Read anuak 1 Luup Nyeye 28 Bible Online

1 Luup Nyeye 28 - anuak bible

1 Luup Nyeye 28

¹'Ba Deebit kwääri mo Icriel bëët acooŋ yi Jerucalem, ni beege kwääri mo wïth tuŋi mo Icriel, ki kwääc lwaae mo jiy moa näk ocïïmmö na dhøgi na jø tïny nyeya, ki kwääc lwaa kume mo leny ki kwääc lwaa dïpe mo leny, ki jiy mo wø raŋ jammi bëët ki lääc paac moa näk mo nyeya ki mo wääte, ki jaae mo paan dwøŋ, ko otëëe mo leny, këël otëëe moa teek ki leny døc.

²Køøre Deebit acuŋŋö ni kööe, ni «U na nyïïmëëga, ni bee u jiy 'moa, cegu ïthu ni wïnynyu mara! Aani, aana cädö ki man gëëda ki øtø mo bëëdö ki kany mo bäär kiper acanduk man wø nyooth luumma tuut Wuuö Jwøki ki jiy, nee tïme thuwø ni beeye køøm tiet Wuuö Jwøk. 'Ba dëëra yaa nø jiiŋŋø ki man geera gø.

³'Ba Jwøk aköö jïra, ni ‹Paa ïïni noo gëëdö ki øtø kiper nyeŋŋa, kiper ïïna dhaanhø ma ŋat leny mo rem jiy iï køny piny.›

⁴«'Ba eni na Wuuö Jwøk, Jwø Icriel, aana jiere ki røk jø dhi øt wära bëët naa tïma ni aana nyeya mar jø Icriel na bäre bäre. Kiper eni tuuŋ Juuda ajiere na bwödhi. 'Ba ki røk dhøk uudi mo jø tuuŋ Juuda, dhi øt wära beeye na jiere, ni kwäny a wøk ki yïthakic wäät wära bëët, ni tïïc aani na nyeya bäät jø Icriel bëët ki køør met ec mare.

⁵'Ba ki røk wääta bëët moa thööth na cïp Wuuö Jwøki jïra, eni wääda ma Cølöman ajiere nee pï piny bäät wäl bura mar Wuuö Jwøk na nyeya mar jø Icriel.

⁶Køøre eni na Wuuö Jwøk aköö jïra, ni ‹Wäädï ma Cølöman bee eni noo geer øtø mara ki cwöt mara, kiper eni yaa jierø nee tïme na wääda, naa tïma ni aana wuuö jïre.

⁷'Ba aani tier bura mare këëlla piny, nee bëëde na bäre bäre, ni näk mo eni puta bëëtö ni gwøga ciik 'moa ki luup 'moa, kaawat man tïïi en.›

⁸«'Ba ennø, a köömma uuni nyïm jø Icriel bëët, ka acooŋ Wuuö Jwøk, ki nyïm Jwøk marø, gwøgu ciik Wuuö Jwøk eni na Jwøk maru, ni manynyu gø døc, kiper nee ŋøøpi ni beyø ii put bëëtö na mou, ni dööŋe jï wäätu ki jiy mo oööi køøru na bäre bäre.

⁹«'Ba kiperï, ï na wääda ma Cølöman en, bëëdï ni Jwøk ŋäyï, ni beeye Jwøa näk Jwø wäru, ni tïnynyï gø ki cwïnyï bäre ka acaayï bäre; kiper Wuuö Jwøk cwïny jiy nëënö jïre bëët, ni jammi bëët mo wø caar jiyi ŋääe. Ni näk mo iï manynyø, ree nyoodhe nyoodhø jïrï; 'ba ni näk mo iï wiiø, ï kwiere kwierø na bäre bäre.

¹⁰Raŋï ennø, Wuuö Jwøk ïïna jiere niï gëëdï ki øtø mo ena kur keere ma øt lam; mak riï ni teek nø, ni tïïyï gø.»

