Read anuak 1 Luup Nyeye 16 Bible Online

1 Luup Nyeye 16 - anuak bible

1 Luup Nyeye 16

¹'Ba kanyøgø acanduk mar Jwøk akälge ni cïpge gø yo oduŋkaara mana no onø cwöth Deebiti piny kiper gø. Køøre gena cïpö ko olämme jï Jwøk, ni beege olämme mo wø waaŋ bäre, ko olämme mo wø duunni ki mëër.

²'Ba kanya løny Deebiti ki cïp olämme mo wø waaŋ bäre ko olämme mo wø duunni ki mëër, jiy agwïëdhe ki nyeŋ Wuuö Jwøk.

³Køøre eni dääpe,[3] ka aleye mo rïŋ, ki nyïïomøki mo omiinynyø na dhøgi apääŋŋe jï jø Icriel bëët, ni beege cwøw ki mään, ni pääŋŋe jï ŋati man nø.

⁴Køøre Deebit jø møøk acuume ki røk jø tuuŋ Libay nee tïïge nyïm acanduk mar Wuuö Jwøk ni ge dwøga pwøc ka ajiem ki wödö jï Wuuö Jwøk Jwø Icriel.

⁵'Ba Acaap beeye na bwödhi marge, ni ŋata caath køøre beeye Dhekaraya. 'Ba jiy mo pöödö ki thøp-othïënhö beege Jïël, ki Cemiramöth, ki Jikiël, ki Matitiya, ki Eliap, ki Benaya, ki Obet-Idöm, ki Jïël; na Acaap beeye ŋat wø tuuŋ athaliiŋŋi mo wø jwöŋi ni döötge ena maal.

⁶'Ba Benaya ki Jadhiël, na bëëdö na dïlämme, beege ni wø kudhö ki tuŋi cooth nyïm acanduk man wø nyooth luumma tuut Jwøki ki jiy.

⁷'Ba dïcäŋöce kiree, Acaap ki tuuŋge aput Deebiti jier dïkwøŋ nee met ec dwøkge jï Wuuö Jwøk ki duut man:

⁸Dwøgu met ec jï Wuuö Jwøk, ni pwøyu nyeŋŋe, ni caannu tïïe moe nee wïny wïth juurre.

⁹Wärru jïre, wärru duut pwøc jïre, ni caannu tïïe moe bëët na näk rëëma ec.

¹⁰Jiemmu nyeŋŋe na en kur keere; beerra man mïn yïth jø wø cac Wuuö Jwøk.

¹¹Cayu Wuuö Jwøk ki teek mare, ni manynyu eni cooth.

¹²U na nyïïkwaac dhaanhnhe ma Icriel, ni bee u na nyïïkwaac Jeekap na näk ee jierø, caarru wïthu ki gïïa näk rëëma ec na tïïe, këël ŋïïce moe ki luup ŋøl moa caane ki dhee.

¹⁴Eni na Wuuö Jwøk beeye Jwøk marø; ŋøl mare ena bäät piny bäre.

¹⁵Eni luumma tuude di lääŋŋö na bäre bäre, ni bëëde ni luumma caane di lääŋŋö këël yïth beenhnhe ma kume,

¹⁶ni beeye luumma tuude ki Eeberam, na kööŋe kiper gø jï Aydhak,

¹⁷ni cäŋ gø tuutö ki Jeekap, ni beeye Icriel, nee bëëde na bäre bäre;

¹⁸ni kööe, ni «Ŋööm Keenan omëëga ïïni, ni tïme na kur nyïïkwaayu.»

¹⁹Kanya bëëtge ni kwäänge nøk, ni ge nøk døc ni gena wëëlle yi ŋöömmögø,

²⁰ni ge wïïrö tiet mïëri, ni ge cøøa paac man nø ki baŋ jøøi nø,

²¹ge käre wëëk dhaanhø mør nee ge thiel piny; nyeye aköömme kiperge, ni kööe,

²²ni «Jiya na näk yaa jierø kär gutu, ni ba tïïu dëëtge ki gïï mo leth, ge na nyïïkuk 'moa.»

²³Wärru jï Wuuö Jwøk, u na jø bäät piny bëët, ni caannu luumma met mar køny mare ki yïth nïne bëët.

²⁴Køpu ajieme jï wïth juurre bëët, ni køpu tïïe moe moa näk rëëma ec jï jiy bëët.

