Read anuak 2 Luup Nyeye 2 Bible Online

2 Luup Nyeye 2 - anuak bible

2 Luup Nyeye 2

¹Kanyøgø Cølöman acïpö ki dwøl kiper geer øtø mano geer kiper nyeŋ Wuuö Jwøk ki øt nyec mano geer kipere.

²Køøre ena kwänyö ki jiy ma kume ma pïërabïriiø ma jø tëër, ni kwänye ki jiy ma kume ma pïërabära ma jø tøk ki kïte bäät kïte maal, ni ö jiyi ma kume adäk ki dïpe abïciel ni cuum ge bäät jøøgø nee bëëtge na jø raŋ jøøgøøni ki tïïc.

³Køøre Cølöman ajäägö ki dwøl baŋ Kiram nyeny Tayar ni kööe, ni «Kaawat mana wara tïïyï jï wära ma Deebit niï jäägö jïre ki jenni moa perge leth na mo geer øtø ki ge man bëëde yie, tïïyï jïra thuwø.

⁴Ennø, a ena bäät man gëëda ki øtø kiper nyeŋ Wuuö Jwøk, Jwøk mara, nee cïba kur keere na mare, nee wääŋö nyïm Wuuö Jwøk ki gïn wø jïye ŋwääi ni met, nee muunni moa näk ocwøbø na näk nyuuthe nee wø cïp nyïme cooth, nee wø cïpö ko olämme mo wø waaŋ bäre ka amöölla ka abøøya, ki yïth cääŋŋe mo jwöm, ki kany wø päär dwääyi, ki kwör ajwöm moa näk ocïp piny kiper Wuuö Jwøk, Jwøk marwa, ni beege jap wø bëëdö ni di tïïö cooth Icriel na bäre bäre.

⁵«'Ba øtø mano geera en bee øtø mo dwøŋ; kiper Jwøk marwa dwøŋ ni kaala juu bëët.

⁶?'Ba aŋa ni løny jïre ki man gëëde ki øtø jï Wuuö Jwøk? Kiper maal këël maal kunece, Jwøk ba røm yie. ?A aani, aana ŋa nø, no ogëëdö ki øtø jïgø, ni näk mo patha man waaŋ gïn wø jïye ŋwääi ni met keere nyïme?

⁷'Ba ennø, kwääny baŋa ki dhaanhø mo waŋe riek ki tïï warkey, ki tïï gwel-bïrö, ki tïï nywïënyö ma jwïël, ki tïï nywïënyö mano cwøl ni ayrön,[2] ki tïï cwääy abïïe mo wø cwääc ki waare ma kït ma dïmuur, ki kït mo kwaar, ki kït ma abïcøle, ki tïï tieŋ kït jammi, nee ŋatøca tïïge na aciel ki jiya moa nyeŋge reegø ki tïï japøge na en buuta yi Juuda ki Jerucalem, jøøa jier wära ma Deebit.

⁸«Ni kwäänynyï jïra thuwø ki wïth jenni moa perge leth yi lur Libaanø, kiper ŋääa ni jiyï yi jöö man ŋøt jer lur Libaanø ki gø ŋäcge. 'Ba jiya ki jiyï geno tïïö na aciel,

⁹ni ŋunge aani ki jenni moa perge leth mo thööth; kiper øtø mano geera en beeye øtø mo dwøŋ mo rëëma ec.

¹⁰'Ba aani a cïpö ki jammi jï jiyï moo ŋøt jenni; ni jammi moo cïba beege beek wø cwøl ni cïndë mo oŋaaø ma yïth rumme ma kume ma pïërariiø, mo røm ka rumi mana cwøl ni kör,[3] ki beek wø cwøl ni gäbci[4] ma yïth rumme ma kume ma pïërariiø thuwø mo poot røm ka rumi manøgø, ki kwøk nyïïomøki ma rumme ma kume ma pïërariiø mo røm ka rumi mana cwøl ni baath,[5] ki mädhi ma rumme ma kume ma pïërariiø thuwø mo røm ka rumi manøgø.»

¹¹Køøre Kiram nyeny Tayar dwøl mare adwøge ki yi wëëlö ni jääŋ gø baŋ Cølöman ni ee göörö na ennønø, ni «Kiper mana näk mo Wuuö Jwøk mëër ki jiye, ïïna tïïe ni ïïna nyeya bäät jiye.»

¹²Køøre Kiram acäŋ köö, ni «Pwøc en jï Wuuö Jwøk, Jwø Icriel na cwääc maal ki piny, ŋata mooc nyeya ma Deebit ki wääde mo wïïe leer, na cïp riek waŋ ki ŋäc tiet luup jïgø, eni no ogeer øtø jï Wuuö Jwøk ki øt nyec mare.

¹³«'Ba ennø, a jääŋŋö ki dhaanhø mo waŋe riek ki tïï jammi, mo tiet jammi ŋääe døc, ŋat mo nyeŋŋe cwøl ni Kuram-abi,

¹⁴mo menni nyijø Daan, ni wänni ŋat Tayar. Ŋatøgø tïï warkey ŋääe, ki tïï gwel-bïrö, ki tïï nywïënyö ma jwïël, ki tïï nywïënyö mano cwøl ni ayrön, ki tïï kïte ki jenni, ki tïï cwääy abïïe mo wø cwääc ki waare ma kït ma dïmuur, ki kït ma abïcøle, ki kït mo kwaar, ki mo wø cwääc ki waac lïïna mo tar mo mïërö; ŋat mo yi jöör tieŋ kït jammi bëët ŋääe, mo løny jïre ki man käl kït gïrpiny wøk ki yi jöö mano manynye jaak; nee eni tïïe na aciel ki jiyï moa nyeŋge reegø ki jic kwääya ma Deebit na näk wäru.

¹⁵«'Ba ennø, ï na kwääya, beerra man jääŋŋï japa caanï jïra, a na dhaanhnhï, ni beege beek wø cwøl ni cïndë, ki beek wø cwøl ni gäbci, ki mädhi ki kwøk nyïïomøki.

¹⁶Køøre nø, waani, jenni moa perge leth na manynyï oŋøtwa yi lur Libaanø, ni kälwa ge baŋï ki yi naama dwøŋ no otwöö na wïdhi këël Jøpa. Kanyøgønø, olwørï kaace ni kïthï ge Jerucalem.»

¹⁷'Ba kanyøgø Cølöman juurre bëët moa bëëdö yi ŋööm Icriel aput kwaan ki køør kwäänge moa dïkwøŋ na kwaan wänni ma Deebit, ni ö jiyi ma kume ma dïpa ki pïërabïïc ka adäk ki dïpe abïciel ni joodi.

¹⁸Køøre ena kwänyö røk jøøgø ki jiy ma kume ma pïërabïriiø ma jø tëër, ni kwänye ki jiy ma kume ma pïërabära ma jø tøk ki kïte bäät kïte maal, ni ö jiyi ma kume adäk ki dïpe abïciel ni cuum ge bäät jøøgø nee bëëtge na jø raŋ jøøgø ki tïïc.