¹¹Kanyøgø Deebit yi jöö mana näk ee käl wøk mana dee Øt Jwøk geerø ki gø bäre aput wëëk wääde ma Cølöman, ni bee Øt Jwøk mana dwøŋ, ka agööla mare, ki uudi moe mo bëët jammi yïthge, ki uudi moe mo en maal, ki uudi moe mo en yie kuya, ki øtø mana en kur keere man wø bëët acanduki yie mana näk bääte da rëëbi man wø nyooth wëën raay;

¹²ki yi jöör geer øtø bäre mana näk ee käl wøk ki wïïe, kiper käälle mo Øt Wuuö Jwøk, ki uudi mo en jï wøk ki deŋ dëër øtø bäre, ki uudi mo kan jammi yïthge mo Øt Wuuö Jwøk, ki uudi mo kan jammi yïthge moa no ocïp kur keerge na mo Jwøk.

¹³Ni cïp yi jöör tïïc thuwø kiper dïlämme moa näk ocïïmmö na dhøgi, ge ki jø tuuŋ Libay, kiper tïïe mo Øt Wuuö Jwøk mo tïïc bëët, ki tïïc jap paac mo tïïö ki ge yi Øt Wuuö Jwøk.

¹⁴Ni caan rumme mo warkey kiper jap paac moo tïïc ki warkey kiper wïth tïïe ma teeŋi. Ni caan rumme mo gwet-bïrö kiper jap paac moo tïïc ki gwet-bïrö kiper wïth tïïe ma teeŋi.

¹⁵Ni caan rumme mo warkey kiper gïï wø cuŋ lambae bäätge mo tïïc ki warkey, ki lambae moge; ni caan rumme mo gwet-bïrö kiper gïï wø cuŋ lambae bäätge mo tïïc ki gwet-bïrö, ki lambae moge, ki køør yi tïïc mar gïn wø cuŋ lambae bääte man nø.

¹⁶Ni caan rumme mo warkey moo tïïc tharabëëte ki ge mo jiiŋ muunni bäätge moa näk ocwøbø na näk nyuuthe, ni ee rømø kiper tharabëëta man nø. Ni caan rumme mo gwet-bïrö kiper tharabëëte moo tïïc ki gwet-bïrö.

¹⁷Ni caan rumme mo warkey moo tïïc cäänne ki ge, ko ogubaye, ka apät nywïëny moo tïïc ni dhøkge okaaŋŋø. Ni caan rumme mo warkey kiper kuure moo tïïc ki warkey, ki rumme mo gwet-bïrö kiper kuure moo tïïc ki gwet-bïrö. 'Ba warkey ki gwet-bïrö ee rømø kiper man wø rømi ki kuura man nø.

¹⁸Ni caan rumme mo warkey mana tøŋ kiper tïï gïn wø waaŋ gïn wø jïye ŋwääi ni met bääte, ki rumme mo warkey kiper tïï gïna näk otïïö ni caala jääy, ni beege gïïa näk otïïö kaamar nyïïatwiet maal mo wø cwøl ni kirubëlli ni wø bëëdö ni bwöpge ege peerø bäät acanduk man wø nyooth luumma tuut Wuuö Jwøki ki jiy.

¹⁹Køøre Deebit aköö, ni «Jammi moøgø bëët beege jammi moa gööra na nyooth Wuuö Jwøki jïra, ki køør mana køny aani nee jöör tïïc manøgø bäre nee ŋääa.»

²⁰Køøre Deebit aköö jï wääde ma Cølöman, ni «Mak riï ni bëëdï niï teek, ni tïïyï gïïögø bëët; kärï lwäyö ni ba bwøk cwïnyï; kiper Wuuö Jwøk, eni na Jwøk mara, ena buutï. Eni ï ba wiie këël kanyo thum tïï jammi bëët mo wø tïïc Øt Wuuö Jwøk.

²¹Raŋï ennø, dïlämme ki jø tuuŋ Libay ocïïmmö na dhøgi kiper tïïe bëët mo Øt Wuuö Jwøk; ni da jiy mo nyeŋge reegø ki tïïc mo yïthge met ki man dwätge ki ïïni ki yïth tïïe moøgø bëët. Këël kwääri thuwø ki jiy bëët ge tïmö ni ge ena tierï ni ge wïnynya luummï.»