Read anuak 2 Luup Nyeye 21 Bible Online

2 Luup Nyeye 21 - anuak bible

2 Luup Nyeye 21

¹'Ba Jøcapat athøw ni läp køør kwäye, ni koonyi buut kwäye yi Pääny Deebit; ni ö wääde ma Jöram ni läw kar gø na nyeya.

²'Ba Jöram jïre da uutwänni, ni beege Adhariya, ki Jikiël, ki Dhekaraya, ka Adhariya, ki Mikaël, ki Cepathiya. 'Ba moøge bëët beege wäät Jøcapat nyeny Icriel.[12]

³'Ba wääge acïpö jïge ki muuce mo thööth, ni beege gwet-bïrö, ki warkey, ki jap kwär, këël ki päänye mo Juuda moa no ogeerø ni teek. 'Ba buc nyec mare acïbe jï wääde ma Jöram kiper beeye wääde mana kwøŋ nywøl.

⁴'Ba kanya ö Jöram na mak kare ni teek ni këël tier buc nyec mar wänni piny, eni uutwänni bëët anääe ko opëëllö, ki dïbwöthe møøk thuwø mo mïëri mo Icriel.

⁵'Ba Jöram kanya tïme na nyeya, cwiic dööŋö moe beege pïëradäk kurriiø, ni bëëde ni ena nyeya ki cwiiri abära yi Jerucalem.

⁶'Ba ena bëëdö ni caatha køør gïïa reyø na tïïc nyeye mo Icriel, kaawat moa tïïc jø dhi øt Akap, kiper nya Akap ee nywømø. Ni ö eni ni tïïe ki gïï mo nëëni ni reyø ki jï Wuuö Jwøk.

⁷'Ba Wuuö Jwøk ba many man raany dhi øt Deebit, kiper luubö mana näk ee tuudö ki Deebit, na kööŋe kiper gø ni eni cïpö ki dhaanhø mo dööŋ na wïc jïre røk nyïïkwaaye cooth.

⁸'Ba ki yïth nïne moa beet Jörammi ni ena nyeya, jø Ëdöm gena gëëmö ki jø Juuda ni öge wøk tietge, ni röönyge ki nyeya kiper dëëtge keerge.

⁹Køøre Jöram ki kwääc lwaae moe mo leny ki jïëth leny moe bëët mo wø tut okwëënyi, gena cøø ni ŋutge baŋ jø Ëdöm. Ni ö jø Ëdömmi ni cielge eni dïër. 'Ba na tïme na dï wäär, gena ö maal ni päärge wøk ki yïthakic jø Ëdöm moa näk rege ege ciel deŋge, ki kwääc lwaae mo jïëth leny mo wø tut okwëënyi.

¹⁰'Ba jø Ëdöm gena put bëëtö ni ge gëëmö ki jø Juuda këël dïcäŋi en. 'Ba kar kaagø thuwø beeye kanya ö jø Libana na gëëmge ki Jöram, kiper na ö Jörammi na wec Wuuö Jwøk, Jwø kwäye.

¹¹'Ba Jöram ena tïïö thuwø ki kwör lam bäät thuuri mo Juuda, ni bwøth jø Juuda ki jø Jerucalem ki man gaage wøk køør juu møøk kaawat man wø tïïc dhaaŋ paaci mo rïïŋö køør käp.

¹²Køøre da wëëlö ma aö baŋe mo käla baŋ nyikuŋ Jwøk ma Ilaaja, ni kööe, ni «Mana caan Wuuö Jwøki, Jwø kwaru ma Deebit, beeye en, ena köö, ni ‹Ïïni, ï kär cäädhö ki yi jöö mana caath wäru ma Jøcapat ki kwaru ma Aca nyeny Juuda.

¹³'Ba ï cäädhi ka jöö mana cääth nyeye mo Icriel ki gøøni, ni bwøthï jø Juuda ki jø Jerucalem ki man gaage wøk kaawat man wø tïïc dhaaŋ paaci mo rïïŋö køør käp, keda mana tïïc jø dhi øt Akapi. Ni 'nägï wäät wäru thuwø, ni beege dhi ødï kiree, jøøa theemma geni ki ïïni.

¹⁴Kiper manøgønø, Wuuö Jwøk kännö ki gïn mo leth bäät jiyï ki wäätï ki määrï, ki jammi bëët moa en jïrï.

¹⁵'Ba ï tïmö ni tuu døc ki täw mo teek, ni beeye täw mar cïïn, këël mano tïme ni cïïrï ööa wøk cooth ki täwögø.› »

¹⁶Køøre Wuuö Jwøk yïth jø Pilitin ki jø Arabe mo wø bëëdö keew ki jø Kuuc atheŋe kiper nee këëtge ki Jöram,

¹⁷ni öge ni tukge Juuda, ni kälge jammi bëët moa jootge po nyeya, ni kuurge ka wääte ki määre. 'Ba bäŋ o nyeya mo odööŋ jïre, ni näk mo patha Akadhiya keere na thiinhnha eni ki røk wääte.

¹⁸'Ba ki køør gïïögø bëët, ena mooc Wuuö Jwøki ki täw cïïn mo ba løny ki køny.

¹⁹'Ba na bëëde ni tuu na ennø, na tïme ni ra aŋuun riet cwiiri, cïïn moe aö wøk ki täwögø, ni put thøø yi rääm mo leth døc. 'Ba eni kär äm jiyi moe ki maac ki køør wödö kaawat mana äm kwäye ki maac ni wøøra geni.

²⁰'Ba eni kanya tïme na nyeya, cwiic dööŋö moe beege pïëradäk kurriiø, ni bëëde ni ena nyeya Jerucalem ki cwiiri abära. 'Ba kanya thøøe, bäŋ ŋat mo okïïn gïre. 'Ba ena koonyge yi Pääny Deebit, ni patha kany wø koony nyeye yie.