Read anuak 2 Luup Nyeye 29 Bible Online

2 Luup Nyeye 29 - anuak bible

2 Luup Nyeye 29

¹'Ba kanya tïm Edhekaya na nyeya, cwiic dööŋö moe beege pïërariiø kurbïïc, ni bëëde ki cwiiri ma pïërariiø ka abïŋween ni ena nyeya yi Jerucalem. 'Ba nyeŋ menni beeye Abaaja nyi Dhekaraya.

²'Ba ena bëëdö ni tïïya gïï mo nëëni ni beyø ki jï Wuuö Jwøk kaawat moa tïïc kwari ma Deebit.

³'Ba yi cwiir mana ci bäät nyec yie, yi dwäänaca, odhuule mo dhøk Øt Wuuö Jwøk aput jap ni tïïc ge ni nyärö.

⁴Køøre dïlämme ki jø tuuŋ Libay acwøle ni cooŋ ge kanya laac nyïm Øt Wuuö Jwøk ki jï løø kur tuul-cäŋ.

⁵Ni kööe jïge, «Wui, jø tuuŋ Libay, cegu ïthu baŋa. Cïbu dëëtu kur keeru ennø, ni cïbu Øt Wuuö Jwøk, Jwø kwäyu, kur keere, ni kälu gïïa ba waany bëët wøk ki yi øtø manøgø ni en kur keere enø.

⁶Kiper kwäyø gena bääö dëër Wuuö Jwøk ni tïïge ki gïï mo nëëni ni reyø ki jï Wuuö Jwøk, Jwøk marø, ni wecge gø, ni løøge nyïmge wøk ki kar bëëtö mar Wuuö Jwøk, ni løøge ŋäthge baŋ gø.

⁷Geni thuwø odhuule mo dhøk Øt Wuuö Jwøk acïëkge, ni 'näkge mäc mo lambae, ni wecge wääŋö ki gïï wø jïcge ŋwääi ni met ki cïp olämme mo wø waaŋ bäre kanya en kur keere jï Jwø Icriel.

⁸Kiper manøgønø, Wuuö Jwøk awëër ki jø Juuda ki jø Jerucalem, ni jääl ge, ni tïïc ge na gïn böö cwïny jiyi ki gïrge, na gïr thäŋ ec, na gïr abuua, kaawat mana jootu gø ki nyeŋŋu.

⁹Raŋŋu, kwäyø anääŋŋi ko opëëlle ri leny, ni ö wäätø ki nyïïø ki määrø ni mak ge ki tøŋ ki køør gïnögø.

¹⁰'Ba ennø, mana en cwïnya, a manynya gø naa tuda ki luubö ki Wuuö Jwøk, Jwø Icriel, nee wëër mare na liel kaamar maac nee daae bäätø.

¹¹'Ba ennø, u na jiya, käru bëëdö jaak, kiper Wuuö Jwøk uuna jiere nou cuŋŋu nyïme, nee eni tïnynyu, nou tïmu ni uuna jø tïïc moe ni wääŋu ki gïï wø jïcge ŋwääi ni met.»

¹²Kanyøgø jø tuuŋ Libay aput ö maal baŋ tïïc. 'Ba ki røkge, jøøa käl dëër Kät bee Maath wär Amacay, ki Jool wär Adhariya. 'Ba jøøa käl dëër Mërari bee Kic wär Abdi, ka Adhariya wär Jëlelel. 'Ba jøøa käl dëër Gërcön bee Jöa wär Jimma, ki Ëden wär Jöa.

¹³'Ba jøøa käl dëër Elicapan beege Cimri ki Jikiël. 'Ba jøøa käl dëër Acaap beege Dhekaraya ki Mataniya.

¹⁴'Ba jøøa käl dëër Ëman beege Jikiël ki Cimiy. 'Ba jøøa käl dëër Jeduthun beege Cemaya ki Udhiel.

