Read anuak 2 Luup Nyeye 25 Bible Online

2 Luup Nyeye 25 - anuak bible

2 Luup Nyeye 25

¹'Ba kanya tïm Amaciya na nyeya, cwiiye pïërariiø kurbïïc, ni bëëde ni ena nyeya ki cwiiri ma pïërariiø ka abïŋween yi Jerucalem. 'Ba nyeŋ menni beeye Jöadan nyijø Jerucalem.

²'Ba Amaciya ena bëëdö ni tïïya gïï mo nëëni ni beyø ki jï Wuuö Jwøk. 'Ba këël na bëëde na ennønø, eni poot ba tïïö ka cwïnye bäre na adïëri.

³'Ba kanya ö tier nyeci mare na këët piny ennø, eni jøøa tïïö tiere na 'näk wänni kanya bëët wänni na nyeya aput 'näk.

⁴'Ba eni wäät jøøa 'näk wänni käre nääö. Kiper atïïe ki køør luubö mana no ogöörö yi wëël ciik Modhe, na cem Wuuö Jwøki na kööe, ni «Wëëe ba doo nääö kiper gïïa tïïc obwöre moge, no obwöre thuwø ba doo nääö kiper gïïa tïïc wëëkge. 'Ba ŋati man nø doo thøw ni thuunhnha raaye keere.»

⁵Køøre Amaciya jø tuuŋ Juuda ki jø tuuŋ Benjamen acooŋe, ni cïïm geni ki køør dhøk uudi moge tiet kwääc lwaa kume ki kwääc lwaa dïpe; ni kwaan cwøw bëët moa näk cwiicge opäŋ na pïërariiø këël kunece, ni jïte ki jø leny mo teek ma kume ma dïpe adäk mo løny man cige baŋ leny man wø këël ki tøøŋi ni røk di gëëŋŋö ki kööde.

⁶Ni jïte thuwø baŋ jø Icriel ki jø leny mo teek mo kwäänge kume ma dïpa mo këëdi ki gwel. Ni cun ge ki gwet-bïrö ma rumme ma kikarri ma dïpa.

⁷'Ba nyikuŋ Jwøk aö baŋe ni kööe jïgø, ni «Wui nyeya ma Amaciya, kär jø leny mo Icriel tïïyï nee cige baŋ leny ki ïïni na aciel. Kiper Wuuö Jwøk tøør buut jø Icriel; eni tøør buut nyïïkwaac Ipariem moøgø bëët.

⁸'Ba ni näk miï cøø ki ge, wärï ciï, ni magï riï ni teek ki leny; 'ba Jwøk ï poot wëëge böötö nyïm nyïïmän. Kiper Jwøk jïre da teek ki man køny dhaanhø, wala man wëëk dhaanhø böötö.»

⁹'Ba Amaciya aköö jï nyikuŋ Jwøk manøgø, na «?Agïnaŋø nø noo tïïcwa kiper gwet-bïrö moa näk rumme ma kikarri ma dïpa na nø cïba jï jø leny mo Icriel?» Ni løgi ya nyikuŋ Jwøki, ni «Wuuö Jwøk cïpö jïrï ki mo thööth mo opöödhö ni kaala moøgø.»

¹⁰Køøre Amaciya jø leny moa joode ki baŋ jø tuuŋ Ipariem na ö baŋe aput wec nee døøge paac. Ni ö jø lenynyi moøgø ni put cwïnyge waaŋ ki gootø mo dwøŋ døc ki jø Juuda, ni døøge paac ni cwïnyge owaaŋ ki gootø.

¹¹'Ba Amaciya dëëre amaae ni teek ni bwøth jiye ma jø Juuda ni cige Pwöl Acäbö ni 'näkge jø Ëdöm ma kume apaar.

¹²Ni makge jiy ma kume apaar, ni kälge ge ni kärge nää, ni kïthge ge wï kïdi, ni lëëŋge ge piny ki wï kïdi ni putge tøyø bëët.

¹³'Ba jø leny mo Icriel moa dwøk Amaciya paac nee ba cige baŋ leny ki eni, päänye mo Juuda atukge, ki mana täge ki Cameria këël Bëëth-Örön, ni nääge ki jiy ma kume adäk yïth päänye moøgø, ni twierge jammi mo thööth døc.

