Read anuak 2 Luup Nyeye 1 Bible Online

2 Luup Nyeye 1 - anuak bible

2 Luup Nyeye 1

¹'Ba Cølöman o Deebit tier buc nyec mare aput këël piny ni teek, ni ö Wuuö Jwøki, Jwøk mare, ni bëëde ki eni, ni ö nyeŋŋe ni tïŋi ya Wuuö Jwøki maal døc.

²Kanyøgø eni jø Icriel bëët acäänne, ni beege kwääc lwaa kume ki kwääc lwaa dïpe, ki dïŋut luup, ki dïbwöthe bëët moa en dï Icriel bäre, ni beege jiy moa bëëdö na wïth dhøk uudi.

³Køøre eni na Cølöman ki jø acooŋŋøgø bäre, gena put ci kar lam mana en bäät thuuri Gibien, kiper oduŋkaany røømmø mar Jwøk ena kaace, oduŋkaanynya tïïc dhaanh Wuuö Jwøki ma Modhe dï paap.

⁴'Ba acanduk mar Jwøk onø øøm Deebiti ki yi Kiriat-Jeerim ni nø käl gø Jerucalem, ni kïth gø kanya näk ee jiiŋŋø kiper gø. Kiper da oduŋkaara mo ee nø cwöth piny kaagøøni kiper gø.

⁵'Ba gïn wø cïp olämme bääte mana näk tïïc ka nywïënyö ma jwïël na tïïc Bacaliil wär Uri na näk nyikwaar Ur, ena yi Gibien nyïm oduŋkaany Wuuö Jwøk, ni ö Cølömanni ki jø acooŋa moa cäädhö ki eni ni wøørge Wuuö Jwøk kaace.

⁶Kanyøgø Cølöman aput eth maal kaace nyïm Wuuö Jwøk baŋ gïn wø cïp olämme bääte mana näk tïïc ka nywïënyö ma jwïël na en nyïm oduŋkaany røømmø, ni put cïpö bäät gø ko olämme mo wø waaŋ bäre ma kuma.

⁷'Ba na tïme na yi wäär manøgø, Jwøk ree anyoodhe jï Cølöman ni kööe jï gø, ni «Pëëny gïna manynyï nee cïba jïrï.»

⁸Køøre Cølöman aköö jï Jwøk, «Wui Wuuö Jwøk, ïïna bëëdö niï nyøtha mëër marï na dwøŋ ni wø ba jøøl jï wära ma Deebit, ni tïïyï aani na nyeya kar gø.

⁹'Ba ennø, ï na Wuuö Jwøk, luumma caanï jï wära ma Deebit beerra man wëëgï gø thur kare; kiper aana tïïyï na nyeya bäät jiy mo kwäänge caala tør mar piny.

¹⁰Ennø, mooc aani ki leec wïc ki kwänynyö, nee lønye jïra ki man bwødha jiy moi. ?Kiper aŋa ni løny jïre ki man käär jiyï moi ni thööth ii?»

¹¹'Ba Jwøk aköö jï Cølöman, ni «Kiper mana näk mo gïnögø nut cwïnyï, niï ba pëëö kaper man bëëdï ni ïïno okwär ki jammi, niï ba pëëö kaper ajiem, niï ba pëëö kaper man 'näk jø wø män ki ïïni, niï ba pëëö kaper man bëëdï ki cwiiri mo thööth; 'ba ïïna tïmö niï pëënynya leec wïc ki kwänynyö man käärï jiya ki gø moa tïïa ïïni bäätge na nyeya,

¹²leec wïc ki kwänynyö acïba jïrï. 'Ba aani, ï mooa mooø thuwø ki jap kwärö mo thööth, ka ajiem, mo poot bäŋgø cøøn jï nyeye moa kwøŋ nut niï poodi, këël nyeye mo oööi køørï.»

¹³Køøre Cølöman atïŋŋö ki kar lam mana en bäät thuur yi Gibien na en oduŋkaany røømmø yie, ni døø Jerucalem, ni put bëëte ni ena nyeya bäät jø Icriel bëët.

¹⁴'Ba Cølöman amäänyö ki jïëth leny mo wø tut okwëënyi, ko okwëëc leny, ni jïte ki jïëth leny moøgø ma kuma ki dïpe aŋween, ko okwëëc leny ma kume apaar kurriiø; ni kïth møøk yïth päänye mo wø bëët jïëth leny mo wø tut okwëënyi yïthge, ni käl møga buute yi Jerucalem.

¹⁵'Ba eni na nyeya ma Cølöman gwet-bïrö ki warkey atïïe ni thööth døc yi Jerucalem ni caala kïte; ni tïïc jenni moa perge leth ni thööth jaak kaamar olämmi mo tuya yi gool.

¹⁶'Ba okwëënyi mo Cølöman käla Ijep ki Kue, kiper eni jø wø gädhö jïre wø jääŋŋe jääŋŋö Kue kuna ŋëëwge ko okwëënyi ni kälge ge.

¹⁷'Ba jää leny man nø man wø tut okweenynyi, kany wø käli ki Ijep gäte beeye gwet-bïrö ma rumme ma cekelli[1] ma dïpe abïciel, ni ö gät okweeny man nø ni näk gwet-bïrö ma rumme ma cekelli ma dïpa ki pïërabïïc; køøre cäŋge ka gath wøk baŋ nyeye bëët mo jø Këth ki nyeye mo jø Aram.