Read anuak 2 Luup Nyeye 28 Bible Online

2 Luup Nyeye 28 - anuak bible

2 Luup Nyeye 28

¹'Ba kanya tïm Eeyethi na nyeya, cwiic dööŋö moe beege pïërariiø, ni bëëde ki cwiiri apaar ka abïciel ni ena nyeya yi Jerucalem. 'Ba eni kär bëëdö ni tïïya gïï mo nëëni ni beyø ki jï Wuuö Jwøk kaawat mana bëët kwari ma Deebit ni tïïya gïï mo beyø.

²'Ba ena bëëdö ni caatha køør tïïe moa tïïc nyeye mo Icriel, ni lëënye ki kït gïï wø lam kiper juu mo wø cøøri ni Baal.

³Ni eni wääŋö thuwø ki jer wø jïcge ŋwääi ni met ya agäm-kïn Ben Inöm, ni waaŋ wääte ki maac, ni cïpa ge no olämme, ni eni caatha køør gïïa raac yi Jwøki ki ge na tïïc wïth juurre moa riem Wuuö Jwøki wøk nyïm jø Icriel.

⁴Ni ö eni ni bëëde ni cïpö ko olämme ni wääŋö ki jer wø jïcge ŋwääi ni met kwör lam moa en bäät thuuri ki bäät kïte, ki moa en tiet jenni moa no onigïït piny bëët.

⁵Kiper manøgønø, Eeyeth acïp Wuuö Jwøki, Jwøk mare, cer nyeny jø Aram, ni ö jø Arammi ni böötge eni, ni put jiye mo thööth mak ki tøŋ ni kïthge ge yi Damacka. 'Ba ena cäŋ cïp cer Peka nyeny Icriel thuwø; ni ö Peka ni 'näk jic Eeyeth ki näk mo raac døc.

⁶Kiper Peka o Remaliya jø leny moa teek ma kume ma dïpa ki pïërariiø anääe yi Juuda ki dïcäŋ aciel, kiper mana ö jø Juuda na wecge Wuuö Jwøk, Jwø kwäcge.

⁷Ni ö Dhikri nyï tuuŋ Ipariem na bëëdö na ŋat leny mo teek, ni 'näk Maycëya o nyeya, ka Adhirikam ŋata en paan-dwøŋŋi cere, ki Elkana ŋata caath køør nyeya.

⁸Kanyøgø jø Icriel jø tuuŋge ma jø Juuda ma kume ma dïpe ariiø amakge ki tøŋ, ni beege mään, ko obwöc cwøw, ko obwöc mään; ni twierge jammi mo thööth thuwø baŋ jøøgø ni kïthge ge yi Cameria.

⁹'Ba nyikuŋ Wuuö Jwøk mana en kaagø na näk nyeŋŋe Ödet, ena ci wøk nee røømme ki jø leny mo oduu yi Cameria. 'Ba kanya røømme ki ge, ena köö jïge, ni «Neennu, Wuuö Jwøk Jwø kwäyø agootø ki jø Juuda, ni cïp geni ceŋŋu, ni 'nägu geni ki näk mo raac, këël mana jooti ya Jwøki.

¹⁰'Ba ennø, u cädö ni jø Juuda ki jø Jerucalem moø na mään ki cwøw yøø, ni tïïyu tïïö na laaŋe mou. ?A uuni, u kär bääyö thuwø nyïm Wuuö Jwøk, Jwøk maru?

¹¹Kiper manøgønø, beerra man wïnynyu mara, ni dwøgu tuuŋu ma jø Juuda moa magu, kiper wëër mar Wuuö Jwøk ni wø liel kaamar maac ena bäätu.»

¹²Køøre dïbwöthe mo jø Ipariem, ni beege Adhariya wär Jöanan, ki Berekiya o Mecilemöth, ki Jidhikiya o Calum, ka Amaaca wär Adali, gena pïëmö ki jøøa duuö ki kar leny,

¹³ni köge jï jøøgøøni, ni «Jiy moa magu ki tøŋ ba beer jïïu ki man kälu ge kany. ?Aŋø, u manynya man cäŋu bääyö mør käl bäätø nyïm Wuuö Jwøk, nou meeta bääyö mana en bäätø dïkwøŋ? Kiper bääyö marø oløny ni dwøŋ, ni wëër mar Wuuö Jwøk ni wø liel kaamar maac ena bäätø, ø na jø Icriel.»

