Read anuak 2 Luup Nyeye 23 Bible Online

2 Luup Nyeye 23 - anuak bible

2 Luup Nyeye 23

¹'Ba kanya tïme na bïriet cwiiri, Jööda tiere akëël piny ni teek, ni lwør kwääc lwaa dïpe ni tude ki luubö ki geni. 'Ba kwääc lwaae moøka beege Adhariya wär Jeröam, ki Icmiel wär Jöanan, ka Adhariya wär Obet, ki Maycëya wär Adaya, ki Elicapat wär Dhikri.

²Køøre gena aa dï Juuda bäre ni cooŋge jø tuuŋ Libay ki bwöthe mo dhøk uudi mo Icriel[13] ki yïth päänye bëët moa näk mo Juuda, ni öge Jerucalem.

³Køøre jø acooŋŋøgø bëët gena put tudö ki luubö ki nyeya yi Øt Wuuö Jwøk. Ni kö Jööda jïge, ni «Ka adïëri møn, o nyeya cøøa bäät wälu ki køør mana caan Wuuö Jwøki kiper nyïïkwaac Deebit.

⁴'Ba gïno tïïyu beeye en: U na dïlämme ki jø tuuŋ Libay mo wø ö baŋ tïïc ki cäŋ jwömö, ki røk dhøgi adäk mou moa näk ocïïmmö, dhøk aciel rege wär tïme na jø koor dhøk kal mo Øt Jwøk,

⁵ni ö dhøk acielli ni tïme na jø koor øt nyeya, ni ö dhøk acielli maya thuwø ni tïme na jø koor dhi kiir Cuur. 'Ba jiy bëët wär enge yïth käälle mo Øt Wuuö Jwøk.

⁶'Ba kär dee ŋat mo døny yi Øt Wuuö Jwøk, ni näk mo patha dïlämme keerge ki jø tuuŋ Libay ni wø kunynyi ki tïïc. Jøøgøøni keerge løny ki man dønyge yi gø, kiper dëëtge ege cïp kur keerge ni waany. 'Ba jiy bëët wär bëëtge ni ge gwøga luup moa caan Wuuö Jwøki.

⁷'Ba jø tuuŋ Libay wär bëëtge ni deŋ nyeya ege cielø, ni ŋati man nø jap leny moe ena cere. 'Ba dhaanhø jaak mano døny yi Øt Wuuö Jwøk, wär eni put 'näk. 'Ba bëëdu nou cäädhi ka nyeya kany wø ci yie jaak.»

⁸Kanyøgø jø tuuŋ Libay ki jø Juuda bëët gïïögø bëët aputge tïïc ki køør mana ö Jööda na näk Kwääy Lam Mana Dwøŋ na kööm geni ki ge. Ni ö ŋati man nø dëëtge ni lwør jiye moa doo ö baŋ koor ki cäŋ jwömö ki moa doo ö wøk ki bäät koor ki cäŋ jwömö. Kiper Jööda na näk Kwääy Lam Mana Dwøŋ, bäŋ dhøk aciel ki røk dhøgi moa näk ocïïmmö mo jøøgøøni mo ee wiiø nee ö wøk ki bäät koor.

⁹'Ba eni tøøŋi ki kööt leny moa døøŋŋø ki moa therø na en Øt Jwøk na näk mo nyeya ma Deebit acïbe jï kwääc lwaa dïpe.

¹⁰Ni ö eni ni cïïm jiy bëët kwörge, ni ŋati man nø jap leny moe ena cere, ki mana täge ki jï løø bäät cwïïc mar Øt Jwøk këël mana këët løø bäät caam mar Øt Jwøk, ki deŋ gïn wø cïp olämme bääte, ki deŋ øtø bäre, ni ge ciela nyeya dïër.

¹¹Køøre o nyeya akälge wøk ni cïpge adun nyec wï gø, ni cïpge wëël ciik Jwøk jïgø, ni ge røønya gø na nyeya. Ni ö Jööda ki wääte ni thïïmge wï gø ki maaw, ni kwöŋge, ni «Nyeya puta bëëtö na bäre bäre!»

¹²'Ba kanya ö Athaliya na wïny dööt jiy ni jiy rïïŋö ni ge pwøya nyeya, ena put ci baŋge yi Øt Wuuö Jwøk.

¹³'Ba na lwïthe, ka adïëri møn, nyeya mana nyään aput joot dhi øtø ni cuŋŋö buut gïna näk caala dïkweeri, ni kwääc lwaae ki jø wø kooth tuŋi ena deŋŋe; ni jø paac bëët yïthge omïnnö ni ge kudhö ki tuŋi; ni jø wø wär ki dudi, ge wär ni ge pöödö ki jap dööti moge ma teeŋi, ni ge bwøtha ajwöma manøgø. Kanyøgø Athaliya abïï mare aput jeec ki pänh cwïny, ni jwöŋe ni «Wui, maru ageem öy! Maru ageem öy!»

¹⁴Kanyøgø Jööda na näk Kwääy Lam Mana Dwøŋ, kwääc lwaa dïpe na näk ojierø bäät jø leny aput cwöl wøk ni kööe jïge, ni «Kälu nyijøøgø wøk ki yïthakic jiy moa näk rege ege caanø; 'ba ŋato läp køør gø jaak wär putu 'näk ko opëëllö.» Kiper onø caan Dïlämi, ni «Eni kär nää yi Øt Wuuö Jwøk.»

¹⁵Kanyøgø nyijøøgø aputge mak; 'ba kanya tïme ni eni pïï dhi kal man wø døny okwëënyi ki yie deŋ øt nyeya, ena putge 'näk kaace.

¹⁶Køøre Jööda aput tudö ki luubö yïthakicge ki jiy bëët ki nyeya, nee ge bëëtge ni gena jic Wuuö Jwøk.

¹⁷Køøre jiy bëët gena ci øt jwøk mar Baal, ni nyaage gø piny, ni ö gïï wø cïp olämme bäätge mo Baal ki kït gïïa näk otieŋø ni ŋwaalla kïte, ni tøcge ge na thäŋi; ni 'näkge Matan na näk dïlämi mar Baal nyïm gïï wø cïp olämme bäätge.

¹⁸'Ba Jööda tïïe mo Øt Wuuö Jwøk aput cïp ceŋ dïlämme na näk jø tuuŋ Libay, jøøa jier Deebiti bäät tïïe mo Øt Wuuö Jwøk, nee wø cïpge ko olämme mo wø waaŋ bäre jï Wuuö Jwøk ki køør mana no ogöör piny yïth ciik Modhe, ni mïn yïthge ni wärge ki dudi ki køør dwør Deebit.

¹⁹'Ba Jööda jø koor dhøk kal mo Øt Wuuö Jwøk acïïmme kwörge, nee bäŋe dhaanhø jaak mo døny yi gø ni ba waany.

²⁰Kanyøgø kwääc lwaa dïpe, ki kwääri, ki dïbwöthe mo jiy, ki jø paac bëët, gena öö ni kälge nyeya piny ki Øt Wuuö Jwøk, ni kïthge gø paan-dwøŋ ni ge cøra dhi kal mana en jï maal, ni wëëkge nyeya pïïn piny bäät wäl nyec.

²¹Kanyøgø jø paac bëët yïthge aput mïnnö, ni ö päänynyi ni neebäc kiper mana 'näkge Athaliya ko opëëllö.