Read anuak 2 Luup Nyeye 15 Bible Online

2 Luup Nyeye 15 - anuak bible

2 Luup Nyeye 15

¹'Ba Jwïëc Jwøk aö bäät Adhariya wär Ödet,

²ni ci wøk kuna røømge ki nyeya ma Aca, ni kööe jïgø, ni «Cek ïthï baŋa, ï na nyeya ma Aca, ki uuni bëët, u na jø tuuŋ Juuda ki jø tuuŋ Benjamen. Wuuö Jwøk, kany wø bëëdu dëëre, bëëdö ki uuni. Ni näk mo eni manynyu manynyø, eni jootu joodø; 'Ba ni näk eni you wiiø, u wiie wiiø thuwø.

³Ki yïth nïne moa pöödhö, jø Icriel abëëdö jaak ni ge tøør ri Jwøk mana na adïëri, ni bäŋ dïlämme mo pwöny geni, ni bäŋ ciik mo ŋäcge.

⁴'Ba kany wø täk gïï mo lethi bäätge, nyïmge løøge baŋ Wuuö Jwøk, Jwø Icriel, ni manyge eni, ni jootge gø.

⁵Yïth nïne moøka, teek jï dhaanhø jaak mo cäädhö ni mare døny wøk ki yi paayø wala dunynya yi paac, kiper da dïŋaŋ mo päl ki bëëtö mo patha kare tiet mïëri bëët.

⁶Paac man nø këëdö ki paac mør, ni ö päänynyi man nø ni këëde ki pääny mør, kiper gena wëëk Jwøki jwør gïï mo leth ma teeŋi.

⁷'Ba uuni, bëëdu nou teek ni ba wëëgu bäätu pädhö, kiper da gïn mo u di ŋadø ki gø ki køør tïïc maru.»

⁸'Ba kanya ö nyeya ma Aca na wïny luup moøgøøni na mo Jwøk yøø na caan nyikuŋ Jwøki ma Adhariya wär Ödet, cwïnye aput jïtö ki cer, ni käl gïï wø lam wøk ni wø raac yi Jwøki ki ge na en yïth mïëri bëët mo jø tuuŋ Juuda ki jø tuuŋ Benjamen, ki mo wø lam yïth päänye moa näk ee maa na en po kïte kur jø tuuŋ Ipariem. Ni ö gïn wø cïp olämme bääte mar Wuuö Jwøk na en nyïm agööl Øt Wuuö Jwøk ni dwøk gø kare ni nyään.

⁹Ni ö eni ni cooŋ jø tuuŋ Juuda ki jø tuuŋ Benjamen, ki jiy moa dää buutge na käl røk jø tuuŋ Ipariem, ki røk jø tuuŋ Maneeca, ki røk jø tuuŋ Cimien; kiper jiy mo thööth aci dëëre ki yi Icriel kanya jootge gø ni Wuuö Jwøk, Jwøk mare, bëëdö ka eni.

¹⁰Kanyøgø rege aputge cooŋ yi Jerucalem ri dää dwäde, kanya tïm cwiic nyec mo Aca na apaar kurbïïc.

¹¹Ni putge cïpö yi cäŋ manøgø ko olämme jï Wuuö Jwøk ki røk lääy moa twierge. 'Ba olämme moa cïpge beege dhäk ma dïpe abïriiø ki dïëk ma kume abïriiø.

¹²Ni tutge ki luubö ki man manyge Wuuö Jwøk, Jwø kwäcge, ki cwïnyge bäre ki jwïëcge bäre;

¹³ni köge ni dhaanhø jaak mano ba many Wuuö Jwøk, Jwø Icriel, put ka 'näk, këël eni thiinh wala dwøŋ, nee ena dïcwøø wala dhaagø.

¹⁴Ni putge kööŋ ri Wuuö Jwøk ni döötge ena maal, ni ge kwöŋŋö ki met ec ni ge kudhö ki tuŋi ma teeŋi.

¹⁵'Ba jø Juuda bëët yïthge amïnnö ki køør kööŋ mana kööŋge ki gø, kiper gena kööŋ ki cwïnyge bäre; ni manyge Wuuö Jwøk døc, ni jootge gø. Ni ö Wuuö Jwøki ni mooc geni ki jwöm kun ki kun.

¹⁶'Ba nyeya ma Aca teek gwac mar menni ma Maika akäl wøk cer gø, kiper menni atëëŋö ki kït gïn mo määnö mo di lamø mo ocaa ri jwøa cwøl na Acara. 'Ba Aca kït gïna määnö na näk di lamø mar menni akäl wøk, ni kaaŋ gø na thäŋi, ni waaŋ gø waŋ Naam Kidaran.

¹⁷'Ba eni kwör lam moa en bäät thuuri käre raanynyø dï Icriel. 'Ba këël na käre gø raanynyø, ena bëëdö ni cwïnye waany ki yïth nïne moa beede bëët.

¹⁸'Ba jap wänni moa näk ocïp wänni kur keerge na mo Jwøk, ki jammi moa näk thööge na näk ee cïp kur keerge na mo Jwøk, akäl yi Øt Jwøk. 'Ba japaka beege gwet-bïrö, ki warkey, ki jap tïïc mo paac.

¹⁹'Ba bäŋ lenye mo otägö këët këël mana thum cwiiya näk pïëradäk ka abïïc na beet Aca ni ena nyeya.