Read anuak 2 Luup Nyeye 30 Bible Online

2 Luup Nyeye 30 - anuak bible

2 Luup Nyeye 30

¹Køøre Edhekaya ajäägö ki dwøl baŋ jø Juuda ki jø Icriel bëët, ni gööte ki weeli thuwø baŋ jø tuuŋ Ipariem ki jø tuuŋ Maneeca, ni cwøla ge nee öge yi Øt Wuuö Jwøk Jerucalem, nee cäŋ Cäŋa Pööth Thøøe Yie wøørge jï Wuuö Jwøk, Jwø Icriel.

²Kiper nyeya ki kwääri moa en tiere ki jø acooŋa bëët moa en Jerucalem geno nø cään bääte nee cäŋ Cäŋa Pööth Thøøe Yie wøørge kanyo tïme na ri riet dwäde,

³kiper mana käre løny jïge ki man wøørge gø kanya dii wøørø yie, kiper mana tïme kar kaace ni kwään dïlämme nøk moa näk dëëtge ege cïp kur keerge na mo Jwøk, ni jiy rege poot kärge cooŋ Jerucalem.

⁴'Ba luummögø atïmö ni beer ki jï nyeya ki jø acooŋa bëët.

⁵Ni jïëcge ki man gøøge gø piny dï ŋööm Icriel bäre, ki mana täge Bëërcïïba këël Daan, ni ge cwøla jiy nee öge yi Jerucalem kuna wøørge cäŋ Cäŋa Pööth Thøøe Yie jï Wuuö Jwøk, Jwø Icriel, kiper mana kärge gø wøørø ni jiy thööth kaawat mana no ogöör piny.

⁶Køøre jøøa jääŋŋi gena aay ni ge rwäänhnhö, ni cige mïëc Juuda ki Icriel bäre, ni weeli käärge käärö moa kälge baŋ nyeya ki kwääri moa en tiere, ki køør mana ö nyeya na kööm ge ki gø, na kööe, ni «Wui, u na jø Icriel, beerra man duu baŋ Wuuö Jwøk, Jwø Eeberam ki Aydhak ki Icriel, nee eni duu baŋu, u na bøth na dööŋ ni kär mak nyeny Aciria.

⁷'Ba käru tïmö kaamar wëëgu ki nyïïmëëgu na bëëdö ni ge bääö dëër Wuuö Jwøk, Jwø kwäcge, ni tïïc geni na gïn böö cwïny jiyi ki gïrge, kaawat man nëëne jïïu en.

⁸'Ba ennø, kär wïthu døøyu mo teek kaawat mana tïïc kwäyu, 'ba beerra man wïnynyu luum Wuuö Jwøk, ni dønynyu kar bëëtö mare na en kur keere, na näk ee cïp kur keere na bäre bäre, ni tïnynyu Wuuö Jwøk, Jwøk maru, nee wëër mare ni wø liel kaamar maac nee paanye bäätu.

⁹'Ba ni näk mo uuno duu baŋ Wuuö Jwøk, tuuŋu ki wäätu ge jïtö ki mëër ki baŋ jøøa mak geni ki tøŋ, ni duuge yi ŋöömö man. Kiper Wuuö Jwøk, Jwøk maru, beeye Jwø wø nyooth met ec ni beeye Jwø mëër. 'Ba eni täärnyïme ba løø wøk ki uuni ni näk mou duua baŋe.»

¹⁰'Ba jøøa jääŋŋi ni wø rwäänhnhi gena ci pääny man nø ki man nø po jø tuuŋ Ipariem, ki jø tuuŋ Maneeca, këël mana pïïcge po jø tuuŋ Dhebulan. 'Ba wïth tuŋi moøgø gena ŋeethø bäätge ni buuge geni.

¹¹'Ba këël na tïïcge gïnögø, jø møøk ki røk jø tuuŋ Acer, ki røk jø tuuŋ Maneeca, ki røk jø tuuŋ Dhebulan, rege adwøkge piny ni cige Jerucalem.

¹²'Ba cer Jwøk ena bäät jø Juuda thuwø ki man tïïc cwïnyge na aciel, nee luumma ö nyeya ki kwääri na köömge ge ki gø ki køør dwør Wuuö Jwøk nee tïïcge.

¹³'Ba kanya tïme na ri dwää ariiø, lwaa dhaanhø mo päl døc rege acooŋge yi Jerucalem na Ajwöma Mar Møga Näk Ree Bäŋ Thømmø wøørge.