¹⁴'Ba kanya duu Amaciya ki kuna 'näk jø Ëdöm, ena kuunnö ki juu mo jø Ëdöm, ni cwöth ge piny jïre na juu moe, ni bëëde ni cøŋŋe këëlle piny nyïmge ni wøøra ge, ni wääŋö nyïmge ki gïï wø jïcge ŋwääi ni met.

¹⁵'Ba wëër mar Wuuö Jwøk aput liel kaamar maac bäät Amaciya, ni ö Wuuö Jwøki ni jääŋ nyikugö mare baŋ gø mo cäänna gø, na «?Aperŋø ni manynyï juu mo jiy en, juu mo jicge kärge piemø cerï?»

¹⁶'Ba kanya poot nyikuŋ Jwøki manøgø ni cäänna gø, eni na nyeya ma Amaciya aput köö jï nyikuŋ Jwøk, na «?Aŋø, ïïna jierwa na ŋat cïp acaare jï nyeya? Lïŋï! ?Ï manynya thøø?» Køøre nyikuŋ Jwøk alïŋö ni kööe, na «Aŋääa møn ni Jwøk da gïn mo ee nø cïp piny ki man raany ïïni, kiper gïn ni tïïyï en, ni kweerï ki man wïnynyï luumma caana.»

¹⁷Køøre Amaciya nyeny Juuda ajäägö ki dwøl jï nyeny Icriel ma Jeyöac wär Jeyöakac, nyikwaar Jiyu, ni kööe, ni «Ööï nee dëëtø raŋø.»

¹⁸'Ba Jeyöac nyeny Icriel aput jääk baŋ Amaciya nyeny Juuda ki dwøl mo köö, ni «Ïïni, ï caala oŋöönö jaak mana en yi lur Libaanø, na jääk baŋ jaath mana pere leth na en yi lur Libaanø, ni kööe, ni ‹Cïp nyaarï jï wääda nee nywøme.› 'Ba kar kaagø, lää paap mo bëëdö yi lur Libaanø aput cør kaace, ni put oŋöönö nyøøn piny.

¹⁹'Ba ennø møn, ïïna köö ni jø Ëdöm anø böötï ni jït cwïnyï ka atöör. Ennø, bëëdï paarï. ?Aŋø ni manynyï gïn mo raac en, mo ïïni ki jiyï ma jø Juuda u thum ki gø?»

²⁰'Ba Amaciya akweer ki man cek ïthe, kiper luubö manøgø bäre käla baŋ Jwøk; kiper Jwøk manynya geni na jø Juuda nee ge cïp cer Jeyöac, kiper mana bëëtge ni ge manynya juuk jø Ëdöm.

²¹Kanyøgø Jeyöac nyeny Icriel aci baŋe, ni put wïthge nigäk ka Amaciya nyeny Juuda, ni putge këëdö kanya cwøl ni Bëëth-Camic, na en løø kur jø tuuŋ Juuda.

²²Ni ö jø Juuda ni bööti ya jø Icrielli, ni reŋge ni ŋati man nø reŋŋa paare.

²³Køøre Jeyöac nyeny Icriel nyeny Juuda ma Amaciya o Jöac, nyikwaar Akadhiya, aput mak ki tøŋ yi Bëëth-Camic, ni kïth gø Jerucalem, ni toor kiir Jerucalem piny, ki mana täge ki dhi kiir mana cwøl ni Ipariem këël mana këët dhi kiir mana en gøøt; ni kanya toor piny bär mare beeye gööye ma dïpe aŋween.

²⁴Ni ö Jeyöaci ni lwør warkie bëët ki gwet-bïrö bëët, ki jap paac bëët moa joot yi Øt Jwøk buut Obet-Idöm, ki moa en kwör kän mo øt nyec, ni käl jiy moa maae ki tøŋ thuwø ni døø Cameria.

²⁵'Ba Amaciya o Jöac nyeny Juuda, abëëdö ki cwiiri apaar kurbïïc køør thøw Jeyöac wär Jeyöakac nyeny Icriel.

²⁶'Ba luum tïïe møga moa tïïc Amaciya ki mana täge këël aŋuunge, ogöör piny yi Wëël Luup Nyec Juuda Ki Icriel.

²⁷'Ba kanya ö Amaciya na wec wääth køør Wuuö Jwøk, jiy atudö ki luubö bääte yi Jerucalem, ni ö eni ni put reŋ Lakic. 'Ba gena jääk køøre ki jiy Lakic ni putge gø 'näk kunece.

²⁸Køøre rïŋ dëëre akälge ki bäät okwëënyi ni koonyge gø buut kwäye yi Pääny Juuda.