Read anuak 2 Luup Nyeye 11 Bible Online

2 Luup Nyeye 11 - anuak bible

2 Luup Nyeye 11

¹'Ba kanya ö Reeyöbömmi na pïïe yi Jerucalem, jø leny moa teek døc ma kume ma dïpa ki pïërabära mo jø tuuŋ Juuda ki jø tuuŋ Benjamen acooŋe, nee këëtge ki jø Icriel, kiper nee buc nyec duu baŋ Reeyöböm.

²'Ba dwør Wuuö Jwøk aö bäät nyikuŋ Jwøk ma Cemaya ni kööe,

³ni «Caanï jï nyeny Juuda ma Reeyöböm o Cølöman, ki jï jø Icriel bëët mo wø bëëdö yi ŋööm Juuda ki yi ŋööm Benjamen, ni kööï,

⁴ni mana caan Wuuö Jwøki beeye en, ena köö, ni ‹Käru cøø nou këëdu ki nyïïmëëgu. Ŋati man nø døø paare, kiper gïnögø käla baŋa.› » Køøre luum Wuuö Jwøk aputge wïnynyö, ni døøge mïëcge ni bäŋ ŋat mo oci baŋ leny këët ki Jeröbäm.

⁵'Ba kanya bëët Reeyöböm Jerucalem, eni päänye møøk mo Juuda acäŋ geerrø ni teek,

⁶ni beege Bethelem, ki Ëtam, ki Tëköa,

⁷ki Bëëth-Cur, ki Cökö, ka Adulam,

⁸ki Gëth, ki Marëca, ki Dhip,

⁹ka Adöram, ki Lakic, ka Adhëka,

¹⁰ki Dhöra, ka Ayalön, ki Keeprön. Moøgø bëët beege päänye moa no ogeerø ni teek na en yïth ŋøøp jø tuuŋ Juuda ki jø tuuŋ Benjamen.

¹¹'Ba eni thuwø kwör gwøk røk mo päänye moøgø atïïe ni teek ni kïth yïthge ki kwääc lwaae mo leny, ki wïth caammi, ki mädhi mo thaal ki kwøk nyïïomøki.

¹²Køøre ena kïth yïth päänye moøgø bëët thuwø ki kööt leny ki tøøŋi, ni tïïc ge ni teek døc. Ni ö jø tuuŋ Juuda ki jø tuuŋ Benjamen ni putge bëëte tiere.

¹³Køøre dïlämme ki jø tuuŋ Libay moa en yïth mïëri mo Icriel bëët gena put dwät tier Reeyöböm.

¹⁴Ni ö jø tuuŋ Libay moøgø ni wecge kwör kwaath moge ki kwör bëëte moge ni öge Juuda ki Jerucalem, kiper Jeröbäm ki wääte ege mänö ki man bëëtge na dïlämme mo tïnynya Wuuö Jwøk.

¹⁵'Ba Jeröbäm da dïlämme moe mo ee kwanyø kiper kwör lam moa en bäät thuuri, kiper kït gïïa tïïe na näk caala atëëe ki nyïïrøøe.

¹⁶'Ba ki røk wïth tuŋi mo jø Icriel bëët, jøøa bëëdö ni cwïnyge ege cïbö ki man manyge Wuuö Jwøk, Jwø Icriel, gena läm køør jø tuuŋ Libay yi Jerucalem, kiper nee cïpge ko olämme jï Wuuö Jwøk Jwø kwäcge.

¹⁷'Ba geni tier buc nyec mar jø Juuda akëëlge piny ni teek, ni bëëtge ki cwiiri adäk ni Reeyöböm o Cølöman ege jølø, ni ge bëëdö ki køør bëëtö mana bëët Deebiti ki Cølöman ki gø ki cwiiri moøgø na adäk yøø.

¹⁸'Ba Reeyöböm Maalët nyi Jerimöth anywøme, ni beeye Jerimöth o Deebit. 'Ba nyeŋ mii Maalët beeye Abikael nyi Eliap, ni beeye Eliap o Jeci.

¹⁹'Ba Maalët anyöödö ko obwöre ma cwøw ki Reeyöböm, ni beege Jeuc, ki Cemariya, ki Dhaam.

²⁰Køøre Reeyöböm Maika nya Abëcëlöm anywøme thuwø, ni nyööde ko obwöre ki gø, ni beege Abaaja, ka Attay, ki Jija, ki Cëlömith.

²¹'Ba Reeyöböm mëër ki Maika nya Abëcëlöm døc ni kaala määre møga bëët, ki määre moa na akwanye bëët. 'Ba määre bëët moa cøøde gena apaar ka abära, ni mään moa na akwanye gena pïërabïciel. 'Ba obwöre moa nywøl Reeyöbömmi beege cwøw ma pïërariiø ka abära ki nyïïakuue ma pïërabïciel.

²²'Ba Reeyöböm wääde ma Abaaja mana nywøle ki cïïe ma Maika atïïe na wïth wääte, kiper mana näk ee gø cooŋø ni røønye røønyø na nyeya.

²³'Ba eni ki køør leec wïc mare, wääte møøk apääŋŋe yïth mïëc jø tuuŋ Juuda ki jø tuuŋ Benjamen bëët, ni beege päänye bëët moa no ogeerø ni teek. Ni cïpe ki cam mo päl jïge, ni nyööme jïge ki mään mo thööth.