Read anuak 2 Luup Nyeye 22 Bible Online

2 Luup Nyeye 22 - anuak bible

2 Luup Nyeye 22

¹Køøre jø Jerucalem Akadhiya na thiinh o Jöram atïïcge na nyeya kar wänni, kiper wäät Jöram moa døøŋŋø bëët anäk dïtwïëte moa ö ki jø Arabe na ö twïër. Kanyøgø Akadhiya o Jöram nyeny Juuda aput tägö ki man käär paac.

²'Ba Akadhiya kanya tïme na nyeya, cwiic dööŋö moe beege pïërariiø kurriiø, ni bëëde ni ena nyeya ki cwiir aciel yi Jerucalem. 'Ba nyeŋ menni beeye Athaliya nyikwaar Ømri.

³'Ba eni thuwø, ena bëëdö ni caatha køør gïïa reyø na tïïc jø dhi øt Akap, kiper mana bëët menni ni pwönynya gø ki tïï gïï mo reyø.

⁴Ni put bëëte ni tïïya gïï mo nëëni ni reyø ki jï Wuuö Jwøk, kaawat mana tïïc dhi øt Akapi, kiper dhi øt Akap beege na cïpö jïre ka acaare køør thøw wänni, këël mana cööp ri ränynyö mare.

⁵'Ba Akadhiya abëëdö ni cäädhi ka køør acaare mo jøøgø, ni cøøe ki Jeyöram wär Akap nyeny Icriel ni këëtge ki Adhaël nyeny Aram yi Ramöth-Gelät, ni ö jø Arammi ni moocge dëër Jeyöram ki ŋwellø.

⁶Kanyøgø nyeya ma Jeyöram adøø Jedhriel kuna tuu eni ki ŋwellø mana tïïc jø Arammi dëëre Ramöth kanya këëtge ka Adhaël nyeny Aram. Ni ö Akadhiya o Jöram nyeny Juuda ni løøc piny kuna lïïmme baŋ Jeyöram wär Akap yi Jedhriel, kiper mana näk eni tuu.

⁷'Ba ränynyö mar Akadhiya käla baŋ Jwøk kanya ci baŋ Jeyöram. Kiper kanya pïïe ena put ci wøk ki Jeyöram baŋ Jiyu wär Nimci, ŋata tïïc Wuuö Jwøki nee wïïe thïïmmi ki maaw kiper nee dhi øt Akap raanynye.

⁸'Ba kanya ö Jiyu na wëëk ajäla thur kare bäät dhi øt Akap, ena jïtö ki jø paan dwøŋ mo Juuda ki wäät uut wää Akadhiya moa wara tïny Akadhiya, ni put ge näk.

⁹Køøre Jiyu Akadhiya amanynye thuwø, ni makge gø kanya kan ree yie yi Cameria. Ni kälge gø baŋ Jïyu ni 'näkge gø. Køøre ena koonyge, kiper gena köö, ni «Ena nyikwaar Jøcapat, ŋata bëëdö ni manynya Wuuö Jwøk ki cwïnye bäre.» Kanyøgø aput tïmö ni bäŋ dhaanhø këët mo odööŋ mo mak buc nyec ki røk jø dhi øt Akadhiya.

¹⁰'Ba kanya ö Athaliya mii Akadhiya na joot gø ni wääde othøw, ena ö maal ni 'näk jiy bëët moa en dhi øt nyec mar Juuda.

¹¹'Ba Jeyöcaba nyi nyeya ma Jöram, Jöac wär Akadhiya akwäl wøk ki yïthakic wäät nyeya moa näk di nääö, ni kïth gø yi øt niine mana en yi Øt Wuuö Jwøk ge ki ŋata pïr gø. Køøre Jeyöcaba nyi nyeya ma Jöram, na näk beeye cï Jööda na bëëdö na dïlämi mana dwøŋ, Jöac akane ni bødhe ki thøø mana tïïc Athaliya, kiper Jeyöcaba beeye cöök Akadhiya.

¹²'Ba nyilaal manøgø aput bëëte ki geni no okanø ki cwiiri abïciel yi øt Jwøk, kanya bëët Athaliya ni paac ena cere.