Read anuak 2 Luup Nyeye 18 Bible Online

2 Luup Nyeye 18 - anuak bible

2 Luup Nyeye 18

¹'Ba kanya bëët Jøcapat no okwär døc no owøørø, ena dwätö ka Akap nyeny Icriel ki køør nywöm.

²'Ba na tïme na køør cwiiri møøk, Jøcapat aløøc piny kuna lïïmme baŋ Akap yi Cameria. 'Ba Akap anääö ki dïëk ki dhäk mo thööth jïgø ki jøøa cäädhö ki eni, ni coon yi gø nee ci kuna tuk Ramöth-Gelät.

³Ni kö Akapi nyeny Icriel jï Jøcapat nyeny Juuda, ni «?Løny man ciï ki aani Ramöth-Gelät?» Ni dwøk gø jïgø, ni «Aani a caala ïïni, ni jiya poot na jiy moï; waani wa dwätö ki ïïni ri leny.»

⁴'Ba Jøcapat aköö jï nyeny Icriel, ni «Beerra man kwøŋï dwør Wuuö Jwøk pëënynyö.»

⁵Køøre nyeny Icriel jiy ma dïpe aŋween moa tïïc rege na nyïïkuk Jwøk acooŋe ni kööe jïge, ni «?Ciwa baŋ leny Ramöth-Gelät, wala kära cøø?» 'Ba gena köö, ni «Ciï; ocïp Jwøki cerï, ï na nyeya.»

⁶'Ba Jøcapat aköö, ni «?Bäŋ nyikuŋ Wuuö Jwøk mo ena kany mo pëënynyø këët?»

⁷'Ba nyeny Icriel aköö jï Jøcapat, ni «Poot da dhaanhø aciel mo dwør Wuuö Jwøk døø pëënynyö ki eni, 'ba a män ki gø, kiper poot bäŋ gïn mo beer mo ee nø caan en kipera, 'ba cooth beeye gïn mo raac. 'Ba ŋatøgø beeye Mikaya wär Imla.» 'Ba Jøcapat aköö, ni «Nyeya, luummögø kär caanï.»

⁸Køøre nyeny Icriel ŋat koor aciel acwøle ni kööe, ni «Ciï, laar Mikaya wär Imla cwøl.»

⁹'Ba kar kaagø, nyeny Icriel ki Jøcapat nyeny Juuda, ge bëëdö ni geno pï piny ni ŋati man nø opï piny bäät wälu mare yi laara dhi kiir Cameria, na abïïk nyec moge ege røø dëëtge, ni ö nyïïkuk Jwøki bëët ni bëëtge ni ge cäänö nyïmge kiper jammi moo tägi yi nyïm.

¹⁰'Ba ki røk jøøgø, Cëdëkiya o Kinana dëëre ee tïnynyö ki tuŋi mo tïïc ka nywïënyö, ni kööe, ni «Wuuö Jwøk aköö, ni ‹Jø Aram cööbï cööbö ki tuŋi moi, këël mano dïïrï wïthge.› »

¹¹'Ba nyïïkuk Jwøk bëët, luubö man acaange thuwø ni köge, ni «Ci baŋ leny Ramöth-Gelät, ni böödï; geno cïp Wuuö Jwøki cerï, ï na nyeya.»

¹²'Ba ŋata jääŋŋi nee Mikaya cwøle, Mikaya acäänne ni kööe, ni «Neenï, nyïïkuk Jwøk bëët, gena cäänö ki dwøl aciel mo met kiper nyeya. Ennø, beerra man ö dwølli mano caanï ni tïme ni met na aciel ki mana caange.»

¹³'Ba Mikaya aköö, ni «Ŋëët Wuuö Jwøk, Jwøa kwøw, gïno caan Jwøki, Jwøk mara, beeye gïno caana.»

¹⁴'Ba kanya nø ö Mikaya baŋ nyeya, nyeya aköö jïre, «?Mikaya, ciwa baŋ leny Ramöth-Gelät, wala kära cøø?» 'Ba aløøe jïgø, «Cou ni böödu; geno cïp ceŋŋu.»

¹⁵'Ba nyeya aköö jïre, na «?A kwöre adïï niï cäänna cäännö, ni ‹Kany wø cäänï ki aani, cäänï ka adïëri ki nyeŋ Wuuö Jwøk›?»

¹⁶Kanyøgø Mikaya aköö, ni «Aani, jø Icriel bëët ajooda ni geno keethø bäät kïte, kaamar dïëk mo bäŋ dïkwääy jïge. 'Ba Wuuö Jwøk aköö, ni ‹Jøøi bäŋ wääge; beerra man ö ŋati man nø ni døø paare ni bäŋ gïn mo otägö dëëre.› »

¹⁷'Ba nyeny Icriel aköö jï Jøcapat, ni «?Kära caanø jïrï ni eni bäŋ gïn mo beer mo caane kipera, 'ba beeye gïn mo raac keere?»

