Read anuak 1 Luup Nyeye 20 Bible Online

1 Luup Nyeye 20 - anuak bible

1 Luup Nyeye 20

¹'Ba kanya tïme ni piny otal ni bäŋ køth këët, ni beeye kany wø ci nyeye baŋ mäny, Jöap jø leny mo jø Icriel abwøth wøk, ni ö jøøgø ni cige ni raanyge po jø Amön ni putge päänya dwøŋ na cwøl ni Raaba tieø dïër. 'Ba Deebit odööŋ yi Jerucalem. Ni ö Jöapi ni nyak Raaba ni raany gø.

²Køøre Deebit aduda mar nyeya mar jøøgø aput lwør wï gø. 'Ba aduda manøgø tïïc ka warkey mo peek døc ma rumi ma kikar aciel, ni yie da waŋ kïdi mo pere leth; ni ö aduda manøgø ni puti kïth wï Deebit. 'Ba Deebit gïïa twiere pääny manøgø beege gïï mo thööth døc.

³'Ba Deebit thuwø, jøøa bøth yi pääny manøgø amaae ni käl ge wøk, ni kïth ceŋge ki lïge, ki teeŋ jap tïïc mo tïïc ka nywïëny, nee ge tïïge ki ge. Ni ö Deebiti ni tïïc teeŋ gïnögø dëët jøøa en yïth päänye bëët mo jø Amön. Køøre Deebit ki jø leny moe bëët gena put døø Jerucalem.

⁴'Ba na tïme na køøre cään, leny mør acäŋ këëllö ki jø Pilitin yi Gëdher. Kanyøgønø, Cibekay nyï Uca, nyen mo nyeŋŋe cwøl ni Cipay mo käla ri tuuŋ jøøa bäyö døc ni dëëtge døøŋŋø[4] aput näk, ni ö jø Pilitin ni bööt geni.

⁵Ni ö lenynyi mør ni cäŋi këëllö ki jø Pilitin kaace thuwø. 'Ba El-Anan o Jayer, Laami anääe, ni beeye Laami cöök Göliati nyï Gëth, nyen mo thiir tøŋ mare caala athøra.

⁶Køøre leny mør acäŋ këëllö Gëth; 'ba da dhaanhø kaaca mo bäär døc ni dëëre dwøŋ, mo lweet ceŋŋe abïciel abïciel, ni lweet tiete thuwø abïciel abïciel, ni lweete ge bëët beege pïërariiø kurŋween. 'Ba eni thuwø nywöli ka ri tuuŋ jøøa bäyö døc ni dëëtge døøŋŋø.

⁷'Ba kanya ö nyenøgø na ŋwöe bäät jø Icriel, Jönathan o Cimia, ni beeye Cimia cöök Deebiti, nyenøgø anääe.

⁸'Ba jøøgø bëët ge nywöli ka ri tuuŋ jøøa bäyö døc ni dëëtge døøŋŋø na en Gëth; 'ba geni gena näk Deebiti ki jø leny moe.