Read anuak 2 Luup Nyeye 17 Bible Online

2 Luup Nyeye 17 - anuak bible

2 Luup Nyeye 17

¹'Ba Jøcapat adööŋ na nyeya kar wänni ma Aca, ni tïïc tier nyec mare ni teek ni kaala jø Icriel.

²Eni yïth päänye bëët mo Juuda moa näk ogeerø ni teek akïthe ki jø leny, ni kïth jø leny møøk yïth mïëri møga mo Juuda ki yïth päänye moa en yi ŋööm Ipariem na mak wänni ma Aca.

³'Ba Wuuö Jwøk abëëdö ki Jøcapat, kiper eni cäädhi ka køør bëëtö mana kwøŋ kwari ma Deebit bëëdö ki gø, ni käre jwø wø cwøl ni Baal manynyø.

⁴'Ba eni manynya Jwøk, Jwø kwari, ni cäädhi ka køør ciik mo gø, ni tïïe moa wara tïïc jø Icrielli käre tïïö.

⁵'Ba tier buc nyec mare aput Wuuö Jwøki këël piny ni teek jïre, ni ö jø Juuda bëët ni cïpge ka ajwäk jïre, ni put tïmö no okwär døc no owøørø.

⁶'Ba ena bëëdö ni cwïnye da cer ki jöör Wuuö Jwøk, ni raany kwör lam thuwø moa en bäät thuuri yi Juuda, ki jera no otieŋø na no ocaa ri jwø wø cwøl na Acara.

⁷'Ba Jøcapat kanya tïme na ri dää cwiiri moe bäät nyec, Ben-Ayel, ki Øbadiya, ki Dhekaraya, ki Natanel, ki Mikaya na bëëdö na jø kööre moe, gena jääŋŋe baŋ pwöc nee pööge yïth päänye mo Juuda;

⁸ni ge jääŋŋe na aciel ka jø tuuŋ Libay møøk, ni beege Cemaya, ki Nethaniya, ki Dhebadiya, ka Acaël, ki Cemiramöth, ki Jönathan, ka Adöniya, ki Thöbiya, ki Töbadöniya; ge ki Elicama ki Jeyöram na bëëdö na dïlämme.

⁹Kanyøgø gena aay ni wëël ciik mar Wuuö Jwøk käärge käärö, ni pööge yi ŋööm Juuda, këël mana thöörge päänye bëët mo Juuda ni ge pöö dï jiy.

¹⁰'Ba Wuuö Jwøk lwär mo päl akäl bäät mïëri bëët moa en deŋ Juuda, ni tïmge ni ge ba këëdi ki Jøcapat.

¹¹'Ba jø Pilitin møøk gena kännö ki muuce ki gwet-bïrö ni cïpge ge na ajwäk jï Jøcapat. Ni ö mïëya Arabe thuwø ni cïpge jïgø ki pïïth dïëk, ni beege nyöök rööm ma kume abïriiø ki dïpe abïriiø, ki nyöök atëëe ma kume abïriiø ki dïpe abïriiø thuwø.

¹²'Ba Jøcapat dööŋ kar mare aput cääth maal døc, ni tïïe ki kwör gwøk røk ki päänye mo kan jammi yïthge yi Juuda.

¹³Ni eni bëëdö ni jïre da jammi mo thööth yïth päänye mo Juuda, ki jø leny mo teek mo ŋäc leny døc mo ee cïp Jerucalem.

¹⁴'Ba moi beege kwään jø leny moe ki køør dhøk uudi moge: Ki røk jø tuuŋ Juuda, ki dëët kwääc lwaa kume, kwääc lwaak mana dïkwøŋ beeye Adina. Eni tiere da jø leny mo teek mo kwäänge kume ma dïpe adäk.

¹⁵Ni ö riet kwääc lwaa leny mana caath køøre ni näk beeye Jöanan. Eni tiere da jø leny mo teek mo kwäänge kume ma dïpe ariiø ki pïërabära.

¹⁶Ni ŋata caath køøre beeye Amaciya o Dhikri, ŋata näk dëëre ee cïbö ki man tïny Wuuö Jwøk. Eni tiere da jø leny mo teek mo kwäänge kume ma dïpe ariiø.

¹⁷'Ba ki røk jø tuuŋ Benjamen beeye Eliada, ŋat leny mo teek. Eni tiere da jø leny mo kwäänge kume ma dïpe ariiø, jø leny mo wø këëdi ka athëëre ki kööt leny.

¹⁸Ni ö riet kwääc lwaa leny mana caath køøre ni näk beeye Jödhabat. Eni tiere da jø leny mo dëëtge ege jiiŋŋø kiper leny mo kwäänge kume ma dïpa ki pïërabära.

¹⁹'Ba jø leny moøgøøni bëët beege ni wø tïny nyeya ma Jøcapat, ni moa cïp nyeya yïth päänye moa näk ogeerø ni teek dï Juuda bäre kär kwaan rege.