Read anuak 2 Luup Nyeye 24 Bible Online

2 Luup Nyeye 24 - anuak bible

2 Luup Nyeye 24

¹'Ba kanya tïm Jöaci na nyeya, cwiic dööŋö moe abïriiø, ni bëëde na nyeya yi Jerucalem ki cwiiri ma pïëraŋween. 'Ba nyeŋ menni beeye Dhibiya nyijø Bëërcïïba.

²'Ba Jöac abëëdö ni tïïya gïï mo nëëni ni beyø ki jï Wuuö Jwøk ki yïth nïne bëët moa beet Jööda na näk Kwääy Lam Mana Dwøŋ.

³Ni ö Jööda ni nyöömme jï gø ki mään ariiø, ni ö eni ni put jïtö ki wääte ki nyïïe.

⁴'Ba na tïme na køøre cään, Jöac acädö nee kwöra näk oränynyö dëër Øt Wuuö Jwøk nee dwøk karge.

⁵Kanyøgø dïlämme ki jø tuuŋ Libay acooŋe ni kööe jïge, ni «Cou wøk yïth päänye mo Juuda ni cooŋŋu gwel ki baŋ jø Icriel[14] bëët kiper nee Øt Wuuö Jwøk cäŋ tïïyö ni nyään kany wø tïme na yi cwiir cooth. 'Ba ennø, tïïc manøgø wär laaru tïïc.» 'Ba jø tuuŋ Libay tïïc manøgø kärge laar tïïc.

⁶Kanyøgø nyeya, Jööda na bëëdö na Kwääy Lam Mana Dwøŋ acwøle ni kööe jï gø, na «?Aperŋø ni ba cäännï jø tuuŋ Libay en ki man kälge gwet ajwäk ki baŋ jø Juuda ki jø Jerucalem, ni beeye ajwäk mana caan Modhe dhaanh Wuuö Jwøk ya acooŋ jø Icriel kiper oduŋkaany røømmø man wø nyooth luumma tuut Jwøki ki jiy?»

⁷'Ba wäät Athaliya, dhaaŋŋa raac, Øt Jwøk atoorge ni dønyge yi gø, ni tïïcge jammi moa en kur keerge na en Øt Wuuö Jwøk na mo juuk wø cwøl ni Baal.

⁸'Ba nyeya dïlämme aköömme ki man tïïge ka acanduk, ni cïpge gø wøk buut dhi kal mar Øt Wuuö Jwøk.

⁹Køøre gena gööc piny ka awaaci yi Juuda ki yi Jerucalem ki man cïpge ka ajwäk jï Wuuö Jwøk kaawat mana caan Modhe na näk dhaanh Jwøk dï paap jï jø Icriel.

¹⁰Kanyøgø dïbwöthe bëët ki jiy bëët yïthge amïnnö ni kälge gwel moa jwäkge ni kïthge ge ya acanduk, këël mana päŋ acanduki.

¹¹'Ba kany wø ö jø tuuŋ Libay wø kïthge acanduk baŋ jø wø tïny nyeya, kany wø jootge gø ni gwel thööth, ŋat wø göör luup akwöma piny, ki ŋat wø tïny dïlämi mana dwøŋ, ge wø ö ni lwørge gwel moa en ya acanduk, ni dwøkge acanduk kare. Ni bëëtge ni ge tïïya gïnögø ki yi cäŋ cooth, ni putge jïtö ki gwel mo thööth.

¹²Køøre nyeya ki Jööda gwel moøgø acïpge ceŋ jø wø raŋ tïïe mo Øt Wuuö Jwøk, ni ö jøøgø ni cwötge ki jø tïïc, ni beege jø wø gëëdö ki kïte, ki dïjëëth opämi, këël ki jø wø tïïc tïïe mo nywïënyö man wø cwøl na ayrön, ki nywïënyö mana näk jwïël, kiper nee Øt Wuuö Jwøk dwøkge kare.

¹³Kanyøgø jø tïïc moøgø kwöra näk oränynyö dëër Øt Wuuö Jwøk aputge tïïc, ni dwøkge Øt Jwøk kare ni teek kaawat mana bëëde.

¹⁴'Ba kanya nø thöörge tïïc manøgø, gwel moa dööŋ wøk ri tïïc aduuge baŋ nyeya ki Jööda, ni tïïcge ge na jap tïïc mo Øt Wuuö Jwøk, ni beege jap tïïe ki jap olämme mo wø waaŋ bäre, ki cäänne, ki jap tïïc møøk mo tïïc ka warkey ki gwet-bïrö. 'Ba gena bëëdö ni ge cïpö cooth ko olämme mo wø waaŋ bäre yi Øt Wuuö Jwøk ki yïth nïne bëët moa beet Jööda.

