Read anuak 2 Luup Nyeye 26 Bible Online

2 Luup Nyeye 26 - anuak bible

2 Luup Nyeye 26

¹'Ba jø Juuda bëët Udhaya[15] na näk cwiiye apaar ka abïciel alwørge ni tïïcge gø na nyeya kar wänni ma Amaciya.

²Ni ö Udhaya ni cäŋ paana cwøl ni Ëlath geerrø ni dwøk gø tier Juuda køør thøw wänni kanya läp køør kwäye.

³'Ba kanya tïm Udhaya na nyeya, cwiic dööŋö moe apaar ka abïciel, ni bëëde ni ena nyeya ki cwiiri ma pïërabïïc kurriiø yi Jerucalem. 'Ba nyeŋ menni beeye Jeköliya nyijø Jerucalem.

⁴'Ba Udhaya abëëdö ni tïïya gïï mo nëëni ni beyø ki jï Wuuö Jwøk, kaawat moa tïïc wänni ma Amaciya.

⁵Ni put bëëte ni manynya Jwøk ki yïth nïne moa beet Dhekaraya, ŋata pwöny gø ki køør jammi moa nyooth Jwøki. 'Ba kanya bëëde ni eni manynya Wuuö Jwøk, jammi atïïc Jwøki jïre ni beyø.

⁶'Ba Udhaya aci wøk baŋ leny ni tuk jø Pilitin, ni toor kiir Gëth piny, ki kiir Jabne, ki kiir Acdöt; ni gëëde ki päänye yi ŋööm Acdöt, ki kwör møøk thuwø yïthakic jø Pilitin.

⁷'Ba ena køny Jwøki ki leny mana këële ki jø Pilitin, ki mana këële ka Arabe mo wø bëëdö Guur-Baal, ki mana këële ki jø Meunim.

⁸'Ba jø Amön gena cïpö jï Udhaya ka ajwäk. Ni ö Udhaya ni wïny nyeŋŋe këël mana këët keew ki Ijep, kiper ena tïmö ni teek døc.

⁹'Ba Udhaya ena gëëdö thuwø yi Jerucalem ki uut koor moa näk ogeerø ni ena maal. Ni kwöra gëët yïthge beege dhi kiir mana en gøøt, ki dhi kiir Agäm Kïdi, ki kanya gun kiirri ki yie. 'Ba uut koor moøgøøni ageere ni teek døc.

¹⁰'Ba ena gëëdö thuwø dï paap ki uut koor moa no ogeerø ni ena maal, ni kunye ka aguule mo thööth mo cuŋ pïïyi yïthge, kiper jïre da lääc paac mo thööth yi ŋöömma näk ree ee päärö. Eni thuwø jïre da jø wø puur pwöth ki jø wø piith omøki yïth mïëya en bäät thuuri ki yïth ŋøøpa beyø ni wø ciek caammi yïthge, kiper eni yie met ki puur.

¹¹'Ba Udhaya jïre da jø leny thuwø mo rege jiiŋŋø kiper leny, mo geno pääŋŋö na dhøgi ki køør nyeŋge moa näk ogöör Jïëlli piny na bëëdö na dïgöödi, ki Maycëya na bëëdö na kwääc lwaak. 'Ba ge ena tier kwäärö aciel mo cwøl na Ananiya ki røk kwääri moa en tier nyeya.

¹²'Ba kwään dïbwöthe mo dhøk uudi moge moa bëëdö na jø leny moa teek, beege kume ariiø ki dïpe abïciel.

¹³'Ba tiet jøøgø da jø leny mo teek mo kwäänge kume ma dïpe adäk ka abïriiø ki dïpe abïïc mo løny man këëtge ki teek mo dwøŋ ki nyïïmän kiper nyeya.

¹⁴'Ba Udhaya ena tïïö thuwø jï jø leny bëët ki kööt leny mo gëëŋ dëël ki ge, ki tøøŋi, ki cööc nywïëny, ki kööt leny mo røø dëël, ka athëëre, ki kaae mo thöör kïte ki ge ni di wïrö.

¹⁵'Ba ena tïïö yi Jerucalem thuwø ki jap leny mo nyärö ki køør acaare mo jiy moa nyeŋge reegø, nee jap leny moøgø bëëtge kwör koor moa näk ogeerø ni ena maal ki yïth gøøde mo kiir, kiper thöör athëëre ki thöör ki nyeŋ kïte moa døøŋŋø. 'Ba Udhaya nyeŋŋe aput wïnyö døc kwör mo bäyö, ni tïme ni teek døc ki køør gïïa rëëm ec na tïïc Jwøki kipere.

¹⁶'Ba Udhaya kanya nø tëënne, cwïnye ajïtö ka atöör, ni päth yïth raay, ni bääye dëër Wuuö Jwøk, Jwøk mare. Kiper ena døny yi Øt Wuuö Jwøk kuna waaŋ jer wø jïcge ŋwääi ni met bäät gïn wø waaŋ jer wø jïcge ŋwääi ni met bääte.

¹⁷'Ba Adhariya na bëëdö na Kwääy Lam Mana Dwøŋ adøny køøre, eni ki dïlämme møøk mo Wuuö Jwøk, dïlämme mo teek mo kwäänge pïërabära.

¹⁸Ni mänge nyeya ma Udhaya, ni köge jïgø, ni «Udhaya, patha ïïni na doo wääŋö ki gïï wø jïcge ŋwääi ni met jï Wuuö Jwøk; 'ba beege dïlämme na näk beege wäät Aran na no ocïp kur keerge kiper waaŋ gïï wø jïcge ŋwääi ni met. Døny wøk ki yi kanya en kur keere, kiper ïïna bääyö dëër Wuuö Jwøk, ni bäŋ wödö mo jootï baŋe këët.»

¹⁹'Ba Udhaya aput wëër na athaanh maac ena cere man wø waaŋ gïï wø jïcge ŋwääi ni met yi gø. 'Ba kanya wëëre ki dïlämme, dhøøbø[16] aput päny wøk ki täärnyïme nyïm dïlämme yi Øt Wuuö Jwøk kanya en yie deŋ gïn wø waaŋ gïï wø jïcge ŋwääi ni met bääte.

²⁰'Ba Adhariya na bëëdö na Kwääy Lam Mana Dwøŋ ki dïlämme moøgø bëët, Udhaya aputge neen ni jootge gø na adïëri møn ni dhøøbø opäny wøk ki täärnyïme. Kanyøgø ena putge layø ki man laar døny wøk ki yi Øt Wuuö Jwøk, ni ö eni thuwø ni lääde ki man laar pïï wøk, kiper ena jääl Wuuö Jwøki ki täw mo leth.

²¹'Ba nyeya ma Udhaya aput bëëtö ni dhøøbø manøgø ena dëëre këël aŋuun kwøw mare. Ni bëëdö yi øtø kur keere, mo kare ree jädhö ki jiy, ni tuu ki dhøøbø, ni mäni ki yi Øt Wuuö Jwøk. 'Ba wääde ma Jötham aput tïmö ni paan-dwøŋ ki paac bäre ena cere.

²²'Ba luum tïïe møga bëët moa tïïc Udhaya ki mana täge këël aŋuunge, ogöör nyikuŋ Jwøki piny mana cwøl na Aydheea wär Amöth.

²³'Ba Udhaya athøw ni läp køør kwäcge, ni koonyge gø kur keere buut bwör mo kwäcge kar bwör mo nyeye, kiper mana näk mo dëëre da dhøøbø. Ni ö wääde ma Jötham ni läw kar gø na nyeya.