Read anuak 2 Luup Nyeye 16 Bible Online

2 Luup Nyeye 16 - anuak bible

2 Luup Nyeye 16

¹'Ba kanya tïm cwiic Aca na pïëradäk ka abïciel bäät nyec, Baaca nyeny Icriel acøø ni këëde ki jø Juuda, ni ö päänya cwøl ni Reema ni geer gø ni teek, ni gëëŋa jöö, nee bäŋe dhaanhø mo ci yi ŋööm Aca nyeny Juuda, wala dhaanhø mo öö ki yie.

²'Ba Aca gwel-bïrö ki warkey moa en yi øt kän jammi mo Øt Wuuö Jwøk ki moa en øt kän jammi mar øt nyec akäl wøk ni jääŋ ge baŋ Ben-Adat nyeny jø Aram na bëëdö Damacka, ni kööe,

³ni «Beerra man ö ïïni ki aani ni tudø ki luubö yïthakiyø, kaawat mana en yïthakic wära ki wäru. 'Ba ennø, aana jääk baŋï ki gwel-bïrö ki warkey; ciï ni raanynyï luubö mana näk iï tuudö ki Baaca nyeny Icriel, kiper nee eni ö wøk paara.»

⁴Køøre Ben-Adat luum nyeya ma Aca awïnynye, ni jääŋ kwääc lwaae mo leny moe, ni cige ni tukge päänye mo Icriel, ni makge Ijöön, ki Daan, ka Abël-Maim, ki päänye bëët moa näk yïthge da uut kän jammi moa en yi ŋööm Naptali.

⁵'Ba Baaca na wïny gïnögø, Reema aput wec ki man geer gø, ni put tïïc mar gø cuŋŋö.

⁶Køøre nyeya ma Aca jø Juuda bëët aput cwøl, ni aacge ni jwïëkge kïte ki jer geer moa ö Baaca na dee Reema geerø ki ge. Ni ö nyeya ma Aca ni geer Gëba ki Micpa ni teek ki ge.

⁷'Ba yi kar kaaca, nyikuŋ Jwøk ma Anani, ŋat wø joot jammi ki køør man wø nyooth Jwøki jïre, aö baŋ Aca nyeny Juuda ni kööe jïgø, ni «Kiper mana tïme niï ŋäätha nyeny jø Aram niï ba ŋääth Wuuö Jwøk, Jwøk marï, jø leny mo Aram apäär wøk cerï.

⁸?Aŋø, ba thöötha jø leny mo jø Kuuc ki jø Libya, ki jïëth leny moge na thööth mo wø tut okwëënyi ki jø leny moge mo wø këëdi ki bäät okwëënyi? 'Ba kiper mana bëëdï niï ŋäätha Wuuö Jwøk, gena cïp Wuuö Jwøki cerï.

⁹Kiper waŋ Wuuö Jwøk wïdö bäät piny bäre ni neeta gø kiper nee cïpe ki teek jï jø wø many eni ki cwïnyge bäre. 'Ba ïïni kiper mana tïïï ki gïn mo wïïï kärï caarø ki gø, ki mano täge ennø, ï bëëdö ni da lenye yïthakiyu ki jø møøk cooth.»

¹⁰Køøre Aca agootø ki nyikuŋ Jwøk ma Anani, ŋat wø joot jammi ki køør man wø nyooth Jwøki jïre, ni put gø kïth øt twöc, kiper cwïnye akëënynyö ki gø døc kiper luummögø. 'Ba yi kar kaaca, Aca aput tïmö ni jiy møøk di caannø thuwø.

¹¹'Ba jammi moa tïïc Aca ki mana täge këël aŋuunge ogöör piny yi Wëël Luup Nyec Juuda ki mo Icriel.

¹²'Ba Aca kanya tïm cwiic nyec moe na pïëradäk ka abïŋween, ena tïmö ni tuu ki tiete ki täw mo teek døc; 'ba këël na bëët täwi manøgø na ennønø, eni Wuuö Jwøk käre manynyø kiper køny, 'ba ena bëëdö ni manynya akïïme.

¹³Køøre Aca athøw ni läp køør kwäcge, ni cwiic nyec moe beege pïëraŋween ka aciel.

¹⁴'Ba ena koonyge yi bwörö mare mana tïïe kiper dëëre yi Pääny Deebit, ni pïëlge gø yi bwörö bäät pëëm mana näk ee kïthö ki gïï wø ŋwääi ni met ki wïth mäth riie ma teeŋi, ni äpge ki maac mo dwøŋ døc ni ge wøøra gø.