Read anuak 2 Luup Nyeye 13 Bible Online

2 Luup Nyeye 13 - anuak bible

2 Luup Nyeye 13

¹'Ba kanya tïme na ri cwiiri apaar ka abära moa beet Jeröbämmi ni ena nyeny Icriel, Abaaja atïmö na nyeya Juuda yi Jerucalem,

²ni bëëde ni ena nyeya ki cwiiri adäk. 'Ba Abaaja nyeŋ menni beeye Mikaya nyi Uriel nyï Giba. 'Ba kar kaagøøni yïthakic Abaaja ki Jeröbäm aput jïtö ki leny.

³Ni ö Abaaja ni ci wøk baŋ leny baŋ Jeröbäm ki jø leny moe moa teek døc mo kwäänge beege kume ma dïpe aŋween, ni gääpge ki jø leny mo Jeröbäm mo teek døc thuwø mo kwäänge beege kume ma dïpe abära.

⁴Kanyøgø Abaaja aput cuŋŋö bäät Kïn Dhemarayim na en mïëya en bäät kïte kur jø tuuŋ Ipariem, ni rwaac Jeröbäm ki jø Icriel bëët, ni kööe, ni «Cegu ïthu baŋa!

⁵?Aŋø, kuyu ni Wuuö Jwøk, Jwø Icriel, buc nyec mar Icriel ee wëëk Deebit ki nyïïkwaaye ki man käärge gø na bäre bäre ki køør luumma tuude na näk ba pät?

⁶'Ba Jeröbäm o Nebat na wara tïïö tier Cølöman o Deebit aput ö maal ni gëëme ki kwääye,

⁷ni jiy mo wïthge reyø mo bëëtö marge patha kare ee gwaar dëëre, ni gëëme ki Reeyöböm o Cølöman kanya poot Reeyöbömmi ni poot thiinh ni jïre bäŋ teek ki man tïïc mana manynye dëëtge.

⁸«'Ba ennø, uuna cädö ki man ŋäbu ki buc nyec mar Wuuö Jwøk man ni en ceŋ nyïïkwaac Deebit en, ni uuna lwaak mo päl mo buutu da nyïïrøøe mo tïïc ka warkey, nyïïrøøga tïïc Jeröbämmi kiper nee bëëtge na juu mou.

⁹Dïlämme mo Wuuö Jwøk, ni beege nyïïkwaac Aran, ariemu wøk, ge ki jø tuuŋ Libay, ni määnynyu dëëtu keeru ki dïlämme mou kaawat man wø tïïc juurre møga. Ni ŋat wø ööi jaak kuna cïp dëëre kur keere ni käädö ki nyirøøa mo thiinh ki nyöök rööm abïriiø, putu ka tïïc na dïlämi jaak mar gïï mo patha Jwøk.

¹⁰«'Ba ki baŋwa, Wuuö Jwøk beeye Jwøk marwa, ni eni kärwa wiiø; ni nyïïkwaac Aran beege ni wø tïny Wuuö Jwøk na dïlämme, ni jø tuuŋ Libay beege ni wø køny geni.

¹¹Ni kany wø tïme na amöölla ka abøøya cooth ge wø wääŋö jï Wuuö Jwøk ko olämme mo wø waaŋ bäre ki gïï wø jïcge ŋwääi ni met, ni muunni moa näk ocwøbø na näk nyuuthe wø cïpge bäät tharabëëta mana no ocïp kur keere ni waany, ni gïn wø cuŋ lambae bääte mana näk tïïc ka warkey, lambae moe wø nyepge nyebø cooth ka abøøya; kiper waani, gïïa cem Wuuö Jwøki na näk Jwøk marwa ewa gwøø; 'ba uuni, Wuuö Jwøk you wiiø.

¹²Raŋŋu, Jwøk bëëdö ka waani, ni ena wïc marwa, ni dïlämme moe tuŋi oløny ni ena ceŋge ki man koothge ge nee wa öwa baŋ leny baŋu. Wui, jø Icriel, käru këëdö ki Wuuö Jwøk, Jwø kwäyu, kiper mana manynyu ba thur kare.»

¹³'Ba Jeröbäm jø leny moe møøk ee kan töök jø leny mo jø Juuda, nee ge öge ki ŋäth jø Juuda, ni thööth jø leny mo Icriel ena nyïm jø Juuda, kanya bëët jø lenynyi moøgøøni ni ena ŋäth jø Juuda.

¹⁴'Ba kanya ö jø Juuda na lwïthge, aputge joot ni jøøgø tuga geni ki nyïmge ki ŋäthge. Kanyøgø gena put jwöŋö dëër Wuuö Jwøk, ni ö dïlämme ni koothge tuŋi.

¹⁵Køøre jø Juuda gena put reŋ bäät ge ni ge twäädö. 'Ba kanya reŋ jø Juuda bäätge ni ge twäädö, Wuuö Jwøk Jeröbäm ki jø Icriel bëët aput wëëk böötö nyïm Abaaja ki jø Juuda.

¹⁶Kanyøgø jø Icriel gena put bwøk nyïm jø Juuda, kiper geno cïp Jwøki ceŋ jø Juuda.

¹⁷'Ba Abaaja ki jiye, jø Icriel aböötge ki böötö mo raac døc, ni put jø lenynyi moa teek mo jø Icriel ma kume ma dïpe abïïc thøø.

¹⁸'Ba kar kaace jø Icriel wïthge aput døø piny, ni ö jø Juuda ni öge maal bäätge, kiper jø Juuda ŋäätha Wuuö Jwøk, Jwø kwäcge.

¹⁹'Ba Abaaja aläp køør Jeröbäm ni mac mïëri møøk cer gøøni, ni beege Bëthël ka atude moe, ki Jecana ka atude moe, ki Ëprön ka atude moe.

²⁰'Ba Jeröbäm kär jïtö ki teek këët yïth nïra beet Abaaja. 'Ba ena jääl Wuuö Jwøki ni put thøø.

²¹'Ba Abaaja, ena tïmö ni teek. Kanyøgø ena nyöömmö ki mään apaar kurŋween, ni put jïtö ki wääte ma pïërariiø kurriiø, ki nyïïe ma apaar ka abïciel.

²²'Ba jammi møga moa tïïc Abaaja, ki uutjïëthe moe moa caadhe, ki luup moe moa care, ogöörö yïth luup moa göör nyikuŋ Jwøki ma Idö.