¹⁴Kanyøgø jø leny jiy moa näk ege maa ki tøŋ ki jammi moa twierge aputge wii piny nyïm dïbwöthe ki jø acooŋa bëët.

¹⁵Køøre jøøa cøøri ki nyeŋge kaagø, jiy moa no omaaø ki tøŋ alwørge, ni runyge dëët moa näk cäädhi ka dëëtge ka abïïe ki røk abïïe moa twier, ni moocge jøøgø ka aleeŋŋe ki war, ni moocge ge ki gïn cam ki pïï, ni wïïrge dëët jøøgø ki maaw, ni ö moa näk ba løny ki wääth ni kïthge ge bäät arëëni. Ni dwøkge jøøgø bëët baŋ jø tuuŋge Jerikö, päänya näk da twöe; ni duuge poge Cameria.

¹⁶'Ba na tïme na kaagø, nyeya ma Eeyeth ajääk baŋ nyeny Aciria kiper køny.

¹⁷Kiper jø Ëdöm geno cäŋ öö ni tukge Juuda, ni makge jiy ki tøŋ.

¹⁸'Ba jø Pilitin thuwø päänye mo Juuda moa en yïth ŋøøpa näk rege päärö atwierge, ki kany wø cwøl ni Nëgëp; ni makge Bëëth-Camic, ka Ayalön, ki Gedëröt, ki Cökö ka atude moe, ki Temna ka atude moe, ki Gimjö ka atude moe, ni putge bëëte yïthge.

¹⁹'Ba Wuuö Jwøk Juuda adwøk piny kiper bëët Eeyeth nyeny Icriel,[18] kiper mana wëëk jø Juuda bëëte ki wïthge ni mare bääö døc dëër Wuuö Jwøk.

²⁰Køøre Tiglat-Pilëëcër nyeny Aciria aöö ni tïme ni tïïya gïn mo raac dëër Eeyeth ni ba køny gø.

²¹'Ba Eeyeth akän wøk røk jammi mo Øt Wuuö Jwøk ki røk jap øt nyec, ki røk jap kwääri, ni cïp ge jï nyeny Aciria. 'Ba këël na cïp japøgø, bäŋ køny mo ee joodø.

²²'Ba ki yïth nïne moa beet nyeya ma Eeyeth ni gïï mo leth tägö dëëre, eni poot bëëdö ni meeta bääyö mare nyïm Wuuö Jwøk.

²³Kiper ena cïpö ko olämme jï juu mo jø Damacka na bööt eni, ni kööe, ni «Kiper juu mo nyeye mo Aram jicge akønyge, aani beerra man cïpa ko olämme jïge kiper naa kønyge.» 'Ba aput tïmö ni käla ränynyö mo päl bääte ki jø Icriel bëët.

²⁴'Ba Eeyeth jap paac mo Øt Jwøk acooŋe ni ŋøør ge na thäŋi, ni cïëk odhuule mo dhøk Øt Wuuö Jwøk, ni tïïe ki gïï wø cïp olämme bäätge kiper dëëre yïth kwöra näk agääk jïëthe mo Jerucalem bëët.

²⁵Ni tïïe yïth päänye bëët mo Juuda ki kwör lam mo ena maal bäät thuuri, nee wääŋe ki gïï wø jïcge ŋwääi ni met jï juu møøk, ni tïïya Wuuö Jwøk, Jwø kwäye, nee goote.

²⁶'Ba luum tïïe møga moa tïïc Eeyethi, ki bëëtö mare bäre, ki mana täge këël aŋuunge, ogöör piny yi Wëël Nyeye mo Juuda ki mo Icriel.

²⁷Køøre Eeyeth athøw, ni läp køør kwäcge. Ni koonyge gø yi pääny Jerucalem, ni kärge kïth kany wø koony nyeye mo Icriel[19] yie. Ni ö wääde ma Edhekaya ni läw kar gø na nyeya.