Read anuak 2 Luup Nyeye 20 Bible Online

2 Luup Nyeye 20 - anuak bible

2 Luup Nyeye 20

¹'Ba kanya tïme na køøre cään, jø Möap ki jø Amön ge ki jø møøk røk jø Meunim gena ö kuna këëtge ki Jøcapat.

²'Ba jø møøk aöö ni waacge gø jï Jøcapat, ni köge, ni «Lwaak mo päl mo käla Ëdöm aöö ki løø Naam Acäbö kuna këëtge ki ïïni. Raŋï, geno løny ni ge ena ya Acëcön-Tamar kany wø cwøl ni Ayn-Gadi.»

³Kanyøgø Jøcapat aput lwäyö, ni løø nyïme baŋ many Wuuö Jwøk; ni gööc piny ka awaaci dï Juuda bäre nee jøw wötge ni bäŋ cam mo bel.

⁴Ni ö jø Juuda ni cooŋge dëëtge kuna manyge køny mar Wuuö Jwøk, ni ge ööi ka yïth päänye bëët moa näk mo Juuda.

⁵Kanyøgø Jøcapat acuŋŋö dhi Øt Wuuö Jwøk nyïm kal mana nyään dï acooŋ Juuda ki Jerucalem bäre,

⁶ni kööe, ni «Wui Wuuö Jwøk, Jwø kwäcwa, ?aŋø, ï patha Jwø wø en maal bäre? ?Patha ï wø käär bure bëët mo wïth juurre? Dööŋ kar ki teek ena cerï, ni bäŋ dhaanhø mo cuŋŋö nyïmï.

⁷Wui, ï na Jwøk marwa, ?aŋø, patha ï na riem jiy wøk moa bëëdö yi ŋöömö man nyïm jiyï ma jø Icriel, ni cïpï ŋöömö man jï nyïïkwaac Eeberam na näk nyawadu, nee bëëde na marge na bäre bäre?

⁸'Ba gena bëëdö yie ni tïïge yi gø ki øt lam mana en kur keere kiper nyeŋŋï, ni lämge na ennønø, ni köge,

⁹ni ‹Ni näk da gïn mo raac mo ö bäätwa, teeŋ ka leny man wø tägi ki køør ajäl Jwøk, wala täw, wala käc, wa cuŋŋö nyïmï nyïm øtø man, kiper nyeŋŋï ena ri øtø man; ni jwøwa ränynyö marwa dëërï; køøre ïïni döötwa wïnynyï wïnynyö ni piemï waani.›

¹⁰«Raŋï, ennø jø Amön, ki jø Möap, ki jø Ëdöm, gena ö kuna tukge waani. Ni kanya ö kwäcwa wøk ki Ijep, kwäcwa kärï jïëö ki man dønyge mïëyögø, 'ba gena pöödhö ki deŋ mïëyögøøni ni kärge raanynyø.

¹¹'Ba ennø, raŋ gïn cäŋge tïïyö dëëtwa en ki man öge nee wa kälge wøk yi ŋöömö marï mana cïpï jïwa na marwa.

¹²?Wui, ï na Jwøk marwa, ge ba jäälï? Kiper waani bäŋ teek jïwa ki man këëtwa ki lwaak man ni päl bäre en ni ööi en kun tukge waani. Waani bäŋ gïn mo ŋäcwa mo løny tïïc jïwa; 'ba wa neeta jïrï.»

¹³'Ba jø Juuda bëët ge cuŋŋö nyïm Wuuö Jwøk, ge ko obwöre moge moa therø, ki määrge, ko obwöre moge moa reegø.

¹⁴'Ba dï acooŋŋøgø Jwïëc Wuuö Jwøk aput ö bäät Jadhiël wär Dhekaraya na käl røk jø tuuŋ Libay moa käl dëër Acaap, ki ri Benaya, ki Jïël, ki Mataniya.

¹⁵Ni kö Jadhiëlli, ni «U bëët, u na jø Juuda ki jø wø bëëdö yi Jerucalem, ki nyeya ma Jøcapat, cegu ïthu! Mana caan Wuuö Jwøki beeye en, ena köö jïïu, ni ‹Käru lwäyö ni ba bwøk cwïnynyu kiper lwaak man ni päl en; kiper patha u noo këëdi, 'ba beeye Jwøk noo këëdi kiperu.

¹⁶Diøø wäru løøyu piny baŋge; ka adïëri møn, ge puta öö ki ri thuur Dhic, ni putu ge joot dhi gool nyïm paap Juriel.

¹⁷U na jø Juuda ki jø Jerucalem, ba many u nou këëdu ri leny man; 'ba cïïmmu dëëtu, ni cuŋŋu karu ni neennu køny mar Wuuö Jwøk mano tïïe kiperu. Käru lwäyö ni ba bwøk cwïnynyu. Diøø dønynyu wøk baŋge, kiper Wuuö Jwøk bëëdö ka uuni.› »

¹⁸Kanyøgø Jøcapat wïïe aput kuul piny ni täärnyïme ee këël yïth ŋøøm, ni ö jø Juuda bëët ki jø wø bëëdö yi Jerucalem ni päthge nyïm Wuuö Jwøk, ni wøørge Wuuö Jwøk.

¹⁹Ni ö jø tuuŋ Libay moa käl dëër Kät ki moa käl dëër Köra ni öge maal ni pwøcge Wuuö Jwøk, Jwø Icriel, ni döötge ena maal døc.

