Read anuak 1 Luup Nyeye 27 Bible Online

1 Luup Nyeye 27 - anuak bible

1 Luup Nyeye 27

¹'Ba moi beege jø Icriel moa näk okwaanø, ni beege dïbwöthe mo dhøk uudi, ki kwääc lwaa kume mo leny, ki kwääc lwaa dïpe mo leny, ki dïbwöthe moge mo wø tïny nyeya ni ge raŋŋa tïïe ki luup bëët mo dhøgi mo leny mo wø tïïö ki yi dwääy man nø ki dwääy man nø yi cwiir bäre, ni dhøk man nø yie da jiy ma kume ma pïërariiø kurŋween.

²'Ba Jacöbiam o Dhabdïël, dhøk mar lwaa leny mana dïkwøŋ kiper dwääy mana dïkwøŋ ena cere, ni dhøk mar lwaa leny mare yie da jiy ma kume ma pïërariiø kurŋween.

³'Ba eni käla ri Peereth, ni ena bwödhi mar kwääc lwaae bëët mo leny kiper dwääy mana dïkwøŋ.

⁴'Ba Döday nyï Aköki, dhøk mar lwaa leny kiper riet dwäde ena cere. 'Ba ŋata en tiere na bwödhi mar dhøk mare beeye Miklöth; ni dhøk manøgø yie da jiy ma kume ma pïërariiø kurŋween.

⁵'Ba kwääc lwaa leny kiper dää dwäde beeye Benaya o Jööda na bëëdö na dïlämi mana dwøŋ; ni dhøk mare yie da jiy ma kume ma pïërariiø kurŋween.

⁶'Ba Benaya manøgø beeye ŋata teek na bëëdö na wïth jø leny moa näk pïëradäk; 'ba ŋata bëëdö na bwödhi bäät dhøk mare beeye wääde ma Amidhabad.

⁷'Ba kwääc lwaa leny kiper ŋweer dwäde beeye Acaël cöök Jöap, ni ŋata caath køøre beeye wääde ma Dhebadiya; 'ba dhøk manøgø yie da jiy ma kume ma pïërariiø kurŋween.

⁸'Ba kwääc lwaa leny kiper bïï dwäde beeye Camut nyï Idhar; ni dhøk mare yie da jiy ma kume ma pïërariiø kurŋween.

⁹'Ba kwääc lwaa leny kiper bïcier dwäde beeye Ira wär Ikëc nyï Tëköa; ni dhøk mare yie da jiy ma kume ma pïërariiø kurŋween.

¹⁰'Ba kwääc lwaa leny kiper bïriet dwäde beeye Këleth nyï Pelön na käl ri Ipariem; ni dhøk mare yie da jiy ma kume ma pïërariiø kurŋween.

¹¹'Ba kwääc lwaa leny kiper bäc dwäde beeye Cibekay nyï Uca na käl ri Dheera; ni dhøk mare yie da jiy ma kume ma pïërariiø kurŋween.

¹²'Ba kwääc lwaa leny kiper bïŋweer dwäde beeye Abiedhar nyï Anathöth na käl ri Benjamen; ni dhøk mare yie da jiy ma kume ma pïërariiø kurŋween.

¹³'Ba kwääc lwaa leny kiper paac dwäde beeye Maaray nyï Nethöpa, na käl ri Dheera; ni dhøk mare yie da jiy ma kume ma pïërariiø kurŋween.

¹⁴'Ba kwääc lwaa leny kiper paac kurcier dwäde beeye Benaya nyï Pirathön, na käl ri Ipariem; ni dhøk mare yie da jiy ma kume ma pïërariiø kurŋween.

¹⁵'Ba kwääc lwaa leny kiper paac kurriet dwäde beeye Kelday nyï Nethöpa, na käl ri Götönial; ni dhøk mare yie da jiy ma kume ma pïërariiø kurŋween.

¹⁶'Ba jøøa bëëdö na wïth tuŋi mo jø Icriel beege ii: Bwödhi mar jø tuuŋ Ruben beeye Eliëdher o Dhikri. 'Ba bwödhi mar jø tuuŋ Cimien beeye Cepathiya o Maika.

