Read anuak 2 Luup Nyeye 10 Bible Online

2 Luup Nyeye 10 - anuak bible

2 Luup Nyeye 10

¹'Ba Reeyöböm aci Cekam, kiper jø Icriel[11] bëët onø ci Cekam nee eni tïïcge na nyeya.

²'Ba Jeröbäm o Nebat na wïny gïnögø, ena duuö ki Ijep, ni beeye kanya reŋ yie ni eni ŋwieya nyeya ma Cølöman.

³Køøre jø Icriel gena jääk baŋ Jeröbäm nee ööe, ni ö Jeröbämmi ki lwaa Icriel bäre ni öge ni cäänge ki Reeyöböm ni köge,

⁴ni «Wäru bëëtö marwa atïïe ni caala tëër mo peek bäätwa. 'Ba ennø, bëëtö mana teek na caal tëër mo peek na wara tïïc wäru bäätwa, tïïyï ni jööt; køøre nø, ï tïnywa tïnynyö.»

⁵'Ba Reeyöböm aköö jïge, ni «Døøgu nø, ni bëëdu ki nïne adäk; køøre uuno duu baŋa.» Køøre jøøgø gena døøk.

⁶Kanyøgø nyeya ma Reeyöböm acaara mar jø døøŋŋø apëënynye, ni beege jøøa wara tïny wänni ma Cølöman kanya bëët wänni ni poot kwøw, ni kööe, na «?Acaara mo nyïëdi noo cïpu jïra naa jïta ki øtjöö man dwøga luum jøøi ki gø?»

⁷Køøre adwøk jøøgø jïre ni köge, ni «Ni näk mo bäth ec marï ki mëër marï iï nyoodhø jï jøøgø niï cara luup mo beyø jïge, ge tïmö ni gena jiy mo tïnynya ïïni na bäre bäre.»

⁸'Ba Reeyöböm acaara mana cïp jø døøŋŋø jïre akwiere, ni tïme ni pëënynya acaara mar obwöre moa piith ki eni na aciel, na tïny eni.

⁹Ni kööe jïge, na «?Acaara mo nyïëdi noo cïpu jïra kiper nee luubö dwøgø jï jøøi ii na cäänö ki aani na köö, ni ‹Bëëtö marwa na caal tëër mo peek na wara tïïc wäru bäätwa, tïïyï ni jööt›?»

¹⁰'Ba obwöre moa piith ki eni na aciel adwøkge jïre ni köge, ni «?Köö jøøgø ni bëëtö marge mana wara tïïc wäru ni teek bäätge tïïyï jïge ni jööt? Ennø, caanï jïge, ni ‹Lweeta man ni thiinh en otïmö ni dwøŋŋa eni ki pier wära.

¹¹'Ba kaawat mana ö wära na tïïc bëëtö maru ni teek ni caala tëër mo peek, aani bëëtö maru cäŋa ka tïïyö ni teek døc ni kaala mana tïïc wära. Wära u pwönynye ka alaŋŋe, 'ba aani, u pwönynya pwönynyö ka alaŋŋe mo lethe caala leth dha agarap.› »

¹²'Ba kanya tïme na ri dää nïne, Jeröbäm ki jiy bëët gena duu baŋ nyeya ma Reeyöböm kaawat mana caane na kööe, ni «Uuno duu baŋa ri dää nïne.»

¹³'Ba nyeya ma Reeyöböm luubö mare aput dwøgø ni teek jï jøøgø, kiper ena kweer ka acaara mana cïp jø døøŋŋø jïre,

¹⁴ni caan gø jïge ki køør acaara mana cïp obwöre jïre, ni kööe, ni «Wära bëëtö maru atïïe ni teek ni caala tëër mo peek bäätu; 'ba aani bëëtö maru cäŋa ka tïïyö ni teek døc ni kaala mana tïïc wära. Wära u pwönynye ka alaŋŋe; 'ba aani, u pwönynya pwönynyö ka alaŋŋe mo lethe caala leth dha agarap.»

¹⁵'Ba nyeya luum jø Icriel käre wïnynyö, kiper gïnögø beeye gïn mo käla baŋ Jwøk kiper nee luubö mana caan Wuuö Jwøki jï Jeröbäm o Nebat ki dha Akiya nyï Cëëlö thur kare.

¹⁶'Ba kanya ö jø Icrielli bëët na jootge gø ni marge kär wïny nyeya, adwøkge jï nyeya, ni köge, «?Aŋø, waani, da kurwa ri Deebit? Waani, kee bäŋ gïn mo dooŋ na kurwa ki røk jap o Jeci. Wui jø Icriel, ŋati man nø døø paare. 'Ba ï na nyikwaar Deebit, dööŋï keerï ki jø dhi ødï.» Kanyøgø jø Icriel gena put døø mïëcge.

¹⁷'Ba Reeyöböm abëëdö na nyeya mar jø Icriel moa bëëdö yïth päänye mo Juuda.

¹⁸Køøre nyeya ma Reeyöböm Adöram na bëëdö na wïth jø tïïc mo wø mak ki teek ajääŋŋe baŋ jø Icriel, ni ö jø Icrielli ni këërge gø ki kïte ni put thøø. Køøre, nyeya ma Reeyöböm alaar eth yi jääne man wø tut okweenynyi ni reŋ Jerucalem.

¹⁹Kanyøgø jø Icriel gena put tïmö ni ge gëëmö ki jø dhi øt Deebit këël dïcäŋi en.