Read anuak 1 Luup Nyeye 5 Bible Online

1 Luup Nyeye 5 - anuak bible

1 Luup Nyeye 5

¹Man beeye luum wäät Ruben na näk kany Icriel, ni beeye eni ŋata kwøŋ nywøl; 'ba kiper mana ci baŋ cï wänni ni bute ki gø, dööŋö mare aput wëëk wäät Jocep, ni ö beenhnhe moe ni käri göörö yi wëël nyeŋ ki køør dööŋö mare.

²'Ba Juuda atïmö no oteeø døc ki røk uutwänni, ni joot bwödhi ki ree; 'ba dööŋ kar poot ena baŋ wäät Jocep.

³'Ba Ruben na näk kany Icriel, wääte beege: Anök, ki Pallu, ki Eedharan, ki Karmi.

⁴'Ba jøøa käl ri Jool beeye: wääde ma Cemaya, ni Cemaya wääde beeye Göök, ni Göök wääde beeye Cimiy,

⁵ni Cimiy wääde beeye Mikiya, ni Mikiya wääde beeye Reaya, ni Reaya wääde beeye Baal,

⁶ni Baal wääde beeye Bëëra, ni beeye Bëëra mana no oteeø na käl ri tuuŋ Ruben, na mak Tiglat-Pilëëcër nyeny Aciria ki tøŋ.

⁷'Ba wïth dhøk uudi mo tuuŋ Ruben moa näk nyeŋge ogöör piny yi wëël nyeŋ beeye dhi øt Jïël na käl ri Dhekaraya,

⁸ki Bëla wär Acac, Acac o Cema, Cema o Jool. Ni ŋøøm moa beetge beeye ki mana täge pääny Aröör këël mana këët Nebø ki Baal-Miyön.

⁹Ni makge ŋöömma en jï løø kur tuul-cäŋ thuwø këël mana këët yi ŋöömma näk otal na en bäät Naam Upareeti, kiper mana näk lääc paac otïmö ni thööth jïge yi ŋööm Gelät.

¹⁰'Ba kanya bëët Cøølli na nyeya, jø tuuŋ Ruben atïïö ki leny bäät jø tuuŋ Agri ni böötge ge, ni bëëtge kwöra bëët jøøgø yïthge jï løø kur tuul-cäŋ ki ŋööm Gelät.

¹¹'Ba jø tuuŋ Gaat ge bëëdö yi ŋööm Baacan, ni ge kïëö ka jø tuuŋ Ruben, këël mana këëtge Caleka.

¹²'Ba Jool beeye ŋata bëëdö na bwödhi yi Baacan, ni ŋata caath køøre beeye Capam, køøre ki Janay ki Capath.

¹³'Ba wïth dhøk uudi moa näk abïriiø mo jø tuuŋge beege Mikaël, ki Meculam, ki Cïïba, ki Jööray, ki Jakan, ki Dhia, ki Eber.

¹⁴Moøgø beege wäät Abikael wär Ori, Ori wär Jaröa, Jaröa wär Gelät, Gelät wär Mikaël, Mikaël wär Jecicay, Jecicay wär Jaadö, Jaadö wär Buc.

¹⁵'Ba ŋata näk kwar dhøk uudi moøgø beeye Aki wär Abdiël na näk beeye o Guni.

¹⁶Ni ö jø tuuŋ Gaat ni bëëtge yi ŋööm Gelät, ki yi ŋööm Baacan ki yïth atude moa en yie, ki yïth pwöle mo kwaath mo Carön, këël mana këët nyeŋ keee moge.

¹⁷Nyeŋ jiy moøgø bëët ogöör piny yïth weet nyeŋ yïth nïra beet Jöthammi nyeny Juuda ki Jeröbäm nyeny Icriel.

¹⁸'Ba jø tuuŋ Ruben ki jø tuuŋ Gaat ki thääŋ jø tuuŋ Maneeca jïge da jø leny ma kume ma pïëraŋween kurŋween ki dïpe abïriiø ki pïërabïciel mo rege ege jiiŋŋø kiper leny, ni gena atïëte mo leny, ni beege jø wø käär kööt leny ko opëëlle, ki jø wø thöödhö ka athëëre, ni beege jø wø ŋäc jöör leny.

¹⁹Ni këëtge ki wïth juurre mo jø Agri, ni beege jø Jetur, ki jø Napëc, ki jø Nödap.

²⁰'Ba kanya këëtge ki jø Agara, gena køny Jwøki ri leny kiper mana jwöŋge dëër Jwøk ni ŋääthge gø, ni ö Jwøki ni køny geni ki leny, ni cïp jø Agri ceŋge ki jøøa en løøge.

²¹Ni kälge lääc paac mo jøøgø, ni beege athïrööle ma kume ma pïërabïïc, ki rööm ma kume ma dïpe ariiø ki pïërabïïc, ka arëënni ma kume ariiø; ni makge jiy thuwø ki tøŋ ma kume ma dïpa.

²²Ni nääge ki jiy mo thööth ri leny, kiper mana näk Jwøk ena kurge. Ni bëëtge ŋøøp jøøgø këël kanya mak paac ki tøŋ.

²³'Ba thääŋ jø tuuŋ Maneeca anyaay ni thööth, ni bëëtge yi ŋööm Baacan këël mana këët pääny Baal-Armön ki Kïn Canër ki Kïn Armön.

²⁴Moi beege wïth dhøk uudi mo wëëkge, ni beege Ëpër, ki Ici, ki Eliel, ki Adhiriel, ki Jeremaya, ki Odawïya, ki Jadiël. Jøøgø beege otëëe moa näk nyeŋge ŋäc, ni beege wïth dhøk uudi mo wëëkge.

²⁵'Ba jø tuuŋ Ruben ki jø tuuŋ Gaat ki thääŋ jø tuuŋ Maneeca, gena tïïö ki gïn mo raac dëër Jwø wëëkge, ni cääthge køør juu mo patha adïëri moa lam jø paanøgø na raany Jwøki nyïmge, ni marge gaan wøk kaawat man wø tïïc dhaaŋ paaci mo rïïŋö køør käp.

²⁶Kiper manøgønø, Jwø Icriel atïïö cwïny Puul nyeny Aciria, ni beeye Tiglat-Pilëëcër, ni mak ge ki tøŋ ni käl geni, ni beege jø tuuŋ Ruben ki jø tuuŋ Gaat ki thääŋ jø tuuŋ Maneeca, ni kïth geni ya Alay ka Abör ka Ara ki bäät Naam Gödhan, ni putge bëëte yie këël dïcäŋi en.