Read anuak 1 Luup Nyeye 26 Bible Online

1 Luup Nyeye 26 - anuak bible

1 Luup Nyeye 26

¹'Ba nyeŋ jiy moa näk ocïïmmö na jø koor dhi kal mar Øt Jwøk beege ii: ki røk jiy moa käl dëër Köra, ki ri dhi øt Acaap, beeye Mecelemiya o Körë.

²'Ba Mecelemiya wääte dagø, ni kanynye beeye Dhekaraya, ni rietge beeye Jediel, ni dääge beeye Dhebadiya, ni ŋweerge beeye Jatniel,

³ni bïïge beeye Ilam, ni bïcierge beeye Jöanan, ni bïrietge beeye Eliyönay.

⁴'Ba dhaanhø maya bee Obet-Idöm ki wääte, ni nyeŋ kanynye beeye Cemaya, ni rietge beeye Jödhabat, ni dääge beeye Jöa, ni ŋweerge beeye Cakar, ni bïïge beeye Natanel,

⁵ni bïcierge beeye Amiel, ni bïrietge beeye Icakar, ni bäcge beeye Pelethay. 'Ba obwöre moøgø acïp Jwøki jïre ka køør gwïëth.

⁶'Ba dhaanhø maya thuwø bee Cemaya wär Obet-Idöm manøgø, ni beeye Cemaya mana nywøl obwöre moa käär dhi øt wääge, kiper gena jiy mo teek mo tïïc løny jïge.

⁷'Ba Cemaya manøgø, wääte beege Øthni, ki Repaël, ki Obet, ki Eldhabat, ki uut wääge, ni beege Eliyu ki Cemakiya, jøøa bëëdö na jiy mo teek ni tïïc løny jïge.

⁸Moøgø bëët beege jøøa käl dëër Obet-Idöm; geni ki wäätge ki jø tuuŋge gena jiy mo ge teek, ni tïïc løny jïge. Kwäänge bëët, ge na käl dëër Obet-Idöm, gena pïërabïciel ka ariiø.

⁹'Ba Mecelemiya jïre da wääte ki jø tuuŋge ma apaar ka abära, ni beege jiy mo teek ni tïïc løny jïge.

¹⁰Dhaanhø aciel maya thuwø ki røk jøøa käl dëër Mërari beeye Öca. Öca wääte dagø. Wääde mana dïkwøŋ beeye Cimri; 'ba Cimri patha eni na kwøŋ nywøl, tïïya wänni jaak ni mana dïkwøŋ.

¹¹Rietge beeye Kilkiya, ni dääge beeye Tebaliya, ni ŋweerge beeye Dhekaraya. Kwään wäät Öca ki jø tuuŋge bëët, gena apaar kurdäk.

¹²Jøøgø no ocïïmmö yøø na jø koor dhi kal, tïïc apääŋŋi jïge ki køør bwöthe moge kaamar tuuŋge ki man tïïge yi øt Wuuö Jwøk.

¹³Køøre geni bëët, jøøa kwörge therø ki jøøa kwörge døøŋŋø, gïï wø tïïc na nyuuthe aleeŋge ki køør dhøk uudi moge kiper jø koor dhi kal man nø nee joot.

¹⁴Kanyøgø nyuudhi mana näk nyootha dhi kal mana en jï løø kur tuul-cäŋ, aö wøk ki nyeŋ Celemiya, ni ö nyuudhi maya mana leeŋge ni nyooth dhi kal mana en jï løø wï piny, ni ö wøk ki nyeŋ Dhekaraya, o Celemiya man wø ŋäc tiet luup ni wø cïpi ka acaare.

¹⁵'Ba nyuudhi mana ö wøk ki nyeŋ Obet-Idöm, beeye mana näk nyootha dhi kal mana en jï løø tier-piny. Køøre wääte akïth øt kän jammi nee koorge.

¹⁶'Ba nyuudhi mana ö wøk ki nyeŋ Cupim ki Öca, beeye mana näk nyootha dhi kal mana en jï løø kun wø päth cäŋŋi yie, dhi kal man wø cwøl ni Caleketh, ni wø en yi waŋjöör wø eth maal ki yie. Ba ge na jø koor gena cïïmmi ri koor na ennø nø:

¹⁷Cooth ki yi cäŋ ki jï løø kur tuul-cäŋ, da jø tuuŋ Libay abïciel, ki jiy aŋween kiper jï løø wï piny, ki jiy aŋween thuwø kiper jï løø tier piny mo cïba kwörögø nee koorge; ki jiy ariiø ariiø mo koor øt kän jammi.

