Read anuak 1 Luup Nyeye 29 Bible Online

1 Luup Nyeye 29 - anuak bible

1 Luup Nyeye 29

¹Køøre nyeya ma Deebit jø acooŋa bëët acäänne ni kööe, ni «Wääda ma Cølöman bee eni keere na jier Jwøki; 'ba ena nyilaal mo poot thiinh mo kär ŋïyö ki tïïc. 'Ba tïïc man dwøŋ, kiper øtø man ni dwøŋ en patha per dhaanhø; 'ba beeye per Wuuö Jwøk.

²'Ba ennø, ki køør mana no oløny jïra bäre aana cïpö ki jammi kiper Øt Jwøa. Aana cïpö ki warkey kiper jammi moo tïïc ki warkey; ni cïpa ki gwet-bïrö kiper jammi moo tïïc ki gwet-bïrö; ni cïpa ki nywïëny ma jwëëlli kiper jammi moo tïïc ki nywïëny ma jwëëlli; ni cïpa ki teeŋ nywïënyö mano cwøl ni ayrön [7] kiper jammi moo tïïc ki gø; ni cïpa ki jenni kiper jammi moo tïïc ki jenni; ni cïpa thuwø ki kïte mo perge leth, ki teeŋ kïte mo caami ki gø, ki teeŋ kïte mo ŋwaŋŋi ki gø, ki kïte ma kït ma teeŋi, ki wïth kïte bëët moa perge leth, ki wïth kïte møøk mo mïërö mo thööth.

³'Ba maya thuwø, ki køør met ec mara kiper Øt Jwøa, jammi moa en jïra, ni beege warkey ki gwet-bïrö, acïba no opöödhö ni ena maal ki jammi moa kwøŋa cïp kipere, eni na Øt Jwøa, ni beeye øt lam mana en kur keere.

⁴Ni jammi moøka beege warkie moa käl kanya cwøl ni Öpïr, ma rumme ma kikarri[8] ma kume adäk, ki gwet-bïrö mo oleenyø ma rumme ma kikarri ma kume abïriiø, kiper nee dëër øtø bäre jør ki ge,

⁵nee jammi moo tïïc rëëmme nee tïïc ki ge thuwø; ni warkey beeye kiper jammi moo tïïc ki warkey, ni gwet-bïrö beeye kiper jammi moo tïïc ki gwet-bïrö. ?'Ba ennø, ŋat mør aŋa ni many gø dïcäŋi nee dëëre cïbe bäre ki man jap cere jï Wuuö Jwøk?»

⁶Køøre dïbwöthe mo wïth dhøk uudi, ki kwääri mo wïth tuŋi mo jø Icriel, ki kwääc lwaa kume mo leny, ki kwääc lwaa dïpe mo leny, ge ki jiy mo wø raŋ tïïe mo nyeya, gena put cïpö ki muuce ki met ec marge.

⁷Ni jammi moa cïpge na muuce kiper tïï Øt Jwøk beege warkie ma rumme ma kikarri ma kume abïïc, ki warkie ma rumme ma dariki [9] ma kume apaar, ki gwet-bïrö ma rumme ma kikarri ma kume apaar, ki nywïëny ma jwëëlli ma rumme ma kikarri ma kume apaar ka abära, ki teeŋ nywïënyö mano cwøl ni ayrön ma rumme ma kikarri ma kume ma dïpa.

⁸'Ba jiy bëët moa näk jïge da kïte mo perge leth acïpge na muuce ni kïthi kar kän jammi mo Øt Wuuö Jwøk cer Jikiël na käl ri dhi øt Gërcön.

⁹Køøre jiy yïthge aput mïnnö kiper muuce moa cïpge ki met ec, kiper muuce acïpge ki cwïnyge bäre jï Wuuö Jwøk. Kanyøgø nyeya ma Deebit thuwø yie aput mïnnö døc.

¹⁰Køøre Deebit Wuuö Jwøk aput pwøc nyïm jiy ya acooŋa, ni kööe, ni «Wui Wuuö Jwøk, Jwø kwarwa ma Icriel, pwøc en jïrï na bäre bäre.

¹¹Wui Wuuö Jwøk, teek, ki dööŋö, ka ajiem, ki böödö, ki wödö en jïrï, kiper jammi bëët moa en maalø ki moa en piny beege moï. Wui Wuuö Jwøk, bura beeye marï, ni bee ï na wïth jammi bëët.

¹²Kwärö ki wödö käla baŋï, ni bee ï na wïth jammi bëët. Teek ki dööŋö ena baŋï, ni bee ï wø tïŋ nyeŋ jiy maal ni wø cïp teek jï jiy bëët.

¹³'Ba ennø, ï na Jwøwa, wa dwøga met ec jïrï, ni wa pwøya nyeŋŋï na näk nyeŋ ajiem.

¹⁴«?Aŋø, aani ki jiya, waana ŋaani nee lønye jïwa ki man cïpwa teeŋ japøgøøni ni thööth yøø? Kiper jammi bëët käla baŋï, ni beege moa jootwa baŋï ni cïpwa jïrï ii.