¹⁸'Ba Mikaya aköö, «'Ba ennø, wïny dwør Wuuö Jwøk. Aani Wuuö Jwøk ajooda no opï piny bäät wälu mare, ni lwaak mare bäre mana en maal cuŋŋö buute, ni møøk ena bäät cwïïe, møøk ki bäät caame.

¹⁹Ni kö Wuuö Jwøki, na ‹?Aŋa noo maaŋ wï Akap nyeny Icriel ni wëëk gø ciin Ramöth-Gelät nee 'näk?› Ni ö ŋati man nø ni caan man nø.

²⁰Køøre da jwïëy ma aöö mo käla ri lwaak manøgø, ni cuŋŋe nyïm Wuuö Jwøk ni kööe, ni ‹Aani wïïe maaŋŋa maaŋŋø.› 'Ba Wuuö Jwøk aköö jïre, ni ‹?Wïïe omaaŋŋï gø nidïï?›

²¹Ni kööe, ni ‹Aani, a cøø ni tïma ni aana dïcuuy ki dhøk nyïïkuk Jwøk moe bëët.› Køøre Wuuö Jwøk aköö, ni ‹Ba dhäthi jïrï ki man maaŋŋï wïïe. Ciï ni tïïyï gø.›

²²«'Ba ennø, ï na Akap, ka adïëri møn, Wuuö Jwøk jwïëy anø cïp dhøk nyïïkuk Jwøk moi bëët na moï ii, niï cøøkge; ni ö Wuuö Jwøki ni caan gø ni gïn mo leth pïï bäätï.»

²³Køøre Cëdëkiya o Kinana aput ö baŋ Mikaya ni dhööŋ gø ki thääŋ gø, ni kööe, na «?Aŋø, jwïëc Wuuö Jwøk a ee wiiø nidïï ni tïme ni cäänö ka dëërï en?»

²⁴'Ba Mikaya aköö, ni «Ka adïëri møn, ojootï dïcäŋeca kanyo dønynyï thääŋ øtø mo ena dïër niï kana dëërï.»

²⁵Kanyøgø nyeny Icriel aköö, ni «Lwørru Mikaya ni dwøgu gø baŋ Amön kwääc pääny, ki baŋ Jöac o nyeya,

²⁶ni kööu, ni ‹Nyeya aköö ni kïthu nyeni øt twöc, ni mooyu eni ki cam mo thiinh ki pïï mo thenh këël kanyo duua ni bäŋ gïn mo otägö dëëra.› »

²⁷'Ba Mikaya aköö, «Ni näk miï duuö møn ni bäŋ gïn mo otägö dëërï, Wuuö Jwøk bäŋ gïn mo ee caanø ki dhaa.» Ni cäŋ köö, ni «Dïbwör bäre, wïnynyu gïra ni caana enø.»

²⁸'Ba Akap nyeny Icriel ki Jøcapat nyeny Juuda gena ci baŋ leny Ramöth-Gelät.

²⁹'Ba nyeny Icriel aköö jï Jøcapat, ni «Aani a cøøa baŋ leny ni dëëra yaa tïïö keda aana ŋat mør. 'Ba ïïni, røø abïïk nyec moï dëërï.» Kanyøgønø, nyeny Icriel dëëre aput tïïc keda ena ŋat mør, ni putge ci baŋ leny.

³⁰'Ba nyeny jø Aram, kwääc lwaae mo jïëthe mo wø tut okwëënyi moe ee nø köömmö ni kööe, ni «Kär dee jø leny mo u këëdö ki ge, nee ŋat mo kare dwøŋ wala ŋat mo kare thiinh; 'ba tïme ni beeye nyeny Icriel keere.»

³¹'Ba kanya ö kwääc lwaae mo jïëthe mo wø tut okwëënyi na jootge Jøcapat gena köö, ni «Nyeny Icriel enø.» Ni gaage baŋ gø nee këëtge ki gø; ni ö Jøcapati ni put köö. Ni ö Wuuö Jwøki ni køny gø, ni tïïc jøøgø nee aacge buute.

³²'Ba kanya ö kwääc lwaae mo jïëthe mo wø tut okwëënyi na jootge gø ni eni paa nyeny Icriel, ena wecge ki man ŋwiecge køør gø.

³³'Ba da ŋat ma athööthö ka atheerø ni mare päätö, ni këël Akap nyeny Icriel ki kanya ŋaam ri kwöt leny mana näk ee røø dëëre. Køøre Akap aköö jï ŋat wø kiiw jää leny mare man wø tut okweenynyi, ni «Wiir jääy ni kïthï aani wøk ki dï leny, kiper dëëra anø jïtö ki ŋwellø.»

³⁴'Ba leny aput tïmö ni teek døc dïcäŋeca, ni ö nyeny Icrielli ni bëëde ni ree ee jäŋö ki jääy mare man wø tut okweenynyi nyïm jø leny mo jø Aram këël abøøya. 'Ba na tïm cäŋŋi ni pätha piny, ena thøw.