¹⁴Kanyøgø gena ö maal ni daakge gïï wø cïp olämme bäätge mo juuga reyø, ki gïï wø waaŋ gïï wø jïcge ŋwääi ni met bäätge bëët moa en yi Jerucalem, ni putge ge leeŋ yi waŋ Naam Kidaran.

¹⁵Køøre gena nääö ki nyïï dïëk moa therø mo Cäŋa Pööth Thøøe Yie ni nïr dwää ariiø apaar kurŋween. 'Ba dïlämme ki jø tuuŋ Libay wïthge alääö keerge, ni cïpge dëëtge kur keerge na mo Jwøk, ni känge ko olämme mo wø waaŋ bäre yi Øt Wuuö Jwøk.

¹⁶Ni cuŋge kwörge kaawat mana no ocïp piny kiperge ki køør ciik Modhe na näk dhaanh Jwøk. Ni ö dïlämme ni jørge remø mana cïp jø tuuŋ Libay ceŋge.

¹⁷Kiper mana näk da jiy mo thööth mo dëëtge kärge cïp kur keerge na mo Jwøk dï acooŋŋøgø, jø tuuŋ Libay nyïï dïëk moa therø mo Cäŋa Pööth Thøøe Yie anäkge kiper jiy bëët moa näk ba waany, ni cïba dïëk moøgø kur keerge jï Wuuö Jwøk.

¹⁸Kiper lwaa dhaanhø mana öö bäre, këël moa öö ki røk jø tuuŋ Ipariem, ki moa öö ki røk jø tuuŋ Maneeca, ki moa öö ki røk jø tuuŋ Icakar, ki moa öö ki røk jø tuuŋ Dhebulan, thööthge dëëtge kärge tïïö ni waany; 'ba gena cämö jaak ki cam Cäŋa Pööth Thøøe Yie, këël na bëëde ni kärge tïïö ki køør mana no ogöör piny. 'Ba Edhekaya alämö kiperge ni kööe, ni «Beerra man ö Wuuö Jwøki na mare beer ni wëën ŋati man nø,

¹⁹ŋat mo cwïnye ee jiiŋŋø ki man many Jwøk, ni beeye Wuuö Jwøk, Jwø kwäye, këël na bëëde ni dëëre käre tïïö ni waany ki køør ciik mo Øt Jwøk.»

²⁰Kanyøgø Wuuö Jwøk lam mar Edhekaya awïnynye ni køny jøøgø.

²¹'Ba jø Icriel moa dwät Jerucalem Ajwöma Mar Møga Näk Ree Bäŋ Thømmø awøørge ki met ec mo dwøŋ døc ki nïne abïriiø. Ni ö jø tuuŋ Libay ki dïlämme ni bëëtge ni ge pwøya Wuuö Jwøk ki yi cäŋ cooth ki teek marge bäre.

²²Køøre Edhekaya ena cäänö ni pwøya jø tuuŋ Libay bëët, jøøa kwany tiet luup mo Wuuö Jwøk. 'Ba gena bëëdö ni ge cämö ki cam mar ajwöma manøgø ki nïne abïriiø, ni ge cïpö ko olämme mo wø duunni ki mëër ni ge dwögö ki met ec jï Wuuö Jwøk, Jwø kwäcge.

²³Køøre jø acooŋa bëët gena jïëy ki man cäŋge ajwöma manøgø wøørrø ki nïne abïriiø møøk. Ni putge gø wøør ki nïne abïriiø moøgø ki met ec mo dwøŋ.

²⁴Kiper Edhekaya nyeny Juuda akän wøk jï jø acooŋa ki dhäk ma kuma aciel ki dïëk ma kume abïriiø; 'ba kwääri gena kän wøk thuwø jï jø acooŋa ki dhäk ma kuma aciel ki dïëk ma kume apaar; ni ö dïlämme mo thööth ni cïpge dëëtge kur keerge na mo Jwøk.

²⁵'Ba jø acooŋa bëët mo Juuda yïthge atïmö ni met, ge ki dïlämme, ki jø tuuŋ Libay, ki jø acooŋa bëët moa öö ki yi ŋööm Icriel, këël ki juurre moa öö ki yi ŋööm Icriel ki mo wø bëëdö yi ŋööm Juuda.

²⁶'Ba met ec mo dwøŋ atägö Jerucalem, kiper poot bäŋ gïn mo otägö mo caala teeŋ man yi Jerucalem køør nïne moa beet Cølömanni o Deebit nyeny Icriel.

²⁷Køøre jø tuuŋ Libay moa näk dïlämme gena ö maal ni gwïëthge jiy, ni ö döötge ni wïnynyi ya Jwøki, ni ö lammi marge ni pïïe kanya en kur keere na näk kar bëët Jwøk maalø.