Read anuak 1 Luup Nyeye 17 Bible Online

1 Luup Nyeye 17 - anuak bible

1 Luup Nyeye 17

¹'Ba kanya tïm Deebiti ni bëëdö paan dwøŋ yi øde mana geer jïre, ena köö jï nyikuŋ Jwøk ma Nathan, ni «Neenï, aani a bëëdö yi øtø mo geer ka jenni mo perge leth; 'ba acanduk man wø nyooth luumma tuut Wuuö Jwøki ki jiy, bëëdö yo oduŋkaara jaak.»

²Køøre Nathan aköö jï Deebit, ni «Beerra man tïïyï jammi bëët moa manynyï ki cwïnyï, kiper Jwøk ena buutï.»

³'Ba na tïme na dïwäänögø, dwør Jwøk aö bäät Nathan ni kööe,

⁴ni «Ci baŋ dhaanhnha ma Deebit ni caanï luumma jïre, ni kööï ni man beeye dwør Wuuö Jwøk, ena köö, ni ‹Paa ïïni noo gëëdö ki øtø jïra mo bëëda yie;

⁵kiper aani, a kär bëëdö yi øtø ki mana täge ki kanya käla jø Icriel wøk ki Ijep këël dïcäŋ man; 'ba aana bëëdö ni kar bëëtö mara beeye oduŋkaara.

⁶?'Ba kwöra caadha ki jø Icriel bëët, da gïn mo yaa maar caan jï dïbwöthe mo jø Icriel, moa köömma ni käärge jiya, mo aano köö, na «?Aperŋø, ni ba gëëdu ki øtø jïra en, mo geer ka jenni mo perge leth?»?›

⁷«'Ba ennø, caanï jï dhaanhnha ma Deebit, ni man beeye dwør Wuuö Jwøk, eni na wïth jammi bëët, ena köö, ni ‹Aani, ïïna jiera kanya enï pwöl kwaath niï kwaaya dïëk, niï tïmï ni ïïna dïbwödhi mar jiya ma jø Icriel.

⁸'Ba aana bëëdö ki ïïni ki yïth kwöra caathï bëët, ni dïïra wïth nyïïmän moï nyïmï; 'ba nyeŋŋï poot tïïa tïïö nee wïnye, ni caala nyeŋ jiy moa no owïnyö døc bäät piny.

⁹'Ba aani thuwø da kany mo jiera jierø kiper jiya ma jø Icriel, nee tietge këëtge piny yie, ni beeye kany bëëtge yie na poge, tïme ni bäŋ jiy mo kiera wïthge këët, ni bäŋe jiy mo wïthge reyø mo caara ge këët kaawat mana dïkwøŋ,

¹⁰ni beeye ki mana täge ki dïcäŋa thïïŋa pïëmme jï jiya ma jø Icriel. 'Ba aani nyïïmän moï bëët bööta böötö. 'Ba ennø, a caana gø jïrï, ni beeye a Wuuö Jwøk noo tïïc dhi ødï ni teek.

¹¹« ‹'Ba kanyo päŋ nïne moï noo thøwï noo läpï køør kwäyu, aani da ŋat mo käla dëërï mo thïïŋa thïïŋö køørï ki røk wäätï; 'ba aani tier buc nyec mare këëlla piny;

¹²ni ö eni ni gëëde jïra ki øtø, ni këëlla tier wälu mare piny na bäre bäre.

¹³'Ba aano bëëdö ni aana wuuö jïre, ni bëëde na wäädö jïra. 'Ba mëër mara ni wø ba jøøl, na paanya bäät ŋata läwï kare, ba paanya bäät ŋataca.

¹⁴'Ba eni wëëga käär øtø mara ki bura mara na bäre bäre. Ni ö tier wälu mare ni këët piny na bäre bäre.› »

¹⁵Køøre Nathan luup bëët, ki gïïa nyooth Jwøki jïre bëët, acaane jï Deebit.

¹⁶Køøre nyeya ma Deebit aci kar lam ni pï piny nyïm Wuuö Jwøk ni läme na ennønø, «?Wui Wuuö Jwøk, aana ŋa? ?A dhi øtø mara thuwø nyïëdi, ni tïïyï gïïögø bëët yøø kipera?

¹⁷?Wui, Jwøk, ki jïrï gïna nø tïïyï enø beeye gïn mo thiinh jaak? 'Ba ïïna cäŋ cäänö kiper gïno tïïyï yi nyïme kunece kiper dhi øtø mara, a na dhaanhnhï en, ni neenï aani kaamar dhaanhø mo kare dwøŋ.

¹⁸«?Wui, Wuuö Jwøk, agïnaŋø noo caana jïrï këët nø, ki køør wödö man bäre en na cïpï jïra? Kiper a na dhaanhnhï en, cwïnya oløny ni ŋäyï døc.

¹⁹Wui Wuuö Jwøk, ki køør mana caarï ki cwïnyï, ïïna tïïö ki gïn mo dwøŋ kipera, a na dhaanhnhï en, ni wëëgï luupögø bëët ni døøŋŋø yøø tïïc nee bëëtge ni ŋäc.

²⁰«Wui Wuuö Jwøk, ï ena kur keerï, ni bäŋ jwøk mør këët, 'ba bee ï keerï, kaa mana wïnywa gø ki ïthwa.

²¹Bäŋ wï jur bäät piny kany mo caala jiyï ma jø Icriel, jøøa wïïlï wøk na tïïyï na jiyï, ni tïïyï nyeŋŋï nee wïnye ki køør jammi moa døøŋŋø mo di lwäärö na tïïyï, ni riemï wïth juurre wøk nyïmge, kanya kälï ge wøk ki Ijep.

²²Wui Wuuö Jwøk, jiyï ma jø Icriel atïïyï na thöögï na bäre bäre, ni tïmï ni ïïna Jwøk marge.

²³«'Ba ennø, ï na Wuuö Jwøk, luubö mana caanï kipera, a na dhaanhnhï, ki dhi øtø mara, beerra man putï gø wëëk thur kare na bäre, ni tïïyï gø kaawat mana nø caanï gø.

²⁴'Ba nyeŋŋï obëëdö ni dwøŋ no okëët piny ni teek na bäre bäre, ni kö jiyi, ni ‹Wuuö Jwøk, eni na wïth jammi bëët, beeye Jwøka eni mar jø Icriel, ni beeye Jwø Icriel møn.› 'Ba a na dhaanhnhï ma Deebit en, put dhi øtø mara tïïc ni teek nyïmï.

²⁵«Wui, ï na Jwøk mara, gïnögø anø nyoothï jïra, a na dhaanhnhï, ni kööï ni dhi øtø mara tïïyï tïïö ni teek. Kiper manøgønø, a na dhaanhnhï en, cwïnya ajïtö ki cer ki man läma nyïmï.

²⁶'Ba ennø, ï na Wuuö Jwøk, bee ï na Jwøk møn; ni bee ï na buuk luummi en na beer jïra, a na dhaanhnhï.

²⁷'Ba ennø, iï anø mïnnö ni nø gwïëthï dhi øtø mara, a na dhaanhnhï en, nee tïme ni puta bëëte ni nut na bäre bäre nyïmï. Wui Wuuö Jwøk, dhi øtø mara anø gwïëthï, ni put gwïëthi manøgø bëëte ni nut na bäre bäre. Enøgønø.»