²⁰Køøre kanya tïme na amöölla døc jø Juuda apäny maal ni cige paap Tëköa. 'Ba kanya cige wøk, Jøcapat acuŋŋö nyïmge ni kööe, «Wui, u na jø Juuda ki jø wø bëëdö yi Jerucalem, cegu ïthu baŋa. Ŋääthu Wuuö Jwøk na adïëri, eni na Jwøk maru, nee tietu këëtge piny ni teek. Ni ŋääthu nyïïkuk moe, nou käädhu.»

²¹'Ba Jøcapat kanya nø cäänge ki jiy, ena kwänyö ki jø wär ki dudi jï Wuuö Jwøk na jø pwøc Wuuö Jwøk ni geno ruyö ka abïïk wöt. Ni aac jø wär dudi moøgø ni ge cäädhi ka nyïm jø leny ni ge köö, ni «Dwøgø met ec jï Wuuö Jwøk, kiper mëër mare ni wø ba jøøl bëëdö na bäre bäre.»

²²'Ba kanya täkge ki wär dudi ni pwøcge Jwøk, jø Amön, ki jø Möap, ki jø Ëdöm moa ö kuna këëtge ki jø Juuda, wïthge aput Wuuö Jwøki kier ki man 'näkge rege keerge.

²³Kiper jø Amön ki jø Möap gena ö maal kuna këëtge ki jø Ëdöm, ni dïïrge wïth jø Ëdöm bëët. 'Ba kanya nø thöörge jø Ëdöm bëët ki 'näk, gena ö maal ni këëtge ki rege keerge, ni putge wïthge dïïr.

²⁴'Ba kanya ö jø Juuda na pïïcge kany wø neen dï paap ki yie ni ge raŋa lwaa leny, ka adïëri møn, dhaanhø bäre aputge joot no othøw, ni geno nibaŋŋa yïth ŋøøm ni bäŋ gø mo obøth.

²⁵'Ba kanya ö Jøcapati ki jiye kuna twierge jap jøøgø, gena jïtö ki jammi mo thööth dïge; ni beege jap tïïc, ka abïïe, ki jammi mo perge leth ma teeŋi. Ni kälge japøge kiper dëëtge ni thööth ni kaala tëër marge. 'Ba Jøcapat ki jiye gena kän wøk ki nïne adäk kanya twierge japøgøøni, kiper thööth døc.

²⁶'Ba na tïme na ri ŋweer nïne gena jïtö ka acooŋa yi gool mana cakge na Goor Gwïëth, ni pwøcge Wuuö Jwøk yi gø. Køøre nyeŋ kaace aputge cak ni Goor Gwïëth këël dïcäŋi.

²⁷'Ba jø Juuda ki jø Jerucalem bëët gena duuö ni ge bwøtha Jøcapati, ni duuge Jerucalem ki met ec, kiper gena tïïc Wuuö Jwøki nee yïthge mïnge bäät nyïïmän moge.

²⁸'Ba na öge Jerucalem ge pöödö ki wïth thøme ma teeŋi ni ge kudhö ki tuŋi këël mana pïïcge Øt Wuuö Jwøk.

²⁹'Ba kanya ö jø mïëri bëët moa en wï ŋöömö na wïnyge gø ni Wuuö Jwøk akëëdö ki nyïïmän mo jø Icriel, lwär mo dwøŋ døc mo käla baŋ Wuuö Jwøk aput tägö bäätge.

³⁰Kanyøgø buc nyec mar Jøcapat aput bëëtö ki bëët mëër, kiper Jwøk mare acïpö jïre ki jwöm kun ki kun.

³¹'Ba Jøcapat ena bëëdö na nyeya Juuda yi Jerucalem ki cwiiri ma pïërariiø kurbïïc. 'Ba kanya tïme na nyeya, cwiic dööŋö moe beege pïeradäk kurbïïc. Eni nyeŋ menni beeye Adhuba nyi Cili.

³²'Ba ena bëëdö ni caatha køør gïïa tïïc wänni ma Aca, ni käre gaa wøk ki yïthge; 'ba ena bëëdö ni tïïya gïï mo nëëni ni beyø ki jï Wuuö Jwøk.

³³'Ba kwör lam moa en bäät thuuri kär raanynyø, kiper jiy cwïnyge poot kärge løø baŋ Jwøk, Jwø kwäcge.

³⁴'Ba tïïe møga moa tïïc Jøcapati, ki mana täge këël aŋuunge, ogöörö yïth luup mo Jiyu wär Anani, moa näk ogöör piny yi Wëël Luup Nyec Icriel.

³⁵'Ba na tïme na køøre cään, Jøcapat nyeny Juuda ena dwätö ka Akadhiya nyeny Icriel. 'Ba kanya dwäte ka Akadhiya, atïmö na bääyö jïre.

³⁶Ena dwätö ki gø nee tïïge ki baabuure nee cige Tarcëc; ni tïïcge baabuure moøgø yi Edhiyön-Gabir.

³⁷'Ba nyikuŋ Jwøk ma Eliëdher wär Dödaba na käl dëër Marëca, ajäla mano käl Jwøki bäät Jøcapat acaane jïgø, ni kööe, ni «Kiper mana dwätï ka Akadhiya, Wuuö Jwøk japa tïïyï raanynye raanynyø.» 'Ba baabuure aput tøyø ni kärge løny këët ki man cige Tarcëc.