Read anuak 2 Luup Nyeye 3 Bible Online

2 Luup Nyeye 3 - anuak bible

2 Luup Nyeye 3

¹Kanyøgø Cølöman aput tägö ki man geer Øt Wuuö Jwøk yi Jerucalem bäät Kïn Möria, kanya ö Wuuö Jwøki na nyooth ree yie jï wänni ma Deebit, ni beeye kanya jiiŋ Deebiti yi laara mar Örnan nyï Jeebuc.

²'Ba ena tägö ki geer ni nïr dwää ariiø, ariiø, ri ŋweer cwiic nyec moe.

³'Ba Øt Jwøk manøgø na geeri ya Cølömanni rumme moe beege ii: Bär mare mar piny ki køør røm mana dïkwøŋ beege gööye ma pïërabïciel mo cenø, ni ö dööŋ yie ni näk gööye ma pïërariiø.

⁴'Ba agööla mana en nyïm øtø, bär mare caala rumi mar dööŋ yi øtø, ni beege gööye ma pïërariiø. 'Ba bär mare mar maal beege gööye ma dïpa ki pïërariiø; ni puuc yi gø ki warkey mana tøŋ.

⁵'Ba thääŋ øtø mana en kur keere arämme ki teeŋ jenni moa perge leth, ni puuc bäätge ki warkey mana tøŋ. Ni kïth dëër øtø ki jenni mo otieŋø mo caala kït tuue ki gïï mo otieŋø ni mïërö mo odöölö.

⁶'Ba øtø aŋwaŋŋe ki nyeŋ kïte moa perge leth. 'Ba warkey mana tïïc øtø ki gø käla kanya cwøl ni Parbiem.

⁷Ni puuc øtø ki warkey, ni beege nyeŋ øtø, ki kwöra no othørø dhi øtø, ki dëër øtø, ki dhøk øtø; ni tëëŋ dëër øtø ki kït nyïïatwiet maal mo wø cwøl ni kirubëlli.

⁸Køøre eni thääŋ øtø mana en kur keere na pere leth atïïe. Ni bär mar thääŋ øtø manøgø röömi ki dööŋ yi øtø bäre, ni beege gööye ma pïërariiø, ni ö dööŋ yie thuwø ni näk gööye ma pïërariiø. Ni puuc yi gø ki warkey mana tøŋ ma rumme ma kikarri [6] ma dïpe abïciel.

⁹'Ba mucumääre moa tïïö ki ge otïïö ki warkey mo peek marge beege rumme ma cekelli ma pïërabïïc. Ni ö eni thuwø ni puuc uudi moa en maal ki warkey.

¹⁰Køøre ena tëëŋö ki gïï ma ariiø mo caala nyïïatwiet maal mo wø cwøl ni kirubëlli yi øtø mana en kur keere na pere leth, ni lëëny dëët gïïögø ki warkey.

¹¹'Ba kirubëlli moøgø bär mar bwöpge no opeerø beege gööye ma pïërariiø. Ni böömmö aciel bär mare beege gööye abïïc, ni bëëdö ni dëër øtø ee gudö. Ni ö böömmö maya ni näk gööye abïïc thuwø, ni bëëdö ni rege gudö ki bööm kirubël maya.

¹²'Ba bööm kirubël manøgø thuwø poot na gööye abïïc, ni poot bëëdö ni dëër øtø ee gudö ki løøk maya. Ni ö böömme maya ni näk gööye abïïc thuwø, ni beeye böömmö mana näk ree gudö ki bööm kirubël mana dïkwøŋ.

¹³'Ba kirubëlli moøgø bwöpge otïïö no opeerø, ni rumme mo bwöpge bëët beege gööye ma pïërariiø. Ni ge bëëdö no othïïŋö ni ge cuŋŋö ki tietge ni ge raŋŋa thääŋ øda en kur keere.

¹⁴Ni tïïe ka abïï gëëŋi mo cwääc ka waare ma kït ma abïcøle, ki kït ma dïmuur, ki kït mo kwaar, ki waac lïïna mo tar mo mïërö; ni göör kït kirubëlli bäät abïï gëëŋi manøgø, ni tïïe ni kwøe kwøø ki waare.

¹⁵Ni tïïe thuwø nyïm øtø ki gïï ma ariiø mo caala dïkweeye, mo bär marge beege gööye ma pïëradäk ka abïïc. Ni kïth wïth gïïögø ki jap mïërö mo bär mar man nø gööye abïïc.

¹⁶Ni tïïe ki tiimme mo odwøø, ni kïth ge wïth gïïa näk caala dïkweeye. Ni tïïe ki gïï ma lømløme ma dïpa aciel mo caala nyïïadïkwäle, ni cïp ge bäät tiimme maal na en bäät gïïa caal dïkweeye.

¹⁷'Ba gïïa näk caala dïkweeye acïp nyïm Øt Jwøk, na aciel ee cïp bäät cwïïc, ni cïp maya bäät caam. Ni cak nyeŋ mana en bäät cwïïc ni Jaakin,[7] ni ö mana en bäät caam ni cak nyeŋ gø ni Böeeth.[8]