni ge kudhö ki tuk lääy, ki tuŋi moa näk tïïc ka nywïënyö, na athaliiŋŋi moo jwöŋi ni döötge ena maal tuuŋge tuuŋŋö, ni ge pöödö ki wïth thøme ma teeŋi.

²⁹'Ba gïna tägö, kanya tïme na acanduk man wø nyooth luumma tuut Wuuö Jwøki ki jiy pïï dï Pääny Deebit, Mikal nyi Cøøl, na näk cï Deebit, aräŋŋö ki dha awëërnyeŋ ni joot nyeya ma Deebit ni pärö ni miel; ni put nyeya taak ki cwïnye.