Read anuak 2 Luup Nyeye 27 Bible Online

2 Luup Nyeye 27 - anuak bible

2 Luup Nyeye 27

¹'Ba kanya tïm Jöthammi na nyeya, cwiic dööŋö moe beege pïërariiø kurbïïc, ni bëëde ki cwiiri apaar ka abïciel ni ena nyeya yi Jerucalem. 'Ba nyeŋ menni beeye Jeruca nyi Dhadök.

²'Ba ena bëëdö ni tïïya gïï mo nëëni ni beyø ki jï Wuuö Jwøk, kaawat moa tïïc wänni ma Udhaya. 'Ba eni kär bääyö kaawat mana bääc wänni yi Øt Wuuö Jwøk. 'Ba jiy abëëdö ni ge poot tïïö ki raay.

³'Ba Jötham dhi kal mar Øt Wuuö Jwøk mana en jï maal acäŋ geerrø, ni geer kiir mana en buut Thuur Öpël ki tïïc mo teek døc.

⁴Ni gëëde thuwø ki päänye bäät thuuri mo Juuda, ki kwör gwøk røk, ki uut koor mo ogeerø ni ena maal bäät thuuri moa näk bäätge da atøge.

⁵Kanyøgø ena këëdö thuwø ki nyeny jø Amön ni bööt gø, ni put jø Amönni cïpö jïre ka ajwäk cwiina këëtge yie, ni beege gwet-bïrö ma rumme ma kikarri ma dïpa, ki beek wø cwøl ni cïndë ma yïth rumme ma kume apaar mo røm ka rumi man wø cwøl ni kör, ki beek wø cwøl ni gäbci[17] ma yïth rumme ma kume apaar mo poot røm ka rumi manøgø. Ni ö jø Amönni ni cäŋge cïpö thuwø jï gø ri riet cwiiri ki ri dää cwiiri ki jammi mo caala moøgø.

⁶'Ba Jötham aput tëënnö kiper mana tiir bëëtö mare nyïm Wuuö Jwøk, Jwøk mare.

⁷'Ba luum tïïe møga moa tïïc Jöthammi, këël ki lenye moa këële bëët, ki tïïe moa tïïe, ogöör piny yi Wëël Nyeye Mo Juuda Ki Mo Icriel.

⁸'Ba Jötham kanya tïme na nyeya, cwiic dööŋö moe beege pïërariiø kurbïïc, ni bëëde ki cwiiri apaar ka abïciel ni ena nyeya yi Jerucalem.

⁹Køøre Jötham athøw ni läp køør kwäcge, ni koonyi yi Pääny Deebit. Ni ö wääde ma Eeyeth ni läw kar gø na nyeya.