¹⁵'Ba kanya tïm Jööda na jaal ni cwiiye oløny ni thööth, ena thøw. 'Ba kanya thøøe, cwiiri moe beege dïpa ki pïëradäk.

¹⁶'Ba ena koonyge yi Pääny Deebit buut bwör mo nyeye, kiper gïïa beyø na tïïe jï jø Icriel ki jï Jwøk ki øtø mar Jwøk.

¹⁷'Ba na tïme na køør thøw Jööda, dïbwöthe mo Juuda gena ö baŋ nyeya ma Jöac, ni këëlge cøŋge piny ni wøørge gø, ni cäänge ki gø, ni ö nyeya ni jïëc luumge.

¹⁸Kanyøgø Øt Wuuö Jwøk, Jwø kwäcge, awecge, ni tïmge ni ge tïnynya jera no otieŋø na no ocaa ri jwø wø cwøl na Acara, ki kït gïï wø lam. Kiper manøgønø, wëër mar Jwøk aput ö bäät jø Juuda ki jø Jerucalem kiper bääyö manøgø na tïïcge.

¹⁹Køøre Wuuö Jwøk nyïïkuk moe ajääŋŋe baŋ jiy nee ge duuge baŋe, eni na Wuuö Jwøk. 'Ba këël na bëët nyïïkuk Jwøki ni cäänna geni kiper gïïa reyø na tïïcge, ïthge kärge ciiø.

²⁰Kanyøgø Jwïëc Jwøk aö bäät Dhekaraya wär Jööda, na bëëdö na dïlämi mana dwøŋ, ni cuŋŋe nyïm jiy ni kööe jïge, ni «Jwøk aköö, na ‹?Aperŋø na weyu gïïa ö Wuuö Jwøki na kööm uuni ki ge? Kiper manøgønø, bäŋ gïn mo tïïyu mo thur kare jïïu. 'Ba uuni, kiper mana weyu Wuuö Jwøk, uuna wiie thuwø.› »

²¹Køøre gena put tudö ki luubö bäät Dhekaraya, ni këërge Dhekaraya ki kïte ki køør dwør nyeya, ni putge gø 'näk yi kal mar Øt Wuuö Jwøk.

²²'Ba nyeya ma Jöac, Dhekaraya anääe ni wïïe käre caarø ki Jööda wää Dhekaraya na nyooth mëër mare jïgø. 'Ba kanya tïm Dhekaraya ni manynya thøø, ena köö, ni «Wuuö Jwøk ïïno neene ni cool kwör dëërï.»

²³'Ba na tïme na køør cwiir manøgø, jø leny mo jø Aram gena ö kuna këëtge ki Jöac, ni öge Juuda ki Jerucalem, ni 'näkge dïbwöthe bëët mo jøøgø yïthakic jiy, ni jääŋge jammi bëët moa twierge jï nyeya mar Damacka.

²⁴'Ba këël na ö jø lenynyi mo jø Aram na öge ni kwäänge nøk, Wuuö Jwøk jø leny mo Juuda na thööth døc acïp ceŋge, kiper mana ö jø Juuda na wecge Wuuö Jwøk Jwø kwäcge; ni ö jøøgø ni putge ajäla wëëk thur kare bäät Jöac.

²⁵'Ba kanya ö jø lenynyi mo jø Aram na aacge, Jöac wecge ni tuu ki ŋwellø mo leth døc. 'Ba jiye atudö bääte ki luubö man 'näkge gø ki gø kiper kwör rem Dhekaraya wär Jööda, na bëëdö na dïlämi mana dwøŋ, ni putge gø nää bäät pëëm mare. 'Ba ena koonyge yi Pääny Deebit, ni patha buut bwör mo nyeye.

²⁶'Ba jøøa tudö bääte ki luubö na 'näk gø bee Dhabat o Cimät, nyï Amön, ki Jödhabat o Cimrïth nyï Möap.

²⁷'Ba luum wääte, ki luup ajäla moa caan nyïïkuk Jwøki kipere, ki luum dwøk kwöra näk oränynyö dëër Øt Jwøk karge, ogöörö yïth luup moa no ogöör piny yi Wëël Nyeye. Ni ö wääde ma Amaciya ni läw kar gø na nyeya.