²⁵Kiper Wuuö Jwøk dwøŋ no orømø ki pwøc døc; eni di lwäärö ni kaala juu bëët.

²⁶Kiper juu bëët mo wïth juurre beege juu mo oballe jaak, 'ba Wuuö Jwøk bee eni na cwääc maal.

²⁷Wödö ka ajiem joota baŋe; ni ö teeki ki met ec ni joodi yi øt lam mare.

²⁸Jiemmu Wuuö Jwøk, u na wïth tuŋi bëët mo bäät piny bäre; jiemmu Wuuö Jwøk ki køør ajiem mare ki teek mare.

²⁹Jiemmu Wuuö Jwøk ka ajiem mo orømø ki nyeŋŋe; kännu ki muuce ni ööu baŋe; wøørru Wuuö Jwøk, kiper eni ena kur keere.

³⁰U jø bäät piny bëët, ööu nyïme ni dëëtu kwanynyi. Piny acïp kare ni teek ni ba løny ki daak.

³¹Beerra man mïn yïth gïïa en maalli, ni ö gïïa en bäät pinynyi ni kanyge. Beerra man caange luumme yïthakic wïth juurre, ni «Wuuö Jwøk beeye kwäärö.»

³²Beerra man lwör naama dwøŋŋi ni kanynye ki gïïa en yie bëët; beerra man ö pwöthi ni kanyge ki gïïa en yïthge bëët.

³³'Ba kar kaace thuwø jer paap bëët yïthge omïnni ni wärge ki dudi nyïm Wuuö Jwøk, kiper eni cäädha jöö, ni ööa kuna ŋøl luup mo piny.

³⁴Dwøgu met ec jï Wuuö Jwøk, kiper eni beer, ni mëër mare ni wø ba jøøl bëëdö na bäre bäre.

³⁵Kööu, ni «Wui Jwøk, ï na pïëmi marwa, piem waani; ni lemï wa ni piemï wa yïthakic wïth juurre, kiper nee nyeŋŋï na en kur keere pwøcwa, ni jiemwa ïïni kany wø pwøcwa ïïni.

³⁶Pwøc en jï Wuuö Jwøk, Jwø Icriel, ki mana täge cøøn, këël bäre bäre.» Køøre jiy bëët aköö, ni «Beeye kare!» ni pwøcge Wuuö Jwøk.

³⁷'Ba køør manøgø Acaap ki jø tuuŋge acuum Deebiti ki man tïïge nyïm oduŋkaara kany wø bëët acanduk man wø nyooth luumma tuut Wuuö Jwøki ki jiy yie, nee tïïge cooth ki køør jöör tïïc mana no ocïp piny kiper yi cäŋ man nø.

³⁸'Ba Obet-Idöm ki jø tuuŋge ma pïërabïciel ka abära, jøøgø akønyge ki tïïc. Ni ö Obet-Idöm wär Jeduthun ki Öca ni näkge beege jø koor dhi kal.

³⁹'Ba Dhadök na bëëdö na dïlämi mana dwøŋ, ki jø tuuŋge møøk ma dïlämme, gena cuum ki man raŋge oduŋkaany Wuuö Jwøk na en bäät thuur mana en Gibien.

⁴⁰Ni kany wø tïme na amöölla ka abøøya cooth, olämme mo wø waaŋ bäre wø waaŋge waaŋø jï Wuuö Jwøk bäät gïn wø cïp olämme bääte. Ni manøgø tïïcge ka køør luup bëët moa no ogöör piny yi wëël ciik Wuuö Jwøk na kööm jø Icriel ki ge.

⁴¹'Ba Ëman, ki Jeduthun, ki jø møøk mo ojierø no ocøørø ki nyeŋge, gena tïïö na aciel ki dïlämme moøgø, ki man dwøkge pwøc jï Jwøk, kiper mëër mare bëëdö na bäre bäre ni ba jøøl.

⁴²Ni ö Ëmanni ki Jeduthun ni cäŋge cuummö kiper nee tuŋi koothge, ni tuuŋge athaliiŋŋi ki jammi møøk mo wø cïpi ki dwøl mo wär dut Jwøk ki ge; ni ö wäät Jeduthun ni bëëtge ni ge koora dhi kal.

⁴³Køøre jiy bëët adøø mïëcge, ni ŋati man nø aa paare; ni ö Deebiti thuwø ni døø paan dwøŋ kuna gwïëth jø paare.