¹⁵Kanyøgø geni jø tuuŋge aputge cooŋ ni cïpge dëëtge kur keerge ni waany, ni cige kuna tïïcge Øt Wuuö Jwøk ni waany ki køør luup moa cem nyeya ki ri dwør Wuuö Jwøk.

¹⁶'Ba dïlämme adøny yi Øt Wuuö Jwøk kuya kuna tïïcge gø ni waany, ni ö japa reyø bëët na jootge yi Øt Wuuö Jwøk ni kälge ge wøk dï kal mar Øt Wuuö Jwøk. Køøre jø tuuŋ Libay japøge akwanyge ni kïthge ge wøk, ni leeŋge ge yi waŋ Naam Kidaran.

¹⁷'Ba tïïc mar cïp Øt Wuuö Jwøk kur keere manøgø täkge ni nïr dwää aciel aciel; 'ba na tïme na ri bäc nïne mo dwäänögø, gena pïï ra agööl Øt Wuuö Jwøk. Ni cïpge øtø kur keere ki nïne abära møøk; ni thöörge tïïc manøgø bäre ri paac bïcier nïne mo dwäänögø.

¹⁸Køøre gena ci baŋ nyeya ma Edhekaya ni köge, ni «Waani Øt Wuuö Jwøk bäre, ki gïn wø cïp olämme bääte mo wø waaŋ bäre ki jap tïïe moe bëët, ki tharabëëta man wø cïp muuga näk ocwøbø na nyuuthe bääte ki jap tïïe moe bëët, atïïcwa ni waany.

¹⁹Waani thuwø, jap tïïe bëët mo Øt Jwøk moa leeŋ nyeya wøk ma Eeyeth kanya en paaci cere ki køør mana bëëde ni eni bääö dëër Wuuö Jwøk, ajiiŋwa ni tïïcwa ge ni waany. Raŋï, ge ewa cïp nyïm gïn wø cïp olämme bääte mar Wuuö Jwøk.»

²⁰Køøre nyeya ma Edhekaya aput päny maal ka amöölla døc ni cooŋ kwääri mo pääny, ni cige Øt Wuuö Jwøk,

²¹ni ge käädö ko olämme mo wëën raay na mo cïp kiper buc nyec, kiper Øt Wuuö Jwøk, kiper jø Juuda. 'Ba olämme moøka beege rwäth dhäk abïriiø, ki nyöök rööm abïriiø, ki nyïï rööm abïriiø, ki nyöök atëëe abïriiø. Ni kööm dïlämme, ni beege nyïïkwaac Aran, ki man cïpge olämme moøgø bäät gïn wø cïp olämme bääte mar Wuuö Jwøk.

²²Kanyøgø rwäth dhäk anäkge, ni ö dïlämme ni lwørge rem ni kerge ge bäät gïn wø cïp olämme bääte. Køøre nyöök rööm anäkge, ni ö dïlämme ni kerge rem bäät gïn wø cïp olämme bääte. Køøre nyïï rööm anäkge, ni ö dïlämme ni kerge rem bäät gïn wø cïp olämme bääte.

²³Køøre nyöök atëëe mo olämme mo wëën raay akälge ni cïpge ge nyïm nyeya ki jø acooŋa; ni ö jøøgøøni ni cïpge ceŋge bäätge.

²⁴Køøre dïlämme nyöök atëëe moøgøøni a'näkge ni kønyge rem moge bäät gïn wø cïp olämme bääte no okïdi kiper raac jø Icriel bëët, kiper ocaan nyeya no olämme mo wø waaŋ bäre ko olämme mo wø cïp kiper wëën raay doo tïïö kiper jø Icriel bëët.

²⁵Køøre Edhekaya jø tuuŋ Libay acïp kwörge yi Øt Wuuö Jwøk ni ceŋge da athaliiŋŋi ki wïth thøme ma teeŋi ki køør luumma cem Deebiti, ki nyikuŋ Jwøk ma Nathan, ki Gaat, ŋat wø car jammi jï nyeya ki køør man wø nyooth Jwøki jïre; kiper luummögøøni cema Wuuö Jwøki ki dëët nyïïkuk moe moøgøøni.

