Read anuak 1 Luup Nyeye 23 Bible Online

1 Luup Nyeye 23 - anuak bible

1 Luup Nyeye 23

¹'Ba kanya tïm Deebiti na jaal ni cwiiye oløny ni thööth, wääde ma Cølöman arøønye na nyeya mar jø Icriel.

²'Ba Deebit bwöthe mo jø Icriel bëët, ki dïlämme, ki jø tuuŋ Libay, acooŋe.

³Kanyøgø, jø tuuŋ Libay moa näk cwøw moa näk cwiicge opäŋ na pïëradäk këël kunece, aput kwaan, ni tïm kwäänge na kume ma pïëradäk ka abära.

⁴'Ba ki røk jøøgø, jiy ma kume ma pïërariiø ka aŋween akwany ni beege jø wø raŋ tïï øt Wuuö Jwøk; ni ö jiyi ma kume abïciel ni kwanyi na kwääri ki dïŋut luup;

⁵ni ö jiyi ma kume aŋween ni kwanyi na jø wø koor dhi kal; ni ö jiyi ma kume aŋween thuwø ni kwanyi na jø pwøc Wuuö Jwøk ki wïth jap dööti ma teeŋi moa tïïc Deebiti kiper pwøc.

⁶Ni ö Deebiti ni cïïm jøøgø na dhøgi ki køør wäät Libay, ni beege Gërcön, ki Kät, ki Mërari.

⁷Ki ri dhi øt Gërcön beege: Ladan ki Cimiy.

⁸'Ba wäät Ladan gena adäk, ni bee Jikiël na näk kanynye, ki Jetham, ki Jool,

⁹jøøa put tïmö na wïth dhøk uudi mo jøøa käl dëër Ladan. 'Ba wäät Cimiy gena adäk thuwø, ni beege Cëlömöth, ki Ëjiel, ka Aaren.

¹⁰Køøre Cimiy acäŋ jïtö ki wääte aŋween møøk, ni beege Jakath, ki Jina, ki Jeuc, ki Beria.

¹¹Jakath beeye wääde mana dïkwøŋ, ni rietge beeye Jija. 'Ba Jeuc ki Beria bäŋ wäätge mo thööth mo ege nywølø. Kiper manøgønø, gena dwal ri dhi øtø aciel.

¹²'Ba wäät Kät moa na aŋween beege: Amram, ki Icaar, ki Keeprön, ki Udhiel.

¹³'Ba wäät Amram beege Aran ki Modhe. 'Ba Aran acïp kur keere kiper tïï jammi moa en kur keerge, ni bee eni ki wääte, ki nyïïkwaaye, nee gïn wø jïye ŋwääi ni met nee wø waaŋe nyïm Wuuö Jwøk, nee bëëde ni tïnynya Wuuö Jwøk, ni gwëëdhö ka nyeŋ gø na bäre bäre.

¹⁴'Ba wäät Modhe na näk dhaanh Jwøk akwaan dëët jø tuuŋ Libay.

¹⁵Wäät Modhe beege Gërcöm ki Eliëdher.

¹⁶'Ba Gërcöm wääde mana bëëdö na bwödhi beeye Cebuël.

¹⁷'Ba Eliëdher wääde mana bëëdö na bwödhi beeye Rebiya. Eliëdher bäŋ wääte møøk. 'Ba wäät Rebiya thööth døc.

¹⁸'Ba Icaar wääde mana bëëdö na bwödhi beeye Cëlömith.

¹⁹'Ba wäät Keeprön beeye kanynye ma Jeriya, ni rietge beeye Amariya, ni dääge beeye Jadhiël, ni ŋweerge beeye Jekamem.

²⁰'Ba wäät Udhiel beeye kanynye ma Mikiya, ni rietge beeye Iciya.

²¹'Ba wäät Mërari beege: Maali ki Muci. Ni wäät Maali beege Eliedhar ki Kic.

²²'Ba Eliedhar athøw ni bäŋ obwöre ma cwøw mo ee nywølø; 'ba beege mään keerge na nywøle. Kiper manøgønø, nyïïe anywøm wäät coki ma Kic ni tïmge na mään jïge.

²³'Ba wäät Muci moa näk adäk beege Maali, ka Adër, ki Jerëmöth.

²⁴Moøgø beege jø tuuŋ Libay ki køør dhøk uudi moge ki bwöthe mo dhøk uudi moge. 'Ba nyïïkwaacge moa näk cwiicge opäŋ na pïërariiø këël kunece akwaan ki køør nyeŋge kiper nee bëëtge ni ge tïïya tïïe mo øt Wuuö Jwøk.

²⁵Kiper Deebit aköö, ni «Wuuö Jwøk, Jwø Icriel, acïpö ki jwöm jï jiye. Eni bëëdö yi Jerucalem na bäre bäre.

²⁶Kiper manøgø, jø tuuŋ Libay oduŋkaany røømmø ki jap paac mo wø tïïö yie ki ge bëët ba käärge këët.»

²⁷Køøre ki ra aŋuun luup mo Deebit ena köö ni jø tuuŋ Libay ki mano täge ri moa näk cwiicge pïërariiø këël kunece ge di kwaanø.

²⁸'Ba tïïc mar jø tuuŋ Libay aput tïmö ni ge køønynya nyïïkwaac Aran ki tïïe mo øt Wuuö Jwøk, mo wø en yi kal, ki mo wø en yi øtø, ki tïïc jammi bëët ni waany mo wø en kur keerge, këël ki tïïc tïïe møøk thuwø mo wø tïïc yi øt Wuuö Jwøk,

²⁹ki tïï jiiŋ muunni moa näk ocwøbø na näk nyuuthe, ki tïï muunni moa pøøth moa cïp na muuce mo beel, ki muunni moa näk odeelø, ki teeŋ muunni mo wø cwøp ka athaa wala mo wø coot, ki tïï jap røm bëët.

³⁰'Ba kany wø tïme na amöölla ka abøøya cooth, ge bëëdö ni ge cuŋŋö ni ge dwøga met ec ki pwøc jï Wuuö Jwøk,

³¹këël kany wø cïp olämme mo wø waaŋ bäre jï Wuuö Jwøk ki cäŋ jwömö, ki kany wø päär dwääyi, ki kwör ajwöm moa näk ocïp piny cooth. 'Ba kwään jø tuuŋ Libay mo wø tïïö cooth nyïm Wuuö Jwøk ocïp piny na ciik.

³²'Ba jø tuuŋ Libay ge bëëdö ni ge gwøga oduŋkaany røømmø ki kar lam mana en kur keere, ni gwøkge tuuŋge ma nyïïkwaac Aran kiper tïïe mo øt Wuuö Jwøk.