¹⁸'Ba buut kany wø gääp jiyi yie ki jï løø kun wø päth cäŋŋi yie, yi waŋjööra dwøŋ, da jiy aŋween. 'Ba kany wø gääp jiyi yie kiree da jiy ariiø yie thuwø.

¹⁹Moøge beege jøøa käl dëër Köra ki jøøa käl dëër Mërari na bëëdö na jø koor dhøk kal, ki yi jöö mana cïïm geni ki gø ri koor.

²⁰'Ba jø tuuŋ Libay møøk gena jier na jø raŋ uut kän jammi mo Øt Jwøk ki uut kän jammi moa näk ocïp kur keerge na mo Jwøk.

²¹'Ba ki røk jøøa käl dëër Gërcön, Ladan ena bëëdö na kwar dhøk uudi mo thööth, ni kuure ka dhi øt wääde ma Jikiëli.

²²'Ba wäät Jikiëli, ni beege Jetham ki coki ma Jool, gena jier na jø raŋ uut kän jammi mo Øt Wuuö Jwøk.

²³'Ba da jø møøk mo ojierø na jø koor ki røk nyïïkwaac Amram, ki røk nyïïkwaac Icaar, ki røk nyïïkwaac Keeprön, ki røk nyïïkwaac Udhiel.

²⁴'Ba Cebuël, na käl dëër Gërcöm o Modhe, ena jier na kwäärö man raŋ uut kän jammi.

²⁵'Ba jø tuuŋge moa käl dëër Eliëdher, bee Rebiya, køøre ki Jicaya, køøre ki Jöram, køøre ki Dhikri, køøre ki Cëlömöth.

²⁶'Ba Cëlömöth manøgø ki jø tuuŋge gena jier na jø raŋ jammi bëët moa näk ocïp kur keerge na mo Jwøk, ni beege jammi moa cïp nyeya ma Deebit, ki bwöthe mo dhøk uudi, ki kwääc lwaa kume ki kwääc lwaa dïpe, ki kwääc lwaae møøk mo leny.

²⁷Gena cïpö røk jammi moa twierge ri leny kiper nee kwöra näk oränynyö ri Øt Wuuö Jwøk dwøkge kare ki gø.

²⁸'Ba jammi moa cïp Camielli, ŋat wø car luup ki køør man wø nyooth Jwøki jïre, ki Cøøl o Kic, ka Abinër o Nër, ki Jöap o Dheruya, ki moa cïp jiyi møga bëët, japøgø bëët ni en kur keerge yøø na mo Jwøk, acïp cer Cëlömöth ki jø tuuŋge.

²⁹'Ba ki røk jøøa käl dëër Icaar, Kenaniya ki wääte, gena jier ni møøk a kwääri, ni møøk a dïŋut luup kiper jø Icriel, ni tïïc marge ena wøk ki Øt Jwøk.

³⁰'Ba ki røk jøøa käl dëër Keeprön, Acabiya ki jø tuuŋge, gena jier na jø en luupi ceŋge mo jø Icriel mo wø en jï kun wø päth cäŋŋi yie jï løø Naam Jördan løøga, kiper tïïe bëët mo Wuuö Jwøk ki tïïe mo nyeya. 'Ba gena jiy mo teek ni tïïc løny jïge, ni kwäänge beege kuma aciel ki dïpe abïriiø,

³¹ni bwödhi mar jø dhi øt Keeprön beeye Jeriya. 'Ba kanya tïm cwiic Deebit na pïëraŋween bäät nyec, yi jöör tuuŋ mar jø dhi øt Keeprön amanynyi, ni joot jiy mo teek mo tïïc løny jïge yïthakicge kany mo cwøl ni Jadher mo ena Gelät.

³²'Ba Jeriya ki jø tuuŋge, jøøa teek na näk tïïc løny jïge na bëëdö na bwöthe mo wïth dhøk uudi, gena tïïc nyeya ma Deebit na kwääri mo wø raŋ bëët jiy bäät jø tuuŋ Ruben, ki bäät jø tuuŋ Gaat, ki bäät thääŋ jø tuuŋ Maneeca, kiper luup bëët mo Jwøk ki mo nyeya; ni kwäänge beege kume ariiø ki dïpe abïriiø.