¹⁵Kiper waani, wa bëëdö ni waana wëëlle nyïmï ni waana jiy mo path, kaawat mana bëët kwäcwa. Nïr kwøw mowa bäät piny man caala tïpö, ni bëët kwøw man ba ŋääthwa.

¹⁶Wui Wuuö Jwøk, Jwøwa, jammi moi ni thööth bëët ii na cïpwa nee øtø geer kiper nyeŋŋï na en kur keere, käla baŋï, ni beege moï bëët.

¹⁷Wui ï na Jwøk mara, ï ŋääa ni cwïny jiy nëënö jïrï, ni mëëyï wø nyoothï nyoodhø jï jøøa cwïnyge thïïŋ. 'Ba aani ki køør leec cwïny mara, gïïögø bëët acïba ki met ec mara. 'Ba ennø, jiyï moi ni kany ii ajooda ni ge cïpö jïrï ki muuce ki met ec.

¹⁸Wui Wuuö Jwøk, Jwø kwäcwa ma Eeberam, ki Aydhak, ki Icriel, put acaara man wëëk bëëtö na bäre bäre cwïny jiyï; ni luuï cwïnyge baŋï;

¹⁹ni mooyï wääda ma Cølöman ki cwïny ma kare, nee ciik ki jammi bëët moa köömmï gø ki ge, nee gwøe na karge ni tïïc ge bëët, ni geer øt lam manøgø ki jammi moa näk yaa nø jiiŋŋø.»

²⁰Køøre Deebit aköö jï jø acooŋa bëët, ni «Ennø, pwøyu Wuuö Jwøk, eni na Jwøk maru.» Kanyøgø jø acooŋa bëët Wuuö Jwøk, Jwø kwäcge, aputge pwøc, ni këëlge cøŋge piny ni wøørge Wuuö Jwøk ki nyeya.

²¹'Ba na tïme na cäŋ maya, jø Icriel aput cïpö jï Wuuö Jwøk ko olämme ki teeŋ olämme møga mo wø waaŋ bäre, ni beege dhäk ma kuma, ki nyöök rööm ma kuma, ki nyïïrööm ma kuma, ni cïpge ka muuce mo kwøŋ na aciel; ni cïpge thuwø ko olämme mo thööth kiper jø Icriel bëët.

²²Kanyøgø gena put cämö ni mäthge yi cäŋ manøgø ki met ec mo dwøŋ døc nyïm Wuuö Jwøk. Ni cäŋge Cølöman o Deebit røønynyø na nyeya ni thïïmge wï gø ki maaw nee tïme na bwödhi nyïm Wuuö Jwøk. Ni ö Dhadök thuwø ni røønyge gø na Kwääy Lam Mana Dwøŋ.

²³Køøre Cølöman aput pï bäät wälu na nyeya kar wänni ma Deebit, ni beeye wälu mana cïp Wuuö Jwøki jï wänni. Ni ö Cølömanni ni käär tïïc na wøp ni eno jïëc jø Icrielli bëët.

²⁴Køøre bwöthe bëët, ki jiy moa teek, këël wäät nyeya ma Deebit bëët, gena put jïëy ki man bëënge nyeya ma Cølöman.

²⁵Ni ö Wuuö Jwøki ni tïŋ nyeŋ Cølöman maal døc nyïm jø Icriel bëët, ni mooc gø ka ajiem nyec mo poot bäŋ nyeya mo ee gø cïbö jïgø cøøn Icriel kanya poot Cølömanni.

²⁶'Ba Deebit o Jeci ena bëëdö na nyeya mar jø Icriel bëët.

²⁷Ena bëëdö ni ena nyeya ki cwiiri abïriiø yi Keeprön, ni bëëde thuwø ni ena nyeya ki cwiiri ma pïëradäk ka adäk yi Jerucalem. 'Ba cwiiri moa beede bëët ni ena nyeya mar jø Icriel beege cwiiri ma pïëraŋween.

²⁸Køøre ena thøw ni cwiiye thööth, ni jalø mare poot beer, ni bëëdö no okwär no owøørø. Ni ö wääde ma Cølöman ni dööŋe na nyeya kar gø.

²⁹'Ba jammi moa tïïc nyeya ma Deebit bëët ki mana täge këël aŋuunge mare ogöörö yïth luup moa göör Camielli, ŋat wø joot jammi ki køør man wø nyooth Jwøki jïre, ki yïth luup moa göör nyikuŋ Jwøki ma Nathan, ki yïth luup moa göör Gaati, na näk ŋat wø joot jammi thuwø ki køør man wø nyooth Jwøki jïre.

³⁰Luup moøgøøni cäänö kiper bëët nyec mare bäre, ki luum teek mare, ki jammi bëët moa tägö dëëre, ki moa tägö dëër paare ma Icriel, ki moa tägö yïth mïëri møga bëët.