¹⁷'Ba bwödhi mar jø tuuŋ Libay beeye Acabiya o Këmuël. 'Ba bwödhi mar jø tuuŋ Aran beeye Dhadök.

¹⁸'Ba bwödhi mar jø tuuŋ Juuda beeye Eliyu cöök Deebit. 'Ba bwödhi mar jø tuuŋ Icakar beeye Ømri o Mikaël.

¹⁹'Ba bwödhi mar jø tuuŋ Dhebulan beeye Yicmaya wär Øbadiya. 'Ba bwödhi mar jø tuuŋ Naptali beeye Jerëmöth wär Adhiriel.

²⁰'Ba bwödhi mar jø tuuŋ Ipariem beeye Awcë wär Acaciya. 'Ba bwödhi mar thääŋ jø tuuŋ Maneeca beeye Jool o Pedaya.

²¹'Ba bwödhi mar thääŋ jø tuuŋ Maneeca moa en Gelät beeye Idö o Dhekaraya. 'Ba bwödhi mar jø tuuŋ Benjamen beeye Jaciel wär Abinër.

²²'Ba bwödhi mar jø tuuŋ Daan beeye Adharël o Jeröam. Jøøgø bëët beege kwääri mo wïth tuŋi mo jø Icriel.

²³'Ba Deebit cwøw moa näk cwiic dööŋö moge pïërariiø ki moa näk ena piny ki pïërariiø käre kwaanø, kiper luubö mana caan Wuuö Jwøki ni jø Icriel tïïe tïïö ni thööth kaamar ceer mo maal.

²⁴Kanyøgø Jöap o Dheruya ena tägö ki man kwaan cwøw, 'ba käre thöörö. 'Ba wëëc Jwøk aö bäät jø Icriel kiper luummögø, ni ö kwäänö mana tïïc ni käri göör piny yi Wëël Luup Nyeya ma Deebit.

²⁵'Ba Adhemawët wär Adiel, uut kän jammi mo nyeya acïp cere. 'Ba Jönathan wär Udhaya, uut kän jammi moa en wøk, ki moa en yïth päänye, ki moa en yïth atude, ki moa en yïth uut koor mo ogeerø ni bäyö, acïp cere.

²⁶'Ba Idhiri o Kelub, jø wø tïïö yïth pwöth, ni beege jø puur, acïp cere.

²⁷'Ba Cimiy nyï Reema, pwöth jer omøki acïp cere. 'Ba Dhabdi nyï Cipam, uudi moa en tiet ŋøøm mo wø kan kwøk nyïïomøki yïthge, acïp cere.

²⁸'Ba Baal-Anan nyï Gëëdir, jenni mo wø nyïïge wel na maaw ko olämmi moa en yïth ŋøøpa näk rege ege päärö, acïp cere. 'Ba Jöac, kany wø bëët mädhi yie acïp cere.

²⁹'Ba Citari nyï Carön, dhäk moa en kwör kwaath moa en Carön acïp cere. 'Ba Capath wär Adali dhäk moa en kwör kwaath moa en yïth gøli acïp cere.

³⁰'Ba Öbil nyï Icmiel, athïrööle acïp cere. 'Ba Jekdiya nyï Mërönöt, arëëni acïp cere.

³¹'Ba Jajij nyï Agri, pïïth dïëk acïp cere. 'Ba jøøgø bëët beege kwääri mo wø neet jammi moa näk mo nyeya ma Deebit.

³²'Ba ŋata wïïe leer ni wø cïpi ka acaare, ni wø gööt piny, beeye Jönathan näär Deebit. Ni ö Jikiëlli wär Akimöni ni tïme na ŋat wø pwöny wäät nyeya.

³³'Ba Akithöpël thuwø beeye ŋat wø cïpi ka acaare jï nyeya. 'Ba Ucay nyï Arki beeye nyawat nyeya.

³⁴'Ba Akithöpël jiy moa läw kare beege Jööda o Benaya, ka Abiethaar. 'Ba Jöap beeye kwääc lwaa leny mar nyeya.