Read anuak 1 Luup Nyeye 22 Bible Online

1 Luup Nyeye 22 - anuak bible

1 Luup Nyeye 22

¹Køøre Deebit aköö, ni «Øt Wuuö Jwøk tïmö ni ena kany, ki gïn wø cïp olämme bääte mo wø waaŋ bäre kiper jø Icriel.»

²Kanyøgø Deebit aöötö ki dwøl kiper nee jiy moa näk juurre na path ni wø bëëdö Icriel nee cooŋ; ni tïïc møøk røkge na jø tieŋ kïte, ni jiiŋge kïte ni tïïcge ge ni mïërö kiper øtø mano geer jï Wuuö Jwøk.

³Ni ö Deebit ni cuŋ piny ki nywïëny mo thööth kiper nee tïïö ki mucumääre ki gïï wø maa dhøk kiir piny ki ge kiper odhuule mo dhøk kiir; ni cuŋ piny thuwø ki nywïëny ma jwëëlli mo thööth mo ba løny ki kwaan.

⁴Ni cuŋ piny thuwø ki jenni moa perge leth mo ba løny ki kwaan, moa käl jø Caydan ki jø Tayar jïre.

⁵Kanyøgø Deebit aköö, ni «Wääda ma Cølöman poot thiinh, ni kär ŋïyö ki tïïc; 'ba øtø mano geer jï Wuuö Jwøk tïmö ni mïërö døc ni ŋäc ki baŋ wïth juurre bëët. Kiper manøgønø, aani jammi mo tïïi ki gø jiiŋŋa jiiŋŋø kipere.» 'Ba Deebit jammi mo thööth ajiiŋŋe ni eni poot kär thøw.

⁶Køøre Deebit wääde ma Cølöman acwøle ni kööm gø nee Øt Wuuö Jwøk, Jwø Icriel, geere.

⁷Ni kö Deebiti jï Cølöman, ni «Nyie wääda, geer øtø kiper nyeŋ Wuuö Jwøk, Jwøk mara beeye gïn mo yaa cooŋø ki cwïnya cøøn.

⁸'Ba dwør Wuuö Jwøk aö baŋa ni kööe, ni ‹Ïïna kuny piny ki remø mo päl ni këëdï ki lenye mo døøŋŋø. Ba løny ki man gëëdï ki øtø kiper nyeŋŋa, kiper ïïna kuny piny ki remø mo päl nyïma bäät piny.

⁹'Ba ïïno jïtï ki nyilaal ma dïcwøø, ni beeye ŋato bëëdö no ojwöm, ni mooa eni ki jwöm kun ki kun ki baŋ nyïïmän moe bëët. 'Ba aani a cïpö ki bëët mëër ni tïïa Icriel no onikwöc ki yïth nïr nyec mare.

¹⁰'Ba bee eni noo gëëdö ki øtø kiper nyeŋŋa, ni tïme na wääda ni tïma ni aana wänni. 'Ba tier buc nyec mare këëlla piny nee bëëde na bäre bäre bäät jø Icriel.›

¹¹«'Ba ennø wääda, Wuuö Jwøk obëëdö ki ïïni, ni wëëk geer man thur kare man geerï øt Wuuö Jwøk, Jwøk marï, kaawat mana caane kiperï.

¹²Wuuö Jwøk ïïno mooe ka acaare ki ŋäc tiet luup ki man gwøgï ciik moe, eni na Wuuö Jwøk, Jwøk marï, kanyo tïïc ïïni na bwödhi mar jø Icriel.

¹³'Ba jammi moo tïïyï othur karge jïrï ni näk mo ciik moa cïp Wuuö Jwøki jï Modhe kiper jø Icriel iï gwøø. Mak riï nø, ni bëëdï niï teek; ni ba bwøk cwïnyï ni ba lwäyï.

¹⁴«'Ba ennø, aana tïïö ki tïïc mo dwøŋ mo leth naa jiiŋŋa jammi kiper tïïc mar øt Wuuö Jwøk. Ni jammi moa jiiŋŋa beege warkey ma rumme ma kikarri ma kume ma dïpa, ki gwet-bïrö ma rumme ma kikarri ma miilïën, ki nywïëny mo wø cwøl ni ayrön,[6] ki nywïëny ma jwëëlli mo ba løny ki kwaan, kiper ge thööth døc, ki jenni, ki kïte. Køøre nø, ïïno mëët bäätge.

¹⁵'Ba ïïni jïrï da jø tïïc mo thööth mo nyeŋge reegø ki man tïïcge tïïe ma teeŋi, ni beege jø tieŋ kïte, ki jø caam kïte, ki dïjëëth opämi.

¹⁶'Ba ennø, täk tïïc nø ki jammi moøgø, ni beege warkey, ki gwet-bïrö, ki nywïëny mo wø cwøl ni ayrön, ki nywïëny moa näk jwëëlli mo ba løny ki kwaan. 'Ba Wuuö Jwøk bëëde ki ïïni.»

¹⁷Kanyøgø Deebit dïbwöthe mo Icriel bëët aput köömmö nee wääde ma Cølöman kønyge.

¹⁸Ni kööe jïge, «?Aŋø, paa Wuuö Jwøk, Jwøk maru, na en buutu? ?Aŋø, patha eni na cïpö jïïu ki jwöm kun ki kun? Kiper beeye eni na cïp wïth juurre cera moa en yi ŋöömmi, ni tïmge ni ge ena tier Wuuö Jwøk ki jiye.

¹⁹'Ba ennø, cïpu cwïnynyu bäre ki jwïëyu bäre ni manynyu Wuuö Jwøk, Jwøk maru, ni tägu geer øtø mana en kur keere mar Wuuö Jwøk, kiper na acanduk man wø nyooth luumma tuut Wuuö Jwøki ki jiy, ki jammi moa perge leth mo Jwøk moa en kur keerge, nee käli ni kïthi yi øtø mano geer kiper nyeŋ Wuuö Jwøk.»