Read anuak 2 Luup Nyeye 19 Bible Online

2 Luup Nyeye 19 - anuak bible

2 Luup Nyeye 19

¹Køøre Jøcapat nyeny Juuda ena duuö ki jööt dëël ni duu paan-dwøŋ mare yi Jerucalem.

²'Ba Jiyu wär Anani, ŋat wø joot jammi ki køør man wø nyooth Jwøki jïre, aci wøk kuna røømge ki nyeya ma Jøcapat ni kööe jïgø, na «?Aŋø, ï kønya jøøa reyø ni mëërï ki jø wø män ki Wuuö Jwøk, niï käla wëëc Wuuö Jwøk bäätï keerï?

³'Ba ïïni, poot da gïrpiny mo beer jïrï, kiper jenni moa näk otieŋø na no ocaa ri jwø wø cwøl na Acara akälï wøk yi ŋööm Juuda, ni cïbï cwïnyï køør many Wuuö Jwøk.»

⁴'Ba Jøcapat bëëdö Jerucalem; 'ba ena cäŋ ci wøk dï jiy ni tägi ka Bëërcïïba na en jï løø tier-piny këël mana këët mïëya en po kïte na en kur jø tuuŋ Ipariem na en jï løø wï-piny, ni cäŋ jiy duu baŋ Wuuö Jwøk, Jwø kwäcge.

⁵Ni röönye ki jø ŋøl luup yi pääny man nø ki man nø, ni beege yïth päänye bëët moa näk ogeerø ni teek yi ŋööm Juuda.

⁶Ni kööe jï jø ŋøl luup, ni «Gwøgu rou ki tïï ŋøl luup mano tïïyu, kiper u ba ŋudö ka køør man wø many jiyi, 'ba beeye ki køør man wø many Wuuö Jwøki ni wø bëëdö ki uuni kanyo ŋøllu luup.

⁷'Ba ennø, beerra man lwäärru Wuuö Jwøk ni gwøgu rou ki ŋøl mano tïïyu, kiper Wuuö Jwøk, eni na Jwøk marø, kare bäär ki gïn mo patha adïëri, wala ajeeny, ni eni ba jïëy ki jammi mo wø cïp ki piny ni ŋeewa røk.»

⁸'Ba Jøcapat aröönyö ki jø ŋøl luup yi Jerucalem thuwø ki røk dïlämme ki røk jø tuuŋ Libay, ki røk dïbwöthe mo dhøk uudi mo Icriel, kiper nee luup ŋølge ki køør ciik mo Wuuö Jwøk, nee bëëtge ni luup mo wø känni ki pïëm mo wø tägi yi Jerucalem ŋølge ŋølø.

⁹Ni kööm geni, ni kööe jïge, ni «Tïïyu tïïc man na kare ki cwïnynyu bäre nou lwäär ki Wuuö Jwøk.

¹⁰Ni näk da løøk mo løøa nyïmmu, mo käla baŋ nyïïmëëgu mo wø bëëdö yïth päänye moge, ni näk mo løøk mo guta luum remø, ki luum ciik, ki luup moa no ocemø, ki luup ŋøl ki luup pwöc, ge wär köömmu nee ba bääcge nyïm Wuuö Jwøk, nee wëëc Jwøk nee ba ö bäätu ki nyïïmëëgu. Ni näk mo gïnögø tïïyu tïïö, u ba bääyi.

¹¹«Raŋŋu, Amariya, eni na Kwääy Lam Mana Dwøŋ, tïmö na wïc maru ki yïth jammi bëët mo guta luup Wuuö Jwøk; ni ö Dhebadiya wär Icmiel, na bëëdö na bwödhi mar jø tuuŋ Juuda, ni tïme na wïc maru thuwø ki yïth jammi bëët mo guta luup nyeya. Ni ö jø tuuŋ Libay thuwø moa no ocuumö ni kønyge uuni ki tïïc. Bëëdu nou teek ki yïth jammi bëët moo tïïyu. Beerra man ö Wuuö Jwøki ni bëëde ki jø wø marge beer.»