²⁶'Ba kanyøgø jø tuuŋ Libay aput cuŋŋö ni jap dööti ma teeŋi moa näk mo Deebit ena ceŋge, ni ö dïlämme thuwø ni cuŋge ni tuŋi ena ceŋge.

²⁷Køøre Edhekaya acïpö ki dwøl nee olämme mo wø waaŋ bäre cïp bäät gïn wø cïp olämme bääte. 'Ba kanya täk cïp olämme, jøw aput tägö thuwø ki wär dudi jï Wuuö Jwøk ni jøw kudhö ki tuŋi, ni jøw pöödö ki jap dööti ma teeŋi moa näk mo Deebit nyeny Icriel.

²⁸'Ba kanya ö jø acooŋŋøgø bëët na wøørge Wuuö Jwøk, jø wär dudi thuwø gena put wär ki dudi ni jøw kudhö ki tuŋi. Ni ö japøgø bëët ni bëëtge ni di tïïö këël mana thum olämme bëët ki waaŋ.

²⁹'Ba kanya thum olämme bëët ki waaŋ, nyeya ki jiy bëët moa en buute cøŋge akëëlge piny ni wøørge Wuuö Jwøk.

³⁰'Ba nyeya ma Edhekaya ki kwääri moa en tiere jø tuuŋ Libay aköömge thuwø nee wärge ni ge pwøya Wuuö Jwøk ki dut Deebit ka Acaap, ni beeye Acaap ŋata wara joot jammi ki køør man wø nyooth Jwøki jïre. Ni ö jøøgøøni ni wärge ki dut pwøc jï Wuuö Jwøk ki met ec, ni këëlge cøŋge piny ni wøørge Wuuö Jwøk.

³¹Køøre Edhekaya aköö, ni «Ennø, dëëtu anø cïbu kur keeru ni waany jï Wuuö Jwøk; ööu kany ni cïpu olämme ki muuce mo dwøk met ec yi Øt Wuuö Jwøk.» Ni ö jø acooŋŋøgø ni cïpge olämme ki muuce mo dwøk met ec; ni ö jiyi bëët moa yïthge met ni cïpge ko olämme mo wø waaŋ bäre.

³²'Ba kwään olämme moa cïp jø acooŋŋøgø na mo waaŋ bäre jï Wuuö Jwøk beege rwäth dhäk ma pïërabïriiø, ki nyöök rööm ma dïpa, ki nyïï rööm ma dïpe ariiø. Ni moøgø bëët beege olämme mo wø waaŋ bäre.

³³Ni cïpge thuwø ki rwäth dhäk ma dïpe abïciel ki dïëk ma rööm ma kume adäk, ni cïpge ge kur keerge no olämme.

³⁴'Ba dïlämme atïmö ni nøk døc ni tïme ni ba løny jïge ki man jaaŋge lääy bëët moa 'näk no olämme mo wø waaŋ bäre. Ni ö nyïïmëëkge ma jø tuuŋ Libay ni kønyge geni këël mana thum tïïci bäre, këël mano ö dïlämme møga noo cïpge dëëtge kur keerge ni waany. Kiper jø tuuŋ Libay gena bëëdö ni cwïnyge thïïŋ ki man cïpge dëëtge kur keerge ni waany ni ge kaala dïlämme.

³⁵'Ba bäät olämme mo wø waaŋ bäre moøgø na thööth yøø na cïpge, poot da dwäle mo olämme mo wø duunni ki mëër, ki muuce mo kwøŋ kiper olämme mo wø waaŋ bäre mo ocïbö thuwø. Ni ö tïïci mar Øt Wuuö Jwøk ni dwøkge gø kare.

³⁶Køøre Edhekaya ki jiy bëët yïthge amïnnö ki gïna tïïc Jwøki kiperge, kiper tïïc manøgø alaar thumö